Search form

Génesis 27

Li Isaaque la sc'anbe bendición ta stojol Jacob xchi'uc Esaú

1C'alal mol xa'ox li Isaaque, imac sat; mu xa xil osil. Ta yan c'ac'al laj yic' li Esaue, ja' li banquilal xnich'one, jech laj yalbe:

—Totil —xut.

—C'usi chaval, tati —xi li Esaue.

2Li Isaaque jech laj yal:

—Li vu'une molun xa, mu jna' baq'uin xa chicham. 3Ja' yu'un ta jc'an chabat ta te'tic. Ich'o batel li aflechae; bat milo tal ti'bol jti'. 4Lec mu xameltsan tal li ve'lil jech c'u cha'al ta jc'an ono'oxe. Me imeltsaj tal avu'une, ich'bun tal jti', jech ta xcac'bot li bendición cu'une, yu'un yo'to cuxulun —xut.

5Pero li Rebecae laj ya'ay c'usi laj yalbe Esaú li Isaaque. Jech c'alal iloc' batel bat smilbe tal ti'bol sti' li stote, 6li Rebecae jech bat yalbe li Jacob, ja' li its'inal yole:

—A'yo ava'ay, li atote laj ca'ay c'usi laj yalbe li abanquile. Jech laj yalbe: 7‘Bat milo tal ti'bol jti'. Lec mu xameltsan tal li jve'ele yu'un ta jve'. Jech chacac'bot li bendición cu'une yu'un yo'to cuxulun’, xut. 8Ja' yu'un a'yo ava'ay lec li c'usi chacalbote, querem: 9Batan yo' bu oy li jchijtique. Ic'o tal cha'cotuc tentsun ti bu lequique yu'un ta jmeltsanbe lec sti' li atot ti c'u ono'ox x'elan lec mu tsc'ane. 10Vo'ot chbat avac'be sti' yu'un ac'o ve'uc. Jech xu' chayac'bot li bendición yu'une, yu'un yo'to cuxul —xut.

11Pero li Jacobe jech laj yalbe li sme'e:

—Li jbanquile toj pim stsotsil sbec'tal; li vu'une mu jechucun. 12Me la spicun li jtote, cha'ay ti vu'une, jech xu' tsnop ti ja' no'ox ta jlo'lae. Jech ja' no'ox ta jta utel ti c'alal ta jc'anbe li bendición yu'une —xi.

13Itac'ov li sme'e:

—Vu'un ac'o comuc ta jventa li stojol mulil cha'ac'bate. Li vo'ote ch'uno li c'usi chacalbote. Bat ic'o tal li tentsunetique —xi.

14Li Jacobe bat yic' tal li tentsunetique; vul yac'be li sme'e. Jech te lic smeltsan li ve'lile. Lec mu la spas jech c'u cha'al tsc'an ono'ox li Isaaque. 15Li Rebecae ja' la sloq'uesbe tal sc'u' li Esaú te nac'al ta snaic ti ven leque. Ja' laj yac'be slap li Jacobe. 16Xchi'uc la xpixbe ta snuculil tentsun li sc'obe xchi'uc li snuc' ti bu mu'yuc stsotsile. 17Laj yac'be batel li pane xchi'uc li ve'lil ti lec meltsanbil yu'une.

18Li Jacobe i'och batel yo' bu oy stote, jech laj yalbe:

—Tati, lital xa —xut.

—¿Boch'o junucal avu'unic? —xi la sjac' li Isaaque.

19—Vu'un Esauun, vu'un li banquilal anich'onune. Laj xa jpas li c'usi laj avalbune. Lic ve'an, ti'an li c'usi la jmil tale. Jech ac'bun li bendición avu'une —xi.

20Jech la sjac' li Isaaque:

—¿C'uxi laj avut laj ata tal ta anil li ve'lile, jnich'on? —xi.

—Ja' la scoltaun ta sa'el li Muc'ul Diose ja' li Dios avu'une —xi li Jacobe.

21Li Isaaque jech laj yalbe:

—Nopajan tal ca'tic li'i. Ta jpicot me ta melel vo'ot li jnich'on Esauote —xi.

22Li Jacobe te inopaj batel yu'un ac'o picatuc yu'un li stote. Li Isaaque jech laj yal: “Ja' snuc' Jacob ya'yel, pero li sc'obe ja' Esaú ya'yel noxtoc”, xi. 23Jech muc sna' o boch'o, yu'un li sc'obe pim stsotsil jech chac c'u cha'al li Esaue, ja' li banquilale. Pero c'alal yu'un xa'ox chac'be yich' li bendición yu'une, 24jech la sjac'be yan velta:

—¿Me ta melel vo'ot li Esauote? —xut.

—Vu'un Esauun ta melel —xi itac'ov li Jacobe.

25Ja' yu'un jech i'albat yu'un li stote:

—Ich'o tal li jve'ele, jnich'on. Ta jti' li c'usi laj amil tale. Ts'acal chacac'bot li bendición cu'une —x'utat.

Li Jacobe laj yac'be sve'el li stote, xchi'uc laj yich'be tal ya'lel ts'usub. Jech te ive' laj yuch' vo'. 26Ts'acal jech laj yalbe:

—Jnich'on, nopajan tal. La' ts'uts'un —xut.

27C'alal inopaj batel yu'un tsts'uts' li Jacobe, li Isaaque laj yuts'ibe li sc'u'e. Te laj yac'be bendición, jech laj yal chac li'i:

“Ta melel li smuil yic' li'i ja' li jnich'one.

Co'ol smuil yic' xchi'uc jun yaxaltic

ti ac'bil bendición yu'un Muc'ul Diose.

28Ac'o yac'bot tal vo' ta vinajel li Diose.

Ac'o lec batuc li c'usitic chats'un li' ta banamile.

Ac'o epajuc atrigo xchi'uc ats'usub.

29Ac'o yac' sba ta mozoinel avu'un li cristianoetique.

Ac'o squejan sbaic ta atojol li cristianoetic ta muc'tic lumetique.

Vo'ot chlic aventain atuc li achi'iltaque.

Ac'o squejan sbaic ta atojol.

Li boch'o ta scontrainote ac'o ac'batuc stoj smul;

yan li boch'o lec chayilote ac'o ac'batuc bendición”,, xut.

30C'alal laj xa'ox yo'nton ta yac'bel bendición Jacob li Isaaque, ja' to no'ox iloc' batel yo' bu oy stot ti c'alal ja'o ivul ta smilel ti'bol ec li Esaue. 31Jech te lic smeltsan ec li muil ve'lile. Laj yich'be batel li stote, jech laj yalbe:

—Tati, lican. Ti'an li ti'bol la jmil tal, vu'un li anich'onune. Jech ac'bun li bendición avu'une —xut.

32Li Isaaque jech la sjac'be:

—¿Boch'oot? —xut.

—Vu'un Esauun, vu'un li banquilal anich'onune —xi itac'ov.

33Te ch'ayel ic'ot yo'nton li Isaaque. Ta xi'el xa jech laj yal:

—¿Boch'o ti jliquel to li' i'ay yac'bun ti'bol jti'e? Yu'un laj xa jti' li ti'bol ti c'alal mu'yuc to chavule, xchi'uc laj xa cac'be yich' li bendición cu'une. Ja' yu'un li' ta orae ja' xa ac'bil bendición icom o —xi.

34C'alal laj ya'ay c'usi i'albat yu'un stot li Esaue, te la smil sba ta oq'uel. Tsots i'avan, jech laj yal:

—Tati, ac'bun quich' ec li bendición avu'une —xi.

35Itac'ov li Isaaque:

—Ja' i'ay slo'laun li avits'ine. Ja' xa laj yich' li bendición ti sc'oplal vo'ot chavich'e —xut.

36—Ja' smelol cha'e ti jech laj avac'beic sbiine. Yu'un xchibal xa velta jech la slo'laun. Ba'yuc la spojbun li c'usi sc'oplal chquich' vu'un li ba nich'onilune. Li' ta orae laj xa spojbun noxtoc li bendición ti sc'oplal chquich'e. ¿Me mu'yuc xa bendición te anac'oj ti xu' chavac'bune? —xi li Esaue.

37Itac'ov li Isaaque:

—A'yo ava'ay, li Jacobe laj xa calbe ya'ay ti ja' ta xlic spasot ta mantale, xchi'uc ta xlic ochuc ta smozo scotol li avuts' avalaltaque. Laj xa jc'an noxtoc ti ac'o ac'batuc ep strigo xchi'uc ts'usubetic yu'une. Li' ta orae mu xa jna' c'usi xu' chacutot, jnich'on —xi.

38Li Esaue muc xlaj yo'nton ta sjaq'uel:

—Tati, ¿me yu'un mu'yuc xa yan bendición ti xu' chavac'bune? Ac'bun ec li bendicione —xi.

Te x'avet liquel ta oq'uel yan velta.

39Li Isaaque jech laj yalbe:

“Ta xlic naclan ta nom ti bu oy lec yaxal banamile,

xchi'uc ti bu lec ta xc'ot li vo' chyal tal ta vinajele.

40Tsc'an chapoj aba ta avespada,

xchi'uc noxtoc ja' chasmozoinot li avits'ine.

Pero c'alal me laj ata lec atsatsale,

xu' chacolta aba loq'uel ta sc'ob”,, xut.

Li Jacobe ijatov batel ta scoj li Esaue

41Li Esaue te lic scontrain yits'in ta sventa ti ja' i'ac'bat bendición yu'un stotique. Jech laj yal ta yo'nton: “Jutuc xa sc'an xicomcutic ta me'nal, yu'un po'ot xa chcham li jtote. C'alal me jech ic'ot ta pasele, ja'o ta jmil li quits'in Jacobe”, xi.

42C'alal la sna' Rebeca c'usi tsnopilan li Esaue, laj yic' tal li Jacobe, jech laj yalbe:

—A'yo ava'ay, li abanquil Esaue tsc'an tsmilot, tsc'an tspacbot sutel li c'usi laj apasbee. 43A'yo ava'ay li c'usi chacalbote. Ja' lec jatovan batel ta ora ta Harán ta sna li jxi'mel Labane. 44Te oyan jayibuc c'ac'al. Ja' to me ilaj sc'ac'al yo'nton li abanquile, 45xchi'uc me ich'ay ta yo'nton li c'usi laj apasbee. Te ta jtacot ta iq'uel, jech xu' chasut tal. Yu'un mu jc'an ta jun no'ox c'ac'al ta xch'ay xchibal li cole —xut.

46Li Rebecae jech laj yalbe li Isaaque:

—Mu xa xcuch cu'un chca'ay ta sventa c'usi tspasic li hitita antsetic ti laj yic' li Esaue. Ti me ja' ta xic' junuc hitita ants ec li Jacob ti li' nacalic ta Canaane, ja' lec ac'o chamcun —xut.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index