Search form

Levítico 13

Mantal sventa chamel chlic ta snuculilic

1Li Muc'ul Diose la sc'opan li Moisés xchi'uc Aarone, jech laj yalbe:

2“Me oy boch'o ip cha'ay sital chamele, me chinetic, o me saclebtic sba snuculilic, o me c'a'al chin ti xu' chc'ot ta tsatsal chamele, ac'o bat yac' sba ta q'uelel ta stojol li pale Aarone, o me ja' ta stojol li yantic paleetic ti ja' xnich'nab li Aarone. 3Li palee ac'o sq'uel lec c'u x'elan li c'a'al chin ta sbec'tale. Me sacuben li stsotsil yo' bu c'a'eme, xchi'uc me ch'opajtic xa ochel li sc'a'emale, yu'un xa ja' li c'a'el chamele. C'alal me laj yotquin lec ti ja' c'a'el chamele, ac'o yalbe ti mu xa stac' chi'inele.

4“Me ja' no'ox sacleban li snuculile, me mu'yuc c'a'em ochele, xchi'uc me mu'yuc sacuben li stsotsile, li palee ac'o smac ta na vucubuc c'ac'al. 5Ta svucubal c'ac'al ac'o sq'uel yan velta. Pero me te no'ox bisil o jech chac c'u cha'al ono'oxe, me mu'yuc yantic ch-epaj batel ta snuculile, te to ac'o smac ta na yan vucubuc c'ac'al noxtoc. 6Ta svucubal c'ac'al ac'o xcha'q'uel yan velta. Pero me te xa c'unc'un ta xch'ay batel, xchi'uc me muc yanticuc ch-epaj batele, li palee ac'o yal ti lec xa chcom li boch'o ip cha'ye yu'un ja' no'ox bic'tal chinetic te ich'i. Li boch'o ip cha'ye ac'o xchuc' lec sc'u', jech stac' xa chi'inel.

7“Pero me yantic tspuc sba batel li chinetic ta snuculil c'alal q'uelbil xa'ox, xchi'uc albil xa'ox yu'un pale ti stac' chi'inele, ac'o bat yac' sba ta q'uelel yan velta ta stojol li palee. 8C'alal me laj yil pale ti yantic no'ox ta xpuc batel ta scotol sbec'tal li boch'o ipe, ac'o yalbe ti mu xa stac' chi'inele yu'un xa ja' tsacbil o ta c'a'el chamel.

9“C'alal me oy boch'o chlic chamel ta snuculilique, ac'o yich' iq'uel batel ta stojol li palee. 10Ac'o sq'uel lec li palee. Me sacuben snuculil ta scoj li sital chamele, xchi'uc me sacuben stsotsile, me lec xa xvinaj sbec'tale, 11ja' svinajeb ti yu'un te xa me'inem o ta snuculil li c'a'el chamele. Li palee ac'o yalbe ti mu xa stac' chi'inele. Mu xa persauc ta smac ta na jayibuc c'ac'al yu'un mu xa stac' chi'inel o.

12“Me ta anil no'ox ta spuc sba batel ta yacan c'alal ta sjol li xchamel boch'o ip cha'ye, ac'o sq'uel li pale ti bu c'alal xu' yu'une; 13ac'o yotquin lec. Me anil no'ox chjelov ta scotol sbec'tal li chamele, ac'o yalbe ti stac' xa chi'inele yu'un li xchamele isacub xa, jech stac' xa chi'inel o. 14Pero c'alal ja'o yorail vinajem sbec'tal ti bu c'a'eme, mu stac' chi'inel o. 15Li palee ac'o sq'uelbe lec li sbec'tal bu c'a'eme. Me laj yile, ac'o yal ti chopole. Me lec xa xvinaj li beq'uete, mu xa stac' chi'inel, yu'un xa ja' li c'a'el chamele.

16“Pero me ta sacub li xcuxul bec'tal bu lec xvinaje, ac'o bat yac' sba ta q'uelel ta stojol li palee. 17Me laj yil lec li pale ti ta xa sacub ti bu c'a'eme, ac'o yal ti stac' xa chi'inele; lec xa chcom o.

18“C'alal me oy boch'o chc'a' snuculil ti te chcol stuque, 19pero me lic situbuc li yave, me sac ta q'uelel, o me saclebanic xchi'uc tsojtsojtic sbae, ac'o bat yac' sba ta q'uelel ta stojol li palee. 20Jech li palee ac'o sq'uel lec. Me laj yil ti chc'a' xa ochel li snuculile, xchi'uc me sacuben xa li stsotsile, li palee ac'o yal ti mu xa stac' chi'inele yu'un ja' xa te chlic o li c'a'el chamele. 21Me mu'yuc sacuben stsotsil ti bu ipe, xchi'uc me mu'yuc chch'enc'uj jutuc ochel sc'a'emal li snuculile, me te ta c'unc'un ta xcol batele, li palee ac'o smac ta na vucubuc c'ac'al. 22Pero me yantic ta x'epaj batel ta snuculil li chamele, li palee ac'o yal ti mu xa stac' chi'inele yu'un ja' xa ip cha'ay o li c'a'el chamele. 23Pero me mu'yuc ta x'epaj batel, me te xa no'ox ta xlut'umaj li yav bu ip to'oxe, li palee ac'o yal ti stac' xa chi'inele.

24“Jech noxtoc me oy boch'o chc'ac' ta c'oc', me saclebanic me tsojtsojtic sba, o me sac li yav bu c'aq'ueme, 25ac'o sq'uel lec li palee. Me sacuben stsotsil xchi'uc me ch'opch'op ochel jutuc li snuculile, ja' xa c'a'el chamel chlic ti bu c'aq'ueme. Ta sventa ti ja' xa ip cha'ay c'a'el chamele, li palee ac'o yal ti mu stac' chi'inele. 26C'alal me laj yil li pale ti mu'yuc sacuben stsotsil ti bu saclebane, xchi'uc me mu'yuc ch'opch'op ochele, me ta c'unc'un ta xcol batele, li palee ac'o smac ta na vucubuc c'ac'al. 27Ta svucubal c'ac'al ac'o sq'uel lec yan velta li palee. Me yantic no'ox ta x'epaj batel ta snuculile, li palee ac'o yal ti mu xa stac' chi'inele yu'un ja' xa ip cha'ay li c'a'el chamele. 28Pero me mu'yuc ta x'epaj batel ta snuculile, me te no'ox ta c'unc'un ta xcol batele yu'un ja' no'ox tsitub li yav sc'aq'uemale, li palee ac'o yal ti stac' chi'inel li boch'o ip cha'ye yu'un ja' no'ox chlut'umaj tal li yav sc'aq'uemale.

29“Me oy jun vinic, o ants ti chc'a' sjol, o me ta scolome, 30li palee ac'o sq'uel c'u x'elan ti bu chc'a'e. Me chvinaj ti ch'opch'op jutuc ochel xchi'uc me chc'anub li stsotsile, me jich'ilic xa no'oxe, li palee ac'o yal ti mu stac' chi'inel li boch'o ip cha'ye yu'un ja' xa ip cha'ay se'p. Ja' xa tsatsal chamel ti oy ta sjol, o ta scolome. 31C'alal me laj yotquin lec ti ja' se'p li pale, me mu'yuc chch'opq'uij ochel, xchi'uc me mu'yuc ic' stsotsile, ac'o smac ta na vucubuc c'ac'al. 32Ta svucubal c'ac'al ac'o sq'uel yan velta. Me laj yil ti muc yanticuc ta x'epaj xchi'uc ti mu'yuc ta xch'opq'uij ochele, ti mu'yuc ta xc'anub li stsotsile, 33ac'o yalbe ti ac'o sloc' li stsotsil sjole. Pero ti bu ipe, mu me sloc'be stsotsil. Jech li palee te to ac'o smac ta na yan vucubuc c'ac'al noxtoc. 34Ta svucubal c'ac'al ac'o sq'uel lec yan velta. Me laj yil ti mu'yuc ta x'epaj batel li se'pbe xchi'uc ti mu'yuc ta xc'a' ochele, li palee ac'o yal ti stac' xa chi'inele. Ac'o xchuc' lec sc'u', jech stac' xa chi'inel o. 35Pero me oy chc'ot ta pasel ti yantic ta x'epaj batel ta snuculil c'alal albil xa'ox ti lec oye, 36li palee ac'o xcha'q'uel lec yan velta. Me yantic la spuc sba ta snuculil li se'pbe, li palee mu xa persauc sq'uel me c'anuben li stsotsile. Li boch'o ip cha'ye, mu xa stac' chi'inel o. 37Yan me cha'ay ti te xa chpaj xchamel li boch'o ip cha'ye, xchi'uc me iq'uic xa chloc' tal stsotsile yu'un xa chcol o li se'pbe, jech stac' xa chi'inel. Li palee ac'o yalbe ti stac' xa chi'inele.

38“C'alal me oy jun vinic, o ants ti saclebanic ta snuculile, 39li palee ac'o sq'uelbe lec li snuculile. Me laj yil ti ch-ic'mach'tajan xa ti bu saclebanique yu'un ja' no'ox ilic ta bic'tal chinetic. Li boch'o jech oye, stac' chi'inel.

40“Me oy jun vinic ta xtul sjole, me jeche' xa t'abt'ab icome, li vinique stac' chachi'inic. 41Jech noxtoc me ja' no'ox chtul loq'uel ta sti'bae, me jeche' t'ajt'aj icome, stac' to chi'inel noxtoc. 42Yan me ja' chlic saquil c'a'uc xchi'uc me chacmuyantic sba ti bu tulem stsotsil, me ta spat sjol, o me ta sti'bae, ja' c'a'el chamel te chlic tal. 43Ac'o sq'uel lec li palee, me sac, xchi'uc me chacmuyantic sba sital ti bu c'a'eme, me co'ol xchi'uc li c'a'el chamel oy ta snuculile, 44yu'un xa ja'o li c'a'el chamele; ja' svinajeb ti chc'a' xa li sjole. Li palee ac'o yal ti mu xa stac' chachi'inique.

45“Li boch'o ip cha'ay c'a'el chamele, li'emic sc'u' ac'o slap, xchi'uc mu me smac li sjole. Jvoc' no'ox ac'o smac li sate, jech ac'o yal: ‘Chopolun, chopolun’, ac'o xiuc. 46Ti jayib c'ac'al ip cha'ay li c'a'el chamele mu stac' chi'inel o. Stuc ac'o naquiuc ta spat to li acarpanaique.

47“Jech noxtoc, c'alal me oy c'usi chvinaj lebajtic ta c'u'il pasbil ta tsotsil chij, me ta lino no, 48me ta jolobil nibil ta lino, o me ta tsotsil chij, me ta nucul, o ta c'usiuc no'ox pasbil ta nucule, 49me tsojtsojtic sba xyaxal chvinaje, bat ac'beic sq'uel li palee. 50Li palee ac'o sq'uel lec c'u x'elan, xchi'uc ac'o to sq'uej comel vucubuc c'ac'al. 51Ta svucubal c'ac'al ac'o sq'uel lec yan velta me yantic tspuc sba li c'usi oy ta c'u'il, me ta jolobil, me ta nucul, o li c'usitic pasbil ta nucule, yu'un xa ja'o li sc'a'el chamel c'u'iletic ti toj chopole. Li c'usi chc'a'e mu xa stac' tunesel. 52C'usiuc no'ox ti jech chc'a'e ac'o yich' chiq'uel ta c'oc' yu'un ja' xa te oy li c'a'el chamel ti toj chopole. 53Pero me laj yil pale ti muc yanticuc ta x'epaj batele, 54ac'o yal mantal ti ac'o yich' chuq'uele; ac'o to yich' q'uejel vucubuc c'ac'al.

55“C'alal me chuc'bil xa'ox li c'usi chopol te ta c'u'ile, li palee ac'o xcha'q'uel lec. Me laj yil ti mu'yuc ch'ayem oe, ac'o yich' chiq'uel yu'un toj chopol li c'usi te oy ta yut, o me ta spate manchuc me mu'yuc spucoj sba. 56Me laj yil pale ti ch'ayem xa jutuc li c'usi oy ta c'u'il c'alal chuc'bil xae, ac'o xch'i' loq'uel ti bu soqueme, me jalbil c'u'il, o me ja' li nucule. 57Pero me chlic yan veltae, me yantic ch-epaj ta c'u'il, ta jalbil poc', o ta nucule, ac'o yich' chiq'uel ta c'oc'. 58Yan me chch'ay batel c'alal me laj yich' chuq'uele, ac'o to yich' chuq'uel junuc velta, jech lec xa chcom o”, xi li Muc'ul Diose.

59Ja' jech mantal ta sventa c'alal me oy chlic sc'a'el chamel c'u'iletic, me ta tsotsil chij, o me ta lino no, yu'un jech xu' chich' alel me stac' tunesel, o me mu stac' tunesel.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index