Search form

Levítico 15

Mantaletic ta sventa c'usiuc no'ox chloc' yu'un jun vinic

1Li Muc'ul Diose la sc'opan yan velta li Moisés xchi'uc Aarone, jech laj yalbe:

2“Jech xavalbe ya'yic li achi'iltac ta israelale: Me oy jun vinic oy c'usi chloc' yu'une, chopol xa chcom o. 3Ta sventa ti oy c'usi chloc' yu'un li vinique jech te chopol chcom, ac'o me te ta xloq'uilan, o me te macal chcom, pero chopol chcom o.

4“Buyuc no'ox ta xmochi li vinic ti oy c'usi chloc' yu'une, chopol chcom ti bu chmochie.

“Jech noxtoc li c'usi ta xchotlebine chopol chcom.

5“Boch'ouc no'ox ta spic ti bu chmochi li vinique ac'o xchuc' lec sc'u', ac'o atinuc lec; pero chopol chcom o c'alal to ch-och ac'ubal.

6“Boch'ouc no'ox ta xchoti te yo' bu chchoti li vinique ac'o xchuc' lec sc'u', ac'o atinuc lec; pero chopol chcom o c'alal to ch-och ac'ubal.

7“Boch'ouc no'ox ta spic li vinic ti oy c'usi chloc' yu'une ac'o xchuc' lec sc'u', ac'o atinuc lec; pero chopol chcom o c'alal to ch-och ac'ubal.

8“Boch'ouc no'ox ta xtubtaat yu'un li boch'o oy c'usi chloc' yu'une, li boch'o chtubtaate, ac'o xchuc' lec sc'u', ac'o atinuc lec; pero chopol chcom o c'alal to ch-och ac'ubal.

9“Me chcaji ta jun montura li vinic ti oy c'usi chloc' yu'une, chopol chcom noxtoc li monturae.

10“Boch'ouc no'ox ta spic c'usi la xchotlebin li boch'o oy c'usi chloc' yu'une, chopol chcom c'alal to ch-och ac'ubal.

“Li boch'o ta xich' batel li c'usiuc no'ox soquem yu'un li boch'o oy c'usi chloc' yu'une, ac'o xchuc' lec sc'u', ac'o atinuc lec; pero chopol chcom o c'alal to ch-och ac'ubal.

11“Li boch'o tspic li vinic ti oy c'usi chloc' yu'une, me muc spoc sc'obe, ac'o xchuc' lec sc'u', ac'o atinuc lec; pero chopol chcom o c'alal to ch-och ac'ubal.

12“Me oy tspic bin li boch'o oy xchamele, li bine ac'o yich' voq'uel. Yan me ta te' pasbil li c'usi la spique, ac'o yich' poquel lec ta vo'.

13“Me ich'abi xchamel li vinique, ac'o yac' sba ta lecubtasel vucubuc c'ac'al. Ts'acal ac'o xchuc' lec sc'u'; ac'o spoc sba ta vo' ti bu lupbil tal ta nio'e, jech lecubtasbil xa chcom o. 14Ta xvaxquibal c'ac'al ac'o yich' tal cha'cotuc puruvoc stsu, o me cha'cot stsumut te ta sti' ch'ulna pasbil ta nucul. Ac'o tal yac'be pale te ta jtojol, vu'un li Muc'ul Diosune. 15Li palee ac'o smil jcotuc ta sventa mulil; li yan jcote ac'o yac' ta sventa chic'bil matanal. Ja' jech tsc'an pasel ta jtojol sventa chich' lecubtasel li boch'o oy xchamele.

16“Me oy c'usi ta sjelubtas jun vinique, ac'o spoc lec sba ta vo' scotlijil, pero chopol chcom c'alal to ch-och ac'ubal.

17“Me oy jlicuc c'u'il, o me nucul ti chatin c'usi la sjelubtas li vinique, ac'o yich' chuq'uel lec ta vo', pero chopol chcom c'alal to ch-och ac'ubal.

18“C'alal chchi'in sbaic xchi'uc yajnil li vinique, ac'o atinicuc lec xchibalic, pero chopol chcomic o c'alal to ch-och ac'ubal.

Mantal ta sventa c'usi chich' pasel me oy jun ants chil jujun u

19“C'alal chil u li antse, vucub c'ac'al chopol chcom.

“Me oy boch'o la spique, chopol chcom o c'alal to ch-och ac'ubal.

20“C'usiuc no'ox ta stasbin c'alal chvay li ants c'alal chil jujun ue, chopol chcom o ec.

“Jech noxtoc c'usiuc no'ox ta xchotlebin, chopol chcom noxtoc.

21“Li boch'o ta spic bu imochi li antse, ac'o xchuc' lec sc'u'; ac'o atinuc lec, pero chopol chcom c'alal to ch-och ac'ubal.

22“Me oy boch'o ta spic c'usiuc no'ox la xchotlebin li antse, ac'o xchuc' lec sc'u'; ac'o atinuc lec, pero chopol chcom o c'alal to ch-och ac'ubal. 23Li boch'o ta spic c'usiuc no'ox te oy ta vaybal bu imochi, o bu ichoti li antse, chopol chcom c'alal to ch-och ac'ubal.

24“Me oy jun vinic chchi'in sbaic xchi'uc li ants ti chil jujun ue, me laj yatin li vinique vucub c'ac'al chopol chcom. Ja' jech chopol chcom noxtoc ti bu chvayique.

25“C'alal me oy tsjelubtas ch'ich' jun ants ti muc yorailuc chil ue, me jal jech tspasbate, o me ja' chjalij ep c'ac'al ti chil jujun ue chopol chcom o ti jayib c'ac'al mu'yuc leque yu'un co'ol jech chac c'u cha'al chil u ya'yel.

26“Buyuc no'ox ta xvay, xchi'uc c'usiuc no'ox ta xchotlebin li ants c'alal yorail ep c'ac'al jech ip cha'ye, chopol chcoman noxtoc jech chac c'u cha'al chopol chcom c'alal chil ono'ox jujun ue.

27“Boch'ouc no'ox ta spic li c'usitic soquemique, chopol chcom ec. Tsc'an ac'o xchuc' lec sc'u', ac'o atinuc lec; pero chopol chcom o c'alal to ch-och ac'ubal.

28“C'alal me ich'abi li xchamele, ac'o to smala vucubuc c'ac'al ja' to jech lecuben chcom o. 29Ta xvaxquibal c'ac'al ac'o yic' tal cha'cotuc puruvoc stsu, o me cha'cot stsumut. Ac'o c'ot yac'be li pale te ta ti'ch'ulna pasbil ta nucule. 30Li palee ac'o smil jcotuc ta sventa mulil; li yan jcote ac'o yac' ta sventa chic'bil matanal. Ja' jech ac'o spas ta jtojol ta sventa tslecubtas li ants ti ja' to ch-ech' xchamele. 31Ja' jech tsc'an chapasic yu'un jech chavoq'uic ta sventa yi'lalic li achi'iltaque, xchi'uc jech mu xchi'ucuc yi'lalic chtalic ta ch'ulna pasbil ta nucul yo' bu chajchi'inoxuque, jech mu xchamic cu'un”, xi li Muc'ul Diose.

32-33Ja' jech li chanubtasel ta sventa boch'o oy c'usi chloc' yu'une, ac'o me vinic, o me antsetic ti chilic jujun ue, yu'un chopol chcom o xchi'uquic. Xchi'uc ja' mantal ta sventa li vinic me oy chchi'in sba xchi'uc yajnil ti yorail chil jujun ue.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index