Search form

Éxodo 9

Ital xchamel sts'unub yovol li egiptoetique

1Li Muc'ul Diose jech laj yalbe noxtoc li Moisese:

—Batan ta stojol li faraone. Jech xavalbe: ‘Jech chayalbot li Muc'ul Diose, ja' li Dios yu'un hebreoetique: Coltao batel li jteclum cu'une yu'un chbat yich'icun ta muc'. 2Me mu xavac' loq'uicuc batele, me ja' no'ox jech li' chamaquilane, 3ta me xcac' tal jtsatsal svu'el ta stojol li ats'unub avovolique. Ta xcac' tal tsatsal chamel ta atojolic, jech ta xcham li aca'ique, li aburoique, li acamelloique, li sme' avacaxique, xchi'uc li achijique. 4Yan li sts'unub yovol israeletique mu'yuc jech ta jpasbe jech chac c'u cha'al ta jpasbe ats'unub avovolic vo'oxuc li egiptooxuque. Li sts'unub yovol israeletique mu'yuc ta xcham jcotuc’, uto c'otel —x'utat yu'un Muc'ul Dios li Moisese.

5Li Muc'ul Diose laj yac'be lec yorail c'usi ora chc'ot ta pasel, jech laj yal:

—Le'e oc'om no'ox ta jpas —xut li faraone.

6Ta yoc'omal la spas jech li Muc'ul Diose. Jech icham scotol sts'unub yovol li egiptoetique. Yan li sts'unub yovol israeletique me jcotuc mu'yuc icham. 7Li faraone la stac batel boch'o bat sq'uelbeic li sts'unub yovol israeletique, ja' to laj yilic ti mu jcotuc chamene. Ac'o me jech laj ya'ay li faraone, pero itsatsub yo'nton yan velta noxtoc, jech mu'yuc laj yac' loc'uc batel li israeletique.

Itaatic ta ch'ieletic li egiptoetique

8Li Muc'ul Diose jech laj yalbe li Moisés xchi'uc Aarone:

—Jopic batel jopuc tanil c'oc' ta jun horno. Vo'ot, Moisés, te xc'ot avij muyel ta toyol ta stojol li faraone. 9Li tane ta xc'ataj ta pucuc, jech ta spuc sba batel ta scotol li Egipto banamile. Scotol li cristianoetic xchi'uc li chonbolometic yu'unique ta xch'i ep ch'ieletic ta sbec'talic; ta xlic c'a'uc li sbec'talique —x'utatic.

10Li Moisés xchi'uc Aarone laj yich'ic batel li tanil c'oq'ue; ibatic ta stojol li faraone. Li Moisese te ic'ot svij muyel ta toyol li tane. Jech li cristianoetic xchi'uc li chonbolometic yu'unique ich'i ch'ieletic ta scotol sbec'talic. 11Li boch'otic xu' yu'un chac' ta ilel svu'elique muc xa xu' yu'unic la stsal sbaic xchi'uc li Moisese, yu'un tabilic ta ch'iel ec jech chac c'u cha'al tsacbilic scotol li egiptoetique. 12Pero li Muc'ul Diose la stsatsubtasbe yo'nton li faraone yu'un mu me xich'be ta muc' sc'opic li Moisés xchi'uc Aarón jech chac c'u cha'al albil ono'ox yu'un Dios li Moisese.

Ital bot ta stojol li egiptoetique

13Li Muc'ul Diose jech laj yalbe li Moisese:

—Oc'ome sob xalic. Batan ta stojol li faraone. Jech xc'ot avalbe: ‘Jech chayalbot li Muc'ul Diose, ja' li Dios yu'un hebreoetique: Coltabun batel li jteclum cu'une yu'un chbat yich'icun ta muc'. 14Ta to me xcac' taluc yan vocol ta atojol, xchi'uc ta stojol li achi'iltac ta abtele, xchi'uc ta scotol li achi'iltaque, yu'un jech chana' o ti mu'yuc yan Dios ta scotol banamil jech chac c'u cha'al vu'une. 15Li vu'une xu' cu'un chacac'bot avil jvu'el, xu' cu'un chacac'bot atoj amul xchi'uc scotol achi'iltac ti jechuc ta jc'ane, jech ta x'ul o ats'unubal li' ta banamil ti jechuque. 16Pero li' to cuxulot cu'un, yu'un jech chcac'bot avil c'u x'elan li jvu'ele, yu'un jech ac'o vinajuc batel jbi ta scotol banamil. 17Ac'o me jech chavil, pero staoj yav o avo'nton apajesoj li jteclum cu'une, mu xavac' loq'uicuc o batel. 18Lec oy ti me jech avo'ntone. Oc'om ta jcocan yalel tal epal bot ti mu'yuc ono'ox baq'uin jech xyal tal c'alal lic yich' va'anel li Egiptoe xchi'uc c'alal to tanae. 19Ja' lec alo mantal ti ac'o yich' tsobel ochel ta na scotol li ats'unub avovole xchi'uc scotol li c'usitic oy avu'un ta avosile. Yu'un li bot ta xyal tale ta smil scotol cristianoetic, xchi'uc ats'unub avovolic me ta osilaltic no'ox oye, me muc chaviq'uic ochel ta nae, xayutot li Muc'ul Diose’, uto —x'utat li Moisese.

20Oy jayibuc xchi'iltac ta abtel faraón ixi'ic yu'un c'usi laj yal li Muc'ul Diose, jech la stsobic ochel ta na li smozoique xchi'uc li sts'unub yovolique. 21Pero oy yantic mu'yuc tsots sc'oplal laj ya'yic; te no'ox la scomtsanic ti bu ono'ox oy yu'unique. 22Li Muc'ul Diose jech laj yalbe li Moisese:

—Toyo muyel ac'ob ta vinajel yu'un ac'o taluc bot ta scotol Egipto banamil, ta scotol cristianoetic, ta scotol chonbolometic, xchi'uc ta scotol li c'usitic ch'iem li' ta Egipto banamile —xut.

23Li Moisese la stoy muyel snamte' ta vinajel, jech li Muc'ul Diose laj yac' tal chauc, xchi'uc sacsevul, xchi'uc epal bot. Ilaj ta bot scotol li Egipto banamile. 24Li bot xchi'uc sacsevule mu'yuc bu xquechaj o ti c'alal iyal tale. Mu'yuc ono'ox jech vinajem sc'oplal te ta Egipto banamil ti oy jech c'otem ta pasel ti toj pim iyal li bote.25Li bote la slilin scotol li c'usitic oy ta yosilal Egiptoe: la smil cristianoetic, chonbolometic, xchi'uc scotol li c'usitic sts'unojic ta yosilique. La sc'asan yalel scotol li sc'obc'ob muc'tic te'etic te ta yosilal Egiptoe. 26Yan ti bu nacal li israeletic ta Gosén banamile, me jutuc mu'yuc xyal jbejuc bot.

27Li faraone lic stac ta iq'uel li Moisés xchi'uc Aarone, jech laj yalbe:

—Laj xa jna' ti oy jmule. Vu'un ta jmul xchi'uc li jchi'iltaque; mu ja'uc oy smul li Muc'ul Diose. 28Toj ven tsots xa jvocolcutic ta scoj li chauc xchi'uc bote. C'opanbun Muc'ul Dios ta jtojolcutic yu'un ac'o pajuc li bot xchi'uc chauque. Ta xa jcolta batel li achi'iltaque; mu'yuc xa chajpajesoxuc yan velta —xut.

29Itac'ov li Moisese:

—Ja' no'ox me liloc' batel li' ta lume, ta jtoy jc'ob ta stojol Muc'ul Dios ti c'alal ta jc'opane, jech ta xch'abi li chauc xchi'uc li bote, yu'un jech ac'o ana' ti ja' yu'un Muc'ul Dios li banamile. 30Li vo'ot xchi'uc achi'iltac ta abtele jna'oj lec ti mu'yuc ono'ox chaxi'ic yu'un li Muc'ul Diose —xut.

31Li cebada xchi'uc lino sts'unojique lilijem icom ta bot scotol. Yu'un li cebadae chac'an xa'ox sat; jech noxtoc li linoe chnichinan xa'ox. 32Yan li trigo xchi'uc centenoe mu'yuc c'usi la spas yu'un ja' to chjavan tal.

33Li Moisese iloc' batel ta stojol li faraone. C'alal loq'uem xa'ox batel ta lume, la stoy muyel sc'ob; la sc'anbe vocol li Muc'ul Diose. Jech ta ora no'ox ich'abi li bote xchi'uc li vo'e, mu'yuc xa xbac' noxtoc li chauque. 34Pero c'alal laj yil faraón ti ich'abi xa li bot, xchi'uc chauc, xchi'uc vo'e, lic sa' smul yan velta noxtoc. Lic tsatsubuc yo'nton yan velta xchi'uc li xchi'iltac ta abtele. 35Li faraone la spas ta tsots yo'nton yan velta, jech mu'yuc laj yac' loc'uc batel li israeletic jech chac c'u cha'al albil ono'ox yu'un Muc'ul Dios li Moisese.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index