Search form

Levítico 12

Tsc'an chac' sba ta lecubtasel jun ants c'alal chcux

1Li Muc'ul Diose la sc'opan yan velta li Moisese, jech laj yalbe:

2“Jech xavalbe ya'yic li achi'iltac ta israelale: C'alal me oy xch'ut jun antse, me querem ivoc' yu'une, vucub c'ac'al mu'yuc lec chcom, co'ol jech chac c'u cha'al ti c'alal chil jujun ue. 3Ta xvaxquibal c'ac'al ac'o yich' circuncisión li olole. 4Pero li me'ile ac'o yaq'uilan sba ta lecubtasel oxlajuneb xcha'vinic (33) c'ac'al. Mu xu' tspic li c'usi ts'u'iltasbile xchi'uc mu xu' chbat ta ch'ulna ja' to me its'aqui ti c'u yepal c'ac'al tsc'an chac' sba ta lecubtasele. 5Yan me unin tseb ivoc' yu'une, chib xemuna mu'yuc lec chcom jech chac c'u cha'al chopol chcom c'alal chil ono'ox xchamele. Xchi'uc ac'o yaq'uilan sba ta lecubtasel vaquib xchanvinic (66) c'ac'al ta sventa ti iloc' xch'ich'ale.

6“C'alal me its'aqui ti c'u yepal c'ac'al albil chac' sba ta lecubtasele, me querem me tseb ivoc' yu'une, ac'o yic' batel jcotuc ch'ium chij te ta sti' scoralil ch'ulna pasbil ta nucul. Li chij chic' batele, ja' ti bu jun to jabil svoq'uele, yu'un ja' sventa chich' chiq'uel ta jmoton. Xchi'uc ac'o yic' batel jcotuc stsumut, o me jcot puruvoc stsu sventa chich' milel ta sventa smul; ja' ac'o yac'be li palee. 7Li palee ac'o yac'bun ta jtojol; jech ch'aybil smul chc'ot yu'un li antse, jech lecubtasbil chcom o”, xi li Muc'ul Diose.

Ja' jech jmantal chcom ta sventa c'alal me oy chvoc' queremetic, o me tsebetique. 8Yan me mu'yuc yu'un li chije, ac'o yic' tal cha'cotuc puruvoc stsu o me cha'cotuc stsumut. Jcot ac'o yich' chiq'uel ta sventa jmoton; jcot ac'o yich' milel ta sventa xch'ayubil smul. Jech li palee ac'o yac' ta ch'aybel smul li antse, jech lecubtasbil chcom o.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index