Search form

Éxodo 4

1Li Moisese jech la stac'be li Muc'ul Diose:

—Pero mu xiyich'icun ta muc'; mu xch'unic li c'usi chcale. Xu' ja' no'ox jech chiyalbicun: ‘Mu'yuc laj yac' sba ta ilel ta atojol li Muc'ul Diose’, xu' xiyuticun —xi li Moisese.

2—¿C'usi te atsacoj ta ac'obe? —xi la sjac' li Muc'ul Diose.

—Jnamte' —xi li Moisese.

3—Jipo ta banamil —x'utat.

Li Moisese la sjip yalel ta banamil li snamte'e, jech ta ora no'ox ic'ataj ta jti'val chon. Li Moisese ixi'; ijatov ta anil. 4Li Muc'ul Diose jech laj yalbe:

—Bat tsacbo sne li chone —xut.

Li Moisese la stsacbe sne li chone. C'alal la stsaque, li chone ic'ataj ta snamte' yan velta.

5—Le'e ja' sventa ac'o xch'unic ti laj yac' sba ta ilel ta atojol li Muc'ul Diose, ja' li Dios yu'un amoltotic ta vo'onee, ja' li Abrahame, li Isaaque, xchi'uc li Jacobe. 6Li' ta orae tic'o ochel ta xch'ut ac'u' li ac'obe —xi li Muc'ul Diose.

Li Moisese la stic' ochel ta xch'ut sc'u' li sc'obe. C'alal la sloq'ues tale, ja' to laj yil ti tsacbil xa ta c'a'el chamele, solel saclo'an jech chac c'u cha'al tayo. 7Li Muc'ul Diose jech laj yalbe noxtoc:

—Tic'o ochel yan velta ta xch'ut ac'u' li ac'obe —xut.

Jech la stic' ochel yan velta. C'alal la sloq'uese, lec xa oy jech chac c'u cha'al ono'oxe. 8Li Muc'ul Diose jech laj yal:

—Me mu xaxch'unbicot ta sba sq'uelubil chapase, ta xchibal sq'uelubil ta xlic xch'unbicot. 9Pero me mu xch'unic, me mu xich'ic o ta muc' c'alal chapas li chib sq'uelubile, bat lupo tal vo' ta uc'um. Malo ta banamil. C'alal chamal ta banamil li vo' ti chalup tal ta uc'ume, ta xc'ataj ta ch'ich' —xi.

10—Ay, Cajval, mu xu' cu'un lec xilo'ilaj; mu xisabaj ta lo'il. Mu ja'uc to volje chabje ti jech chic'opoje. Jech ono'ox jtalel o, vu'un li avajtunelune. Jtalel o ti xquiclajet no'ox coc' c'alal chic'opoje —xi li Moisese.

11Itac'ov li Muc'ul Diose:

—¿Boch'o la spasbe ye li cristianoetique? ¿Me muc vu'cun jech ta jpas ti oy uma', ti oy coc, ti oy ma'sat, xchi'uc ti oy boch'o lec xil osile? 12Ja' lec batan me. Vu'un chajchi'inot ti c'alal chalo'ilaje; vu'un ta jchanubtasot li c'usi xu' chavale —xi.

13Li Moisese te la spojilan sba:

—Cajval, avocoluc taco batel yan vinic li boch'o lec xu' yu'une —xi.

14Li Muc'ul Diose i'ilin ta stojol li Moisese, jech laj yalbe:

—Te oy li abanquil Aarón ti liquem ta levie. Vu'une jna'oj ti lec xu' yu'un xlo'ilaje. Te ta xtal snupot ta be. C'alal chayilote, toj xcuxet no'ox yo'nton. 15Chi'ino ta lo'il; albo lec ya'ay scotol li c'usi tsc'an chale. Li vu'une te jchi'ucoxuc ti c'alal chalo'ilajique, xchi'uc vu'un chajchanubtasoxuc lec li c'usi tsc'an chapasique. 16C'alal chc'ot ac'opan li abanquile, xco'laj xchi'uc vu'un chc'ot c'opojcun. Li Aarone ja' xa chalbe ya'yic achi'iltaquic li c'usi chavalbee. 17Ich'o batel li anamte'e yu'un ja' chapas o li sq'uelubiltac jtsatsale —xut.

Li Moisese isut batel ta Egipto

18Li Moisese isut batel ta sna smuni', ja' li Jetroe. Jech c'ot yalbe:

—Persa chisut batel ta Egipto yo' bu comen li jchi'iltac ti jun jts'unubal jchi'uque. Ta jc'an ta jq'uel me yoquel to cuxulic —xut.

—Batan, tsotsan me batel —xi li Jetroe.

19C'alal te to'ox oy ta yosilal Madián li Moisese, jech i'albat yu'un li Muc'ul Diose:

—Sutan batel ta Egipto, yu'un li boch'otic tsc'an ox ta smilicote ichamic xa —x'utat.

20Ja' yu'un li Moisese laj yic' batel li yajnil xchi'uc xnich'nabe. La scajan batel ta buro, jech isutic batel ta Egipto. Te yich'oj batel li namte'al yu'un Diose. 21Li Muc'ul Diose jech laj yalbe li Moisese:

—C'alal chac'ot ta Egiptoe, xc'ot apas scotol ta stojol faraón li sq'uelubiltac jtsatsal chacac'bot apase. Yu'un li vu'une ta jtsatsubtasbe yo'nton li faraone, jech mu xac' loc'uc batel li achi'iltaque. 22Ts'acal jech xlic avalbe li faraone: ‘Jech chayalbot li Muc'ul Diose: Li Israele ja' sba jnich'on. 23Laj xa calbot ti ac'o aloq'ues batel li jnich'one, yu'un chbat yich'icun ta muc'. Pero ta sventa ti mu xavac' loc'uc batele, ta jmilbot li sba anich'nabe, xayutot li Muc'ul Diose’, uto —xi li Muc'ul Diose.

24C'alal te xa'ox oyic batel ta be xchi'uc yajnil xnich'nab li Moisese, te ital nupatuc ta be yu'un Muc'ul Dios yo' bu chvayique yu'un ta xa'ox xmilat. 25Ja' yu'un li Seforae la stsac jun ton ti lec oy ye jech chac c'u cha'al cuchiloe; ja' la se'pbe o snuculil sni' sc'unil li yole. Li snuculil sc'unil yole te laj yac'be ta yacan li Moisese, jech laj yalbe: “Ta mero melel ja' jmalalot ta sventa li ch'ich'e”, xut.

26Jech li Muc'ul Diose laj yac' batuc li Moisese. Ti jech laj yal Séfora: “Ja' smalal ta sventa ch'ich' li Moisese”, ja' ta scoj li circuncisione.

27Pero li Muc'ul Diose jech xa'ox yalojbe li Aarone: “Bat nupo tal ta be te ta xocol banamil li Moisese”, xut. Jech ibat li Aarone; te la snup ta be ta vits yu'un Dios. Te c'ot sc'opan; te la sts'uts'. 28Li Moisese te lic xcholbe ya'ay Aarón scotol li c'usitic i'albat yu'un Muc'ul Dios ac'o yale, xchi'uc laj yalbe noxtoc c'u x'elan li muc'tic sq'uelubil stsatsal Muc'ul Dios ch-ac'bat spase. 29Jech te ibat xchibalic; bat stsobic li moletic yu'un israeletique. 30Li Aarone c'ot yalbe ya'yic scotol c'usi albil yu'un Muc'ul Dios li Moisese. Xchi'uc la spasic te ta stojol xchi'iltaquic li sq'uelubil stsatsal Dios ti yaloj Muc'ul Dios ac'o spasique.

31C'alal laj ya'yic sjunul jteclum ti chich'ic coltael yu'un Muc'ul Diose, xchi'uc ti i'ilbat xa c'u x'elan li xc'uxul svocolique, toj lec ic'ot ta yo'ntonic. Jech te la squejan sbaic, laj yich'ic ta muc' li Muc'ul Diose.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index