Search form

Éxodo 8

1li Muc'ul Diose jech laj yalbe li Moisese:

—Batan ta stojol li faraone. Jech xc'ot avalbe: ‘Jech chayalbot li Muc'ul Diose: Coltao batel li jteclum cu'une yu'un chbat yich'icun ta muc'. 2Me mu xavac' loq'uicuc batele, li vu'une ta xcac' tal avocolic ta scotol Egipto; ta xcac' taluc epal xch'uch'etic. 3Ta xvoc' epal xch'uch'etic ta uc'um. Jech ta xloq'uic tal; ta x'ochic ta apasubmantal, ti bu chavaye; ta xmuyic ta avayab, xchi'uc ta x'och ta snaic li achi'iltac ta abtele, xchi'uc ta snaic scotol li ateclumale, xchi'uc ta x'ochic ti bu chata'ajesic pane xchi'uc ti bu chavots'ique. 4Li xch'uch'etique ta xbitujic muyel ta sba avac'olic, xchi'uc li achi'iltac ta abtele xchi'uc scotol li achi'iltaque’, uto —x'utat li Moisese.

5Li Muc'ul Diose jech laj yalbe noxtoc li Moisese:

—Albo Aarón ti ac'o stoy snamte' ta sba li uc'umetique, li bevo'etique, xchi'uc ti bu ts'anajtic nabetique, yu'un jech ac'o loq'uicuc tal epal xch'uch'etic; ac'o snojesic scotol li banamil ta Egiptoe —xi li Muc'ul Diose.

6Li Aarone la stoy snamte' ta scotol li vo' ta Egiptoe, jech iloc' tal epal xch'uch'etic. Inoj ta xch'uch' scotol ti c'u smuc'ul li Egipto banamile. 7Pero li boch'otic xchanojic mágia ti xu' yu'un chaq'uic ta ilel svu'elique ja' jech la spasic ec, jech iloc' tal xch'uch'etic yu'unic ec te ta yosilal li Egiptoe. 8Li faraone la stac ta iq'uel li Moisés xchi'uc Aarone, jech laj yalbe:

—C'anbeic vocol li Muc'ul Diose, yu'un ac'o sloq'ues batel li xch'uch'etic li' ta jtojolcutic xchi'uc li jchi'iltaque. Xu' ta xcac' ti ac'o bat yac'beic smoton Muc'ul Dios li achi'iltaque —xut.

9Li Moisese jech la stac'be li faraone:

—Albun ca'ay baq'uin chac'an ta jc'anbe vocol Muc'ul Dios ta atojol xchi'uc li achi'iltac ta abtele xchi'uc scotol li achi'iltaque. Xu' ta jc'anbe ti ac'o loc'uc batel li xch'uch'etic li' ta atojolique xchi'uc ta apasubmantale. Ja' xa no'ox te ac'o comuc scotol ta uc'umetic —xut.

10—Oc'om no'ox —xi li faraone.

Itac'ov li Moisese:

—Jech ac'o c'otuc ta pasel, yu'un jech chana' o ti mu'yuc boch'o yan jech chac c'u cha'al li Muc'ul Diose ja' li Dios cu'uncutique. 11Li xch'uch'etique ta xloc' batel ta apasubmantal; ja' xa no'ox te ta xcomic ta uc'um. Jech mu'yuc xa ta xuts'intaoxuc xchi'uc li achi'iltac ta abtele xchi'uc scotol li yantic achi'iltaque —xut.

12Li Moisés xchi'uc Aarone iloq'uic batel ta stojol li faraone. Jech li Moisese lic sc'anbe Muc'ul Dios ti ac'o loc'uc batel li xch'uch'etic ti stacoj tal ta stojol li faraone. 13Li Muc'ul Diose la spas c'usi la sc'an li Moisese, jech icham li xch'uch'etic ta naetic, ta spat xocon naetic, xchi'uc ta osilaltique. 14Li egiptoetique la stsobic scotol li chamen xch'uch'etique. Ta jujutsop laj yaq'uic, jech ituib ta jyalel li banamile. 15Pero c'alal laj yil faraón ti mu'yuc xa svocole, itsatsub yo'nton noxtoc, jech mu'yuc laj yich'be ta muc' sc'op li Moisés xchi'uc Aarón jech chac c'u cha'al yaloj ono'ox li Muc'ul Diose.

Ital ep bic'tal ch'iquil usetic

16Li Muc'ul Diose jech laj yalbe li Moisese:

—Albo Aarón ti ac'o smaj ta snamte' li spucucal banamile, yu'un ac'o c'atajuc ta ch'iquil usetic ta scotol li Egiptoe —xut.

17Ja' jech la spasic. Li Aarone la smaj ta snamte' li spucucal banamile, jech ic'ataj ta ch'iquil usetic. Ja' iti'atic o li cristianoetique xchi'uc li chonbolometic ta scotol yosilal Egiptoe. 18Li boch'otic xchanojic magiae la spasic ti ac'o taluc ep usetic yu'unic ec ta sventa li c'usi tspasique, pero muc xu' yu'unic. Te ilajic ta ti'el ta ch'iquil usetic li cristianoetique xchi'uc li chonbolometique. 19Li boch'otic xu' yu'un chac' ta ilel svu'elique, jech laj yalbeic li faraone:

—Le'e ja' Dios jech la spas —xiic.

Pero li faraone itsatsub yo'nton noxtoc, jech mu'yuc laj yich' o ta muc' jech chac c'u cha'al yaloj ono'ox Muc'ul Diose.

Ital epal xcochetic

20Li Muc'ul Diose jech laj yalbe li Moisese:

—Li faraone sob ta xbat ta uc'um oc'om. Li vo'ote sob xalic; te xabat ec. Jech xc'ot avalbe: ‘Jech yaloj li Muc'ul Diose: Coltao batel li jteclum cu'une yu'un chbat yich'icun ta muc'. 21Me mu xavac' loq'uicuc batele, ta me jtac tal epal xcochetic ta atojol, xchi'uc ta ana, xchi'uc ta stojol li achi'iltac ta abtele, xchi'uc ta scotol li achi'iltaque. Scotol li snaic achi'iltac li' ta egiptoe ta xnoj ta xcochetic xchi'uc ta xnoj scotol li banamile. 22C'alal me ic'ot ta pasel le'e, ta jvoc' comel li yosilal Gosene, yu'un ja' te nacalic li jteclum cu'une. Me jcotuc xcoch mu'yuc chvinaj te, jech chana' o ti vu'un Muc'ul Diosun; li' oyun ta avosilalique. 23Li jteclum cu'une ta jvoc' comel. Ja' no'ox chich'ic vocol li achi'iltaque. Oc'om no'ox xu' chc'ot ta pasel jech’, uto —x'utat li Moisés.

24Li Muc'ul Diose jech la spas. Xco'laj xchi'uc ic'al toc ivul li xcochetic ta spasubmantal faraone, xchi'uc ta snaic li xchi'iltac ta abtele, xchi'uc ta scotol yosilal li Egiptoe. Li banamile isoc ta scoj li xcochetique.

25Li faraone lic stac ta iq'uel li Moisés xchi'uc Aarone, jech laj yalbe:

—Milbeic smoton li Dios avu'unique, pero li' no'ox xapasic ta Egipto banamile —xut.

26Itac'ov li Moisese:

—Mu lecuc me jech ta jpascutique, yu'un li egiptoetique toj chopol chilic me ta jmilcutic jts'unub covolcutic ta smoton Muc'ul Dios, ja' li Dios cu'uncutique. Me laj yil egiptoetic ti ta jchic'becutic smotonin Dios li jts'unub covolcutique, xu' chlic smiluncutic ta ton. 27Ja' lec te chibatcutic ta xocol banamil ti oxib c'ac'al sbelale. Ja' te chbat jchic'becutic smoton li Muc'ul Dios cu'uncutic jech chac c'u cha'al laj yalbuncutique —xi.

28Li faraone jech laj yal:

—Xu' chacac'oxuc batel te ta xocol banamil ta sventa chbat amilbeic smoton li Muc'ul Diose, ja' li Dios avu'unique. Ja' no'ox venta me mu toj nomuc chabatique. Pero c'anbicun me vocol ta jtojol ec li vu'une —xi.

29Itac'ov li Moisese:

—Me liloc' batel li'i, ta jc'anbe vocol Muc'ul Dios ti ac'o loc'uc batel oc'om li' ta atojol li xcochetique, xchi'uc ta stojol li achi'iltac ta abtele, xchi'uc ta scotol li achi'iltaque. Ja' no'ox venta me mu ja'uc no'ox chalo'launcutic, me mu ts'acaluc chapajesuncutic ti ac'o bat cac'becutic smoton li Muc'ul Diose —xut.

30C'alal iloc' batel ta spasubmantal faraón li Moisese, lic sc'opan li Muc'ul Diose. 31Li Muc'ul Diose la spas c'usi la sc'an li Moisese, jech iloc' batel li xcochetic te ta stojol li faraone, xchi'uc ta stojol li xchi'iltac ta abtele, xchi'uc ta stojol scotol li xchi'iltaque. 32Pero li faraone itsatsub yo'nton yan velta noxtoc, jech muc scolta batel li israeletique.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index