Search form

Éxodo 39

Laj yich' pasbel sc'u' paleetic

(Ex 28.1-43)

1Li c'u'iletic laj yich' pasel ta sventa abtel te ta ch'ulnae ja' ta yax'elan poc', ic'ic'tic sba stsajal, bats'i tsoj, xchi'uc ta ts'otbil lino no. Ja' jech laj yich' pasbel noxtoc li ch'ul c'u'iletic sventa Aarón jech chac c'u cha'al albil yu'un Muc'ul Dios li Moisese.

2Li mocan c'u'ile ta c'anal taq'uin laj yich' pasel xchi'uc ta yax'elan poc', ta ic'ic'tic sba stsajal, ta bats'i tsoj, xchi'uc ta ts'otbil lino no. 3Li c'anal taq'uine la stenic lec ta martillo; lec joy ibat yu'unic. Jich'ilic la silic jech chac c'u cha'al no; ja' la scapic o ta jalel xchi'uc li yax'elan poq'ue, li ic'ic'tic sba stsajale, li bats'i tsoje, xchi'uc li ts'otbil lino noe. 4Li mocan c'u'ile laj yac'beic cha'jis bic'tal poc' ta xcha'jotal snecub. 5Li xchuquilal mocan c'u'ile ja' co'ol laj yich' jalel, ja' ta c'anal taq'uin, ta yax'elan poc', ta ic'ic'tic sba stsajal, ta bats'i tsoj, xchi'uc ta lino no jech chac c'u cha'al i'albat yu'un Muc'ul Dios li Moisese.

6Li ónice tonetique laj yich' nacanel ta yunin naclebic pasbil ta c'anal taq'uin. Ja' te ts'ibabil sbiic li jujuchop israeletique; ja' jech pasbil jech chac c'u cha'al sello. 7Te la xchucanic ta sba li cha'jis bic'tal poq'uetic nabanbil ta snecub mocan c'u'ile. Ja' sventa sna'ubilic yu'un Dios li israeletic jech chac c'u cha'al albil yu'un Muc'ul Dios li Moisese.

8Li vorxapoq'ue toj lec pasbil noxtoc jech chac c'u cha'al pasbil li mocan c'u'ile: ja' ta c'anal taq'uin pasbil, ta yax'elan poc', ta ic'ic'tic sba stsajal, ta bats'i tsoj, xchi'uc ta ts'otbil lino no. 9Lec pim xchi'uc co'ol sjamalil ta jujujot; jch'ix xchi'uc jbej c'ob sjamalil ta set. 10Ja' te cholanbil chanjil ta no lequil tonetic: li sba jilile ja' yich'oj jbej rubí, jbej crisólito xchi'uc jbej esmeralda; 11Li xcha'jilile ja' yich'oj jbej granate, jbej zafiro xchi'uc jbej jade; 12li yoxjilile ja' yich'oj jbej jacinto, jbej ágata xchi'uc jbej amatista; 13Li xchanjilile ja' yich'oj jbej topacio, jbej ónice xchi'uc jbej jaspe. Li tonetique ac'bil yunin naclebic pasbil ta c'anal taq'uin. 14Ja' lajcha'bej li tonetique yu'un ja' jech lajcha'chop li israeletique. Ta jujubej tone te ts'ibabil sbi li jujuchop israeletique. Ja' jech pasbil jech chac c'u cha'al sello.

15Li vorxapoq'ue la spasbeic yunin cadenail ta bats'i c'anal taq'uin, balbil jech chac c'u cha'al ch'ojon. 16Xchi'uc la spasbeic stsacleb ta c'anal taq'uin, xchi'uc xotajtic taq'uinal ta xcha'jotal li vorxapoq'ue. 17Ja' te la xchuquic li yaq'uil pasbil ta c'anal taq'uine. 18Li jot sba yaq'uile ja' te la snabanic ta snacleb li tonetic ti te nabanbil ta cha'jis poc' ta snecub mocan c'u'ile. 19La spasic yan chib xotxot c'anal taq'uin; ja' te la snabanic noxtoc ta jujujot xchiquin ta yolon li vorxapoc' ti bu jmoj xa oy xchi'uc li mocan c'u'ile. 20La spasic yan chib xotxot c'anal taq'uin; ja' te la snabanic ta bic'tal poq'uetic ti nabanbil ta xocon mocan c'u'il ti bu sts'isbenal ta yac'ol jutuc li xchuquilal mocan c'u'ile. 21Li xotajtic taq'uinal vorxapoc' xchi'uc li xotajtic taq'uinal mocan c'u'ile la xchuquic ta jlic yax'elan no yu'un jech mu stots, xchi'uc jech te chcom o ta yac'ol jutuc li xchuquilal mocan c'u'il jech chac c'u cha'al albil yu'un Muc'ul Dios li Moisese.

22Li snatil c'u'ilal mocan c'u'ile jalbil ta yax'elan poc'. 23Li sti'ti' ti bu jatbil snuc' ta o'lole lec pim pasbil, yu'un jech mu xch'i'. 24Li sti'ti' yoc natil c'u'il mu'yuc sc'obe lec c'upil sba pasbil ta sloc'obal caranatoetic, ja' ta yax'elan no, ta ic'ic'tic sba stsajal, ta bats'i tsoj, xchi'uc ta ts'otbil lino no. 25La spasbeic noxtoc bic'tal campanaetic ta c'anal taq'uin; ja' cacal ta o'lol yu'un biq'uit campana li sloc'obal caranatoe. Ja' jech la spasic ta joyob ta sti'ti' yoc 26li natil c'u'il sventa tspas yabtel li palee: ba'yuc chtal li biq'uit campanae; ja'o xtal jbej sloc'obal caranato; ts'acal chtal yan biq'uit campana; ja'o chtal noxtoc yan sloc'obal caranato jech chac c'u cha'al albil yu'un Muc'ul Dios li Moisese.

27Li natil c'u'il pasbil ta lino no ta sventa Aarón xchi'uc xnich'nabe ja' la sjal li boch'o ja' yabtel oe. 28Xchi'uc laj yich' jalel noxtoc li xpix jolal xchi'uc xnichimale, xchi'uc li comcom vexile; ja' pasbil ta ts'otbil lino no. 29Li chuquile ja' pasbil ta ts'otbil lino no, ta yax'elan no, ta ic'ic'tic sba stsajal, ta bats'i tsoj, lec c'upil sba laj yich' pasel jech chac c'u cha'al albil yu'un Muc'ul Dios li Moisese.

30La spas noxtoc jun biq'uit lámina ta c'anal taq'uin sventa voc'bilic o ta paleal, jech la sts'ibaic jech chac c'u cha'al sello, “Voc'bil yu'un Muc'ul Dios”, xi ts'ibabil. 31La stsoybeic jlic yax'elan no sventa chchuquic o ta yeloval li pix jolal jech chac c'u cha'al albil yu'un Muc'ul Dios li Moisese.

Ivu' yu'unic spasel li ch'ulna pasbil ta nucule

(Ex 35.10-19)

32La sta yorail imeltsaj yu'unic li ch'ulnae, ja' li ch'ulna pasbil ta nucul yo' bu tsc'opan sbaic xchi'uc Muc'ul Diose. Li israeletique ja' jech la sloc'taic jech chac c'u cha'al i'albat yu'un Muc'ul Dios li Moisese. 33Jech te lic yac'beic ta sc'ob Moisés li ch'ulna pasbil ta nucule xchi'uc scotol li c'usitic te chtune: ja' li lucajtic taq'uinetique, li stenalte'altaque, li sc'atubte'altaque, li yoyaltaque, li snaclebtac yoyale, 34xchi'uc li smac sjole, li nuculil chij bonbil ta tsoje, xchi'uc li lequil nuculetique, xchi'uc li poc' sventa chich' maquel o caxae. 35Xchi'uc laj yac'beic ta sc'ob noxtoc li xcaxail smantal Diose, li xq'uechubiltaque, li smaque, 36li mexae xchi'uc scotol li c'usitic te chtune, xchi'uc li ts'u'iltasbil pan te oy ta stojol Diose. 37Xchi'uc laj yac'beic noxtoc li candelero pasbil ta c'anal taq'uine, xchi'uc li scandilaltaque, ja' li candiletic ti tsc'an te chich' vuchanel ta xvuchlebe, xchi'uc scotol li c'usitic te chtune, xchi'uc li aceite sventa tstsan oe, 38xchi'uc li scajleb pom pasbil ta c'anal taq'uine, xchi'uc li aceite sventa ich'ub abtelale, xchi'uc li pome, xchi'uc li poc' sventa smac sti' li ch'ulna pasbil ta nucule, 39xchi'uc li scajleb smoton Dios pasbil ta broncee, xchi'uc li xchajchajtaq'uinal pasbil ta bronce noxtoque, xchi'uc li xq'uechubiltaque xchi'uc scotol li c'usitic te chtune, xchi'uc li muc'ta perol xchi'uc snaclebe. 40Laj yac'beic noxtoc li poq'uetic sventa yamaq'uil ch'ulnae, xchi'uc li yoyaltaque, li snaclebtac yoyale, li poc' sventa smac sti' yamaq'uil ch'ulnae, li yaq'uiltaque, li te'etic sventa chich' nituanel oe, xchi'uc scotol li c'usitic chtun te ta ch'ulna pasbil ta nucule. 41Xchi'uc laj yac'beic noxtoc li jalbil c'u'iletic sventa abtel te ta ch'ulnae, xchi'uc li ch'ul c'u'il sventa pale Aarone, xchi'uc li sc'u'ic xnich'nabtac sventa paleale.

42Li israeletique ja' jech la spasic scotol jech chac c'u cha'al albil yu'un Muc'ul Dios li Moisese. 43C'alal laj yil Moisés ti ja' jech imeltsaj yu'unic scotole, lic sc'anbe bendición ta stojolic.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index