Search form

Génesis 38

Sc'oplal c'usi ic'ot ta pasel yu'unic xchi'uc yalib li Judae

1C'alal ja'o jech orae, li Judae la svoc' sba loq'uel ta stojol li sbanquiltac xchi'uc yits'inabe. Te ibat snaban sba ta sna jun vinic, Hira sbi; ja' te liquem ta jun lum Adulam. 2Te laj yilbe stseb jun canaán vinic, Súa sbi. Li Judae laj yic' li tsebe. C'alal yic'oj xa'ox sbaique, 3te lic xchi'in yol. C'alal ivoc' yole, Er laj yac'be sbi. 4Lic xchi'in yol yan velta. C'alal ivoq'ue, Onán laj yac'be sbi. 5Ivoc' yan yol noxtoc, Sela laj yac'be sbi. Ja'o ivoc' ti c'alal te nacalic ta Quezib li Judae.

6Li Judae la sa'be yajnil li banquilal xnich'one, ja' li Ere. Ja' laj yic' jun tseb, Tamar sbi. 7Li Muc'ul Diose mu'yuc lec laj yil c'u x'elan stalel li Ere, jech laj yac' chamuc. 8Li Judae jech laj yalbe li Onane:

—Ic'bo yajnil li anima abanquile. Paso jech chac c'u cha'al sc'oplal chapas ta sventa ti vo'ot mu'ilote yu'un jech vo'ot ta aventa ch-ayin smomnich'nab li abanquile —xut.

9Pero li Onane la sna' ti mu ja'uc yu'un chc'ot me ivoc' li xnich'nabe. Jech c'alal ta xchi'in sbaic jujun velta xchi'uc li yajnil anima sbanquile, la snop lec c'u x'elan mu xna'p xch'ut yu'un. Yu'un mu sc'an ti ja' ta sventa ch-ayin smomnich'nab li anima sbanquile. 10Li Muc'ul Diose mu'yuc lec laj yil noxtoc c'usi la spas li Onane, jech laj yac' chamuc. 11Ja' yu'un li Judae jech laj yalbe li yalibe, ja' li Tamare:

—Batan ta sna atot ame'; te oyan o. Malao sta lec sjabilal li jnich'on Selae —xut.

Yu'un li Judae la snop ti xu' ta xcham noxtoc li Sela jech chac c'u cha'al icham li sbanquiltaque. Ja' yu'un li Tamare te ibat o ta sna li stote.

12C'alal i'ech' xa'ox jayibuc c'ac'ale, li Judae icham li yajnile, ja' li stseb Suae. Ts'acal to c'alal i'ech' xa'ox me'nal cha'ay li Judae, ibat ta jun lum Timnat yo' bu batem sloc'beic stsotsil li xchijtaque. Ibat xchi'in jun vinic ti lec sc'opan sba xchi'uque, Hira sbi; liquem ta Adulam. 13C'alal i'albat Tamar ti batem ta Timnat ta sloc'bel stsotsil xchij li smol'alibe, 14la sloc' li sc'u' sventa comen ta me'nale; la xpix sba ta jayal poc' ta sventa c'u cha'al mu x'otquinat. Te bat xchotan sba ta yochebal lum Enaim, yo' bu xjelov li sbelal Timnate. Ti jech la spase, yu'un sna'oj ti staoj xa lec sjabilal li Selae, pero mu'yuc x'ac'bat yic' sbaic xchi'uc.

15C'alal laj yil li Judae, la snop ti ja' jun jmulavil antse yu'un smacoj li sate. 16Jech te la scomtsan li sbee; ja' te inopaj batel yo' bu oy li Tamare. Pero me jutuc muc sna' me ja' li yalibe, jech laj yalbe:

—¿Me xac'an ta jchi'in jbatic ta vayel? —xut.

—¿C'usi chavac'bun me la jchi'in jbatique? —xi la sjac' li Tamare.

17Itac'ov li Judae:

—Ta jtacbot batel jcotuc biq'uit tentsun —xut.

—Lec oy, pero ta jc'an chavac'bun comel ta prentail li c'usi avich'oje. Ja' to ta jsutesbot ti me laj atacbun batele —xi li Tamare.

18—¿C'usi chac'an ta jcomtsanbot ta prentail? —xi la sjac' li Judae.

Itac'ov li Tamare:

—Ja' ac'bun comel li asello xchi'uc yaq'uile, xchi'uc li anamte' te avich'oje —xut.

Li Judae laj yac'be, jech te lic xchi'in ta vayel. Li antse te ina'p o xch'ut. 19Li Tamare isut batel; te c'ot sloq'ues li jayal poc' la xpix sba oe, ja' lic slap yan velta li c'u'il sventa me'nale.

20Li Judae ts'acal to la stac batel li unin tentsune. Ja' la stacbe batel li Adulam vinic ti lec sc'opan sba xchi'uque yu'un jech ac'o sutes ec li prentail yich'oj li Tamare. Pero li vinique mu'yuc te la sta li antse. 21Jech la sjac'be li viniquetic te nacalique:

—¿Bu oy xana'ic li jmulavil ants liquem ta lum Enaim ti te to'ox chotol ta ti'bee? —xut.

—Li'i mu'yuc xquilcutic me oy jmulavil ants —xiic.

22Li vinique isut batel yo' bu oy li Judae. Jech c'ot yalbe:

—Mu'yuc te la jta li antse. Li viniquetic te nacajtique laj yalbicun ti mu'yuc jmulavil ants tee —xut.

23Li Judae jech laj yal:

—Te ac'o yich' li c'usi laj cac'bee, yu'un jech mu boch'o xislabanun. Ja' no'ox venta ti la jtac batel li unin tentsune. Ja' xa no'ox vo'ot mu'yuc te la ata —xut.

24I'ech' xa'ox van oxibuc u, jech ital albatuc li Judae:

—Li avalibe, ja' li Tamare, oy xa xch'ut yu'un la xchi'in sbaic xchi'uc yan viniquetic —x'utat.

Li Judae tsots i'avan:

—¡Bat jochic loq'uel, chiq'uic ta c'oc'! —xi.

25C'alal ta xa'ox xjochic loq'uel li Tamare, jech la stacbe batel mantal li smol'alibe: “Li boch'o laj yac'bun cole ja' li yajval c'usitic li' quich'oje. Otquino lec avil; te xvinaj boch'o yu'un li sello li'i, xchi'uc li yaq'uile, xchi'uc li namte'ale”, xi li Tamare. 26C'alal laj yotquin li Judae, jech laj yal: “Li stuque lec c'usi la spas; vu'un chopol li c'usi la jpase yu'un muc xcac'be yic' sbaic xchi'uc li jnich'on Selae”, xi. Jech mu'yuc xa bu la xchi'in sbaic o yan velta xchi'uc li antse.

27C'alal sta yorail ivoc' yol li Tamare, ja' loin. 28C'alal yu'un xa'ox chvoc' li ololetique, li june ja' ba'yuc iloc' tal jun sc'ob. Li jnet'ume la xchucbe tsajal no ta sc'ob li olole, jech laj yal: “Li'i ja' ba'yuc ivoc'”, xi. 29Pero ta jliquel la stic' ochel sc'ob li olole. Ja' ijelov tal ba'yuc li yane; ja' ba'yuc ivoc' o. Li jnet'ume Fares laj yac'be sbi yu'un jech laj yal: “C'uxi laj avut ti vo'ot ba'yuc lajelov tale”, xi. 30Ts'acal ivoc' ec li yan ti chucul tsajal no ta sc'obe. Zara laj yac'be sbi.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index