Search form

Éxodo 36

1Li Bezaleel xchi'uc Aholiabe xchi'uc scotol li boch'otic i'ac'bat lec sbijilic yu'un jech sna'ic spasel scotol li c'usitic chtun sventa chich' pasel li ch'ulna pasbil ta nucule ja' tspasic scotol li c'usitic yaloj Muc'ul Diose”, xi li Moisese.

Bats'i ep laj yich'ic tal smoton Dios li israeletique

2Li Moisese laj yic' li Bezaleel xchi'uc Aholiabe, xchi'uc li yantic boch'otic i'ac'batic lec sbijilic yu'un Muc'ul Dios sventa spasel li abtele, xchi'uc li boch'otic jech yo'ntonic o tsc'an chcoltavanic ta abtele. 3Te i'ac'bat ta sc'obic yu'un Moisés scotol li smoton Dios laj yaq'uic israeletic sventa tsliquesic spasel li c'usitic chtun ta sventa ch'ulna pasbil ta nucule.

Li israeletique yatelal jujun c'ac'al tal yaq'uilanic o li smoton Dios ti c'u yepal iloc' ta yo'ntonique. 4Ja' yu'un li j'abteletic sventa tspasic c'usitic chtun ta ch'ulnae la xquechanic li yabtelic jujunique. 5Jech bat yalbeic li Moisese: “Li jchi'iltactique toj ep xa laj yich'ic tal li c'usitic chtun ta sventa li abtel ti laj yal Muc'ul Dios chich' pasele”, xutic.

6Li Moisese laj yal batel mantal ta scotol scarpanaic ti mu xa xich'ic tal li c'usitic chaq'uic ta smoton Dios li vinic antsetic sventa chtun ta ch'ulnae. Jech ipajesatic ti mu xa me xich'ic tal epe, 7yu'un bats'i ep xa oy yu'unic c'usitic chtun ta sventa li abtele; ep xa la spas sobrail.

La sva'anic li Ch'ulna pasbil ta nucule

(Ex 26.1-37)

8Li boch'otic toj bij yu'unic li j'abteletic ta sventa ch'ulnae ja' la spasic li ch'ulnae. La spasic ta lajunlic poq'uetic pasbil ta ts'otbil lino no, ta yax'elantic sba, ta ic'ic'tic sba stsajal xchi'uc ta bats'i tsoj. La spasbeic sloc'obal chib querubinetic.9Li jujulic poq'ue ja' o'lol yoxlajunebal (12 1/2) metro snatil; ja' chib metro sjamalil. Ja' co'ol smuc'tiquil scotol. 10Jmoj stsacoj sba ta vo'lic la sts'isic. Ja' jech jmoj stsacoj sba la sts'isic noxtoc li yan vo'lique. 11Li sba liquil jmoj ta vo'lic ts'isbile vomajtic sat la spasic; la sbalic ta yax'elan no. La sbalic ta joyob li jujuvom sate. Ja' jech vomajtic la spasic ta jot sti' noxtoc li yan vo'lique. 12Li jlic ti ba'yuc laj yich' ts'isele lajuneb yoxvinic (50) ta vom sat laj yac'beic. Ja' jech la spasic noxtoc li yan jlique. Lajuneb yoxvinic (50) ta vom sat laj yac'beic. Jmoj snupanoj sba ic'ot yu'unic li jujuvom sate. 13La spasbeic lajuneb yoxvinic (50) slucajtic taq'uinal noxtoc. Ja' jech la snu'p sba o yu'unic xcha'lical, jech ipas o ta jbej ch'ulna pasbil ta nucul.

14Li Bezaleele la sjal buluchlic poc' ta tsotsil tentsun sventa smac sjol li ch'ulnae. 15Li jujulique ja' o'lol xchanlajunebal (13 1/2) metro snatil; ja' chib metro sjamalil, co'ol smuc'tiquil scotol. 16Jmoj ta vo'lic la sts'is li jlique. Li yane jmoj ta vaclic la sts'is. 17La spasbe lajuneb yoxvinic (50) ta vom sat jot sti' li jlic ts'isbil ta vo'lique. Li yan ts'acal la sts'ise la spasbe lajuneb yoxvinic (50) ta vom sat noxtoc ta jot sti'. 18Laj yac'be noxtoc lajuneb yoxvinic (50) slucajtic taq'uinal pasbil ta bronce, yu'un jech ta snu'p sba o, jech jlic no'ox ic'ot o.

19Jech noxtoc la spasbe yan smac li ch'ulnae, ja' ta nuculil chij bonbil ta tsoj. Xchi'uc la spas yan noxtoc, ja' ta lequil nuculetic; ja' ta sba yac'ol xa ic'ot. 20Te lic spas noxtoc tenalte'etic ta acacia te' sventa scucubal li ch'ulnae. Lec tuc' va'ajtic laj yac'. 21Li jujupech tenalte'e ja' o'lol yo'bal (4 1/2) metro snatil, ja' oxch'ix xchi'uc oxc'ob sjamalil, 22xchi'uc quechajtic jujujot sti' la spas sventa lec snubojan sba chc'ot. Ja' jech laj yich' pasel scotol li scucubal ch'ulnae. 23Li jot xocon ta stuq'uil sure jtob (20) ta pech scucubal la spasbe. 24Xchi'uc la spasbe cha'vinic (40) snacleb ta saquil taq'uin. Ja' chabchab snacleb laj yich' li jujupech tenalte' ta yoque. Ja' jujun snacleb laj yac'be li jujun xquechbenale. 25Jech noxtoc li yan jot xocon ch'ulna ta stuq'uil nortee la spasbe jtob (20) ta pech stenalte'al 26xchi'uc cha'vinic (40) snacleb pasbil ta saquil taq'uin. Ja' chabchab snacleb laj yich' li jujupech tenalte'e. 27Li jot xocon ch'ulna ta stuq'uil smaleb c'ac'ale ja' vacpech stenalte'al la spasbe 28xchi'uc la spas yan cha'pech tenalte' sventa chiquin na ta spat li ch'ulnae. 29Lec parejo ic'ot c'alal ta yoc xchi'uc ta sjol. Lec stsacoj sba ic'ot, yu'un yich'oj xotajtic taq'uin. Ja' jech laj yich' pasel noxtoc li yan sventa jot chiquin nae. 30Ja' vaxacpech tenalte' laj yich' ta scotol xchi'uc vaclajuneb (16) snacleb pasbil ta saquil taq'uin; chabchab snacleb laj yich' ta jujupech tenalte'.

31Li Bezaleele la spasbe vo'ob sc'atubte'al ta acacia te' li scucubal jot xocon ch'ulnae, 32xchi'uc yan vo'ob sc'atubte'al ta yan jot xocon, xchi'uc yan vo'ob sc'atubte'al ta spat ta stuq'uil smaleb c'ac'al.33Li sc'atubte'al ta o'lole jeloven to ta jujujot sti' laj yaq'uic. 34La xpix ta c'anal taq'uin li tenalte'etique. Li slucajtic taq'uinale ta c'anal taq'uin la spas. Ja' ti bu chich' xojel jelovel li sc'atubte'altaque. Li sc'atubte'altaque la xpix ta c'anal taq'uin noxtoc.

35Jech noxtoc la spas li poc' ti yax'elantic sbae, ti ic'ic'tic sba stsajale, ti bats'i tsoje, xchi'uc li ts'otbil lino noe. Ja' xluchal ic'ot yu'un li chib sloc'obal querubinetique.36Xchi'uc la spasbe jayibuc slucajtic taq'uinal; te la sjoc'an ta chanib yoyaltac pasbil ta acacia te'. Li yoyaltaque pixbil lec ta c'anal taq'uin, xchi'uc ac'bil chanib snacleb pasbil ta saquil taq'uin.

37La spas noxtoc jlic poc' sventa sti' li ch'ulna pasbil ta nucule. Ja' jalbil ta yax'elan poc', ic'ic'tic sba stsajal, bats'i tsoj, xchi'uc ts'otbil lino no. Lec c'upil sba xluchal la spasbe. 38La spasbe vo'ob yoyal xchi'uc slucajtic taq'uinal xchi'uc vo'ob snacleb pasbil ta bronce taq'uin. La xpix lec ta c'anal taq'uin li sjol oyetique xchi'uc li xotxot taq'uin xojol ta oye.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index