Search form

Génesis 15

Li Diose oy c'usi la xchapanic xchi'uc li Abrame

1Ts'acal to, li Muc'ul Diose la sc'opan ta xvayech li Abrame, jech laj yalbe:

—Mu xaxi' Abram. Vu'un jchabivanejun avu'un. Li amotone toj ep chata —xut.

2-3Li Abrame jech la stac':

—Cajval, Muc'ul Dios, ¿c'usi chtun o cu'un li jmoton chavac'bune yu'un lec xana' ti mu'yuc jnich'one? Ta sventa ti mu'yuc avac'ojbun junuc jnich'one, scotol li c'usitic oy cu'une ja' ta xich' comel li jun jmozo Eliezer liquem tal ta Damascoe —xut.

4Pero jech i'albat yu'un li Diose:

—Li boch'o ta xich' comel c'usitic oy avu'une ja' anich'on atuc. Mu xu' yan boch'o chich' comel —x'utat.

5Li Muc'ul Diose laj yic' loq'uel ta amac' li Abrame jech laj yalbe:

—Q'uelo lec avil li vinajele. Ato jaybej li c'analetique. Jq'ueltiquic me xu' avu'un yatel, yu'un jech to yepal chbat li amomnich'nabtaque —xut.

6Li Abrame lec i'ilat yu'un Dios ta sventa xch'unojel yo'nton.7Jech i'albat:

—Vu'un Muc'ul Diosun, vu'un la jloq'uesot tal ta Ur ta yosilal Caldeaetic sventa chacac'bot li banamil li'i —x'utat.

8Itac'ov li Abrame:

—Cajval, Muc'ul Dios, ¿c'u x'elan xu' ta jch'un me ta melel jbel sc'oplal chavac'bun quich' li osil li'i? —xi.

9Itac'ov li Muc'ul Diose:

—Ich'bun tal jcotuc biq'uit me' vacax, xchi'uc jcot tentsun, xchi'uc jcot chij ti yich'oj oxib jabil jujucote, xchi'uc jcot puruvoc stsu, xchi'uc jcot stsumut —x'utat.

10Li Abrame laj yich' tal ta stojol Muc'ul Dios li c'usitic ic'anbate. La xtuch'an ta o'lol li jujucote. Nopol yilojan sba laj yac'. Yan li mutetique mu'yuc la xtuch' ta o'lol. 11Li xulemetique te se'etic yalel ta sba sbec'tal li c'usitic laj yac' Abrame, pero li Abrame la sibtas batel. 12C'alal sabet xa'ox osile, li Abrame toj pim ibat svayel ta ora. Ta ora no'ox oy c'usi toj ven ic' ital joyibtaatuc. Jech ixi' ta jyalel. 13Ja' yu'un jech i'albat yu'un li Muc'ul Diose:

—Tsc'an chana' ti ta to xbat naquiicuc ta yan banamil li amomnich'nabtaque. Te ch-ochic ta mozoil, xchi'uc te ta xich'ic uts'intael chanib ciento (400) jabil. 14Pero li vu'une ta to xcac'be stoj smulic ec li cristianoetic tsmozoinvanique. Ts'acal chcolic loq'uel tal li amomnich'nabtaque, ep xa sc'ulejalic chloq'uic tal. 15Yan li vo'ote jun avo'nton chacham ta amalubel, jech chbat achi'in li amoltotac ta vo'onee. 16C'alal me ijelov xa'ox xchanc'olal amomnich'nabtaque, ja' to ta sutic tal yan velta li'i, yu'un mu'yuc to ta xc'ot bu c'alal spajeb smulic li amorretique —xi li Muc'ul Diose.

17C'alal och xa'ox ac'ubale, bats'i ic' li osile, te ivinaj jun horno chloc' ep xch'ayilal xchi'uc jch'om toj; te xch'omet jelovel ta o'lol ti bu voc'anbil li vacax, li chijetic, xchi'uc li mutetique. 18Ja'o yorail oy c'usi la xchapanic xchi'uc Abram li Muc'ul Diose, jech laj yalbe:

—Li banamil le' xlic tal ta yuc'umal Egipto c'alal to ta muc'ta uc'um Eufratese ja' ta xcac'be li amomnich'nabtaque. 19Ja' li yosilal cenetic, cenezetic, cadmonetic, 20hetetic, ferezetic, refaetic, 21amorretic, canaanetic, gergesetic, xchi'uc jebusetique —xut.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index