Search form

Levítico 11

Sc'oplal chonbolometic stac' ti'el xchi'uc bu mu stac' ti'el

(Dt 14.3-21)

1Li Muc'ul Diose la sc'opan li Moisés xchi'uc Aarone, jech laj yalbe:

2“Jech xavalbe ya'yic li achi'iltac ta israelale: Scotol li chonbolometic oy ta banamile ja' no'ox xu' chati'ic jech chac li'i: 3Ja' li c'usitic sna' xcha'xax sve'elic ti cha'xol svoyique. 4Pero mu me xati'ic li yantic chonbolometique ac'o me sna' xcha'xax sve'elic, o me cha'xol svoyic.

“Jech chac c'u cha'al li camelloe sna' xcha'xax sve'el pero mu'yuc cha'xol svoy. Le'e mu me xati'ic.

5“Jech noxtoc li jun chon ti xco'laj xchi'uc mentes ti sna' xcha'xax sve'el ti mu'yuc cha'xol svoye, le'e mu me xati'ic.

6“Jech noxtoc li yan jchop ta t'ule sna' xcha'xax sve'el pero mu'yuc cha'xol svoy. Le'e mu me xati'ic.

7“Jech noxtoc li chitome cha'xol svoy, pero mu sna' xcha'xax sve'el. Le'e mu me xati'ic.

8“Scotol le'e mu xu' chati'ic; mu xu' chapiquic ti me oy bu chamen laj ataique. Bol chonetic ac'o comuc avu'unic.

9“Li c'usitic xu' chati'ic ti chch'iic ta vo'etic, ta nab, xchi'uc ta uc'umetique ja' li c'usitic oy yunin xic' xchi'uc oy smerioale. 10Yan ti bu mu'yuc xic' xchi'uc smerioale mu me xati'ic, yu'un ja' bol chonetic, ac'o me ta uc'um, o ta nab ch'iemic. Tsc'an chach'unic o ti ja' chopolique, ac'o me muc'tic me biq'uitic. 11Mu xu' chati'ic. Tsc'an jech chach'unic o ti chopole xchi'uc tsc'an chach'unic ti mu xu' chapiquic ti bu chamenique. 12Scotol li c'usitic ch'iemic ta vo', ti mu'yuc xic' xchi'uc smerioalique, tsc'an chach'unic o ti mu stac' ti'ele.

13“Li c'usitic xviletic ti mu xu' chati'ique ja' li'i: xic, vacos mut, ic'al xic, 14muc'tic xulem, xchi'uc scotol li jaychop xiquetique, 15xchi'uc scotol li jaychop jojetique, 16xchi'uc li avestruze, li cuxcuxe, li saquil mut chch'i ta nabe, xchi'uc li jaychop bic'tal xiquetique, 17li curutsuque, li xpech'al muc'ta nabe, li ibis mute, 18li saquil pech' xch'i ta nabe, li muc'tic pech'e, li yantic xuleme, 19li ciguenya mute, xchi'uc li jaychop joletique, li abubilla mute, xchi'uc li sots'etique.

20“Scotol li bic'tal chonetic ti xvilique xchi'uc ti chanovic ta banamile, bol chonetic ac'o comuc avu'unic. 21Pero li c'usi xu' chati'ique ja' li c'usitic oy yantic yacanic, ti xbitlajetic ta banamil chanov o xchi'uquique, ac'o me xvilic noxtoc. 22Li c'usitic xu' chati'ique ja' li'i: ja' scotol li jaychop c'ulubetique, li jaychop muc'tic c'ulube, li chiletique xchi'uc li xc'ajbene. 23Li yantic bic'tal chonetic ti xvilique xchi'uc ti chanovic no'ox ta banamile mu me stac' chati'ic.

24“Li boch'otic tspasic jech chac li'i, me ta spiquic li chamen bic'tal chonetic le'e, chopol ta xcom o c'alal to ta x'och ac'ubal.

25“Me oy boch'o ta stsac jcotuc li chamen chon le'e ac'o xchuc' sc'u', pero te chopol chcom o c'alal to ch-och ac'ubal.

26“Scotol li chonbolometic ti muc cha'xoluc svoyique xchi'uc ti mu sna' xcha'xax sve'elique mu xu' chati'ic. Me chapiquique, chopol chacomic.

27“Scotol li chonbolometic ti oy chanib yacan, ti petajtic yut yacanique, mu xu' chati'ic. Li boch'o ta spicbe sbec'tal c'alal chamen xae, chopol ta xcom c'alal to ch-och ac'ubal. 28Jech noxtoc me oy boch'o ta xich'be batel sbec'tal ti chamen xae ac'o xchuc' sc'u', pero chopol chcom o c'alal to ch-och ac'ubal, yu'un li chonbolometic le'e mu xu' chati'ic.

29“Li chonbolometic ti xjochet ta banamil chanovique, mu xu' chati'ic, ja' li sabene, li ch'oe, li xch'uch'e xchi'uc scotol li jaychop co'ol jech chanovique, 30xchi'uc li muc'tic xt'ub-chone, li ayinetique, li xt'ele, li ocotse, xchi'uc li camaleone.

31“Scotol le'e mu me xati'ic. Me oy boch'o ta spic c'alal chamenique, chopol chcom o c'alal to ch-och ac'ubal.

32“Jech noxtoc, me oy c'usi chbaj yalel te chc'ot yo' bu chamen jcotuc li chonetic le'e, chopol chcom o. C'usiuc no'ox, me te', me c'u'il, me nucul, me coxtal, o me abtejebal, chopol chcom o c'alal to ch-och ac'ubal. Ts'acal ac'o yich' ts'ajel ta vo', jech lec chcom yan velta.

33“Me oy chbaj ochel ta bin li chamen chon le'e, li bin xchi'uc li sbele chopol xa chcom o. Li bine ac'o yich' voq'uel. 34Jech noxtoc me oy ve'lil chatinbe ya'lel li bine, chopol chcom li ve'lile. Jech ec li sbel bine chopol chcom noxtoc. 35Scotol c'usi cht'ab ta sbec'tal li chamen chonetic le'e chopol chcom o. Jech noxtoc me oy chc'ot ta ba horno, o me ta sba yav c'oc', chopol chcom noxtoc; ac'o yich' jinesel. Mu xa xu' chich' tunesel.

36“Yan ti bu chich' lupel vo'e, me ta nio', o me ta joc', mu'yuc ta soc. Ja' no'ox li boch'o tspic chamen chonbolometique ja' chopol chcom.

37“Jech noxtoc me oy chc'ot ta sbec' c'usi tstac' ts'unel li chamen chonetic le'e mu'yuc ta soc. 38Pero me ach'em li sbec' ts'unubile, me te chbaj yalel jcotuc li chamen chonetic le'e chopol xa chcom o.

39“Me oy chcham jcotuc chonbolometic ti stac' ti'ele, me oy boch'o la spique, chopol chcom noxtoc c'alal to ch-och ac'ubal. 40Me oy boch'o la sti' li c'usi jech no'ox chcham stuque, ac'o xchuc' lec sc'u', pero chopol chcom o c'alal to ch-och ac'ubal. Jech noxtoc li boch'o chbat xch'ay li c'usi chamene, ac'o xchuc' lec sc'u', pero chopol chcom o c'alal to ch-och ac'ubal.

41“Scotol li chonetic ti xquilet ta banamil chanovique mu me xati'ic, yu'un ja' bol chonetic no'ox.

42“Scotol li chonetic ti xquilet ta banamil chanovique, me ta xch'ut chanovic, me ta chanib yacan, o me ta ep yacan chanovique, mu xu' chati'ic yu'un ja' bol chonetic. 43Mu me xabolibtas abaic ta jtojol ta sventa li bol chonetic ti xquilet ta banamil chanovique, 44yu'un vu'un Muc'ul Diosun avu'unic, jech tsc'an chavac' abaic ta tuq'uibtasel, xchi'uc tsc'an tuc' avo'ntonic yu'un li vu'une tuc' co'nton. Jech tsc'an ti mu xasoques abaic ta sventa li chonetic ti xjochet, ti xquilet ta banamil chanovique. 45Yu'un vu'un Muc'ul Diosun ti la jloq'uesoxuc tal ta Egiptoe, jech vu'un Diosun avu'unic chc'ot o. Ja' yu'un li vo'oxuque tsc'an ti tuc' avo'ntonique yu'un li vu'une tuc' co'nton”, xi li Muc'ul Diose.

46“Li'i ja' chanubtasel ta sventa scotol li chonbolometic ti xvilet chanovique, ti ta nab oyique xchi'uc scotol li c'usitic xquilet ta banamil chanovique. 47Yu'un jech chana'ic bu lec xchi'uc li bu chopole, xchi'uc jech chana'ic li c'usitic chonbolomal xu' chati'ique xchi'uc li c'usitic mu xu' chati'ique.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index