Search form

Levítico 16

Sc'ac'alil Xch'ayubil Mulil

1C'alal chamen xa'ox li chib xnich'nab Aarón ti inopajic batel ta stojol Muc'ul Diose, ja'o ic'opanat yan velta yu'un Muc'ul Dios li Moisese. 2Jech i'albat:

“Albo abanquil Aarón ti mu me c'usiuc no'ox ora ch-och ta yut ch'ulna pasbil ta nucul te ta xcha'c'olal ta spat yo' bu joc'ol li poc' te ta yeloval smac caxae yu'un jech mu xcham. Yu'un li vu'une te chtal cac' jba ta ilel ta jun toc ta sba smac li caxae. 3C'alal ch-och batel ta ch'ulna li Aarone, ac'o yic' ochel jcotuc ch'ium tot vacax sventa mulil, xchi'uc jcot chij sventa chic'bil matanal. 4Ac'o tslap ochel li natil ch'ul c'u'il pasbil ta lino noe, xchi'uc ac'o slap ochel noxtoc li sbiq'uit-vex pasbil ta lino noe, xchi'uc li xchuc, xchi'uc li xpix sjol pasbil ta lino noe. Le'e ja' ch'ul c'u'iletic, ja' yu'un c'alal mu'yuc to ta slape, ac'o atinuc lec ba'yuc.

5“Li Aarone ac'o stsac cha'cotuc tentsun ta sventa scotol li israeletique, ja' milbil matanal ta sventa smulic. Xchi'uc ac'o stsac jcotuc chij ta sventa chic'bil matanal. 6Ts'acal ac'o yac' jcotuc ch'ium tot vacax ta sventa stuc li palee. Ja' milbil matanal sventa xch'ayubil smul xchi'uc yajnil xnich'nab. 7Ac'o stsac noxtoc li cha'cot tentsune; ac'o yac'bun ta jtojol te ta ti'ch'ulna pasbil ta nucul. 8Ac'o spas canal tajimol ta sventa li cha'cot tentsune. Jcot ac'o c'otuc ta jventa vu'un li Muc'ul Diosune; jcot chc'ot ta sventa jcuchmulil. 9Li jcot tentsun ti chc'ot ta jtojol, vu'un li Muc'ul Diosune, ac'o smil li Aarone; ja' matanal chc'ot ta sventa mulil. 10Li jcot chc'ot ta sventa jcuchmulile cuxul ac'o yac'bun ta jtojol li palee yu'un jech ch'aybil chc'ot smulic li israeletique. Ts'acal ac'o scolta batel ta xocol banamil yo' bu oy li Azazele.

11“Li Aarone ac'o smil li jcot ch'ium tot vacax ti ja' yu'un stuque, jech ta jch'aybe ta co'nton smul stuc xchi'uc smul yajnil xnich'nab. 12Ts'acal ac'o stsac li xchic'ubil pom nojem ta yac'alil scajleb jmoton te oy ta jtojole xchi'uc cha'jop juch'bil pom ti lec mu yiq'ue; ac'o yich' batel te ta spat yo' bu joc'ol li poq'ue. 13Li pome ac'o yac' ta c'oc' te ta jtojol, jech ac'o macuc ta xch'ayilal pom li smac xcaxail jmantale, jech mu xcham li Aarone. 14Ac'o stsac jutebuc xch'ich'al li ch'ium vacaxe; ac'o svij ta jot sjol li smac caxa ta stuq'uil sloq'ueb c'ac'ale. Xchi'uc ac'o svij ta ch'ich' vucub velta li jot sti' smac caxa ta yelovale. 15Ja'o ac'o smil li tentsune; ja' matanal ta sventa smul li achi'iltaquique. Li xch'ich'ale ac'o yich' batel ta spat yo' bu joc'ol li poq'ue. Te ac'o svij noxtoc ta smac li caxae xchi'uc ta jot sti' ta yeloval, jech chac c'u cha'al tspas ta sventa li xch'ich'al ch'ium tot vacaxe. 16Ja' jech lecubtasbil chcom ta sventa c'usitic chopol li yut ch'ulnae, xchi'uc ta sventa smulic li achi'iltaque. Ja' jech tsc'an pasel noxtoc ta sventa scotol li ch'ulna pasbil ta nucul ti te oy ta stojolic xchi'uc xchopolilique.

17“Ti c'u sjalil te ochem ta ch'ulna sventa chac' ta ch'ayel mulil li Aarone, mu me junuc boch'o te oy ta ch'ulna ti pasbil ta nucule. C'alal me laj xa sc'an ch'aybel smul stuc, xchi'uc smul yajnil xnich'nab, xchi'uc smul scotol li achi'iltaque, 18ac'o loc'uc tal; ac'o bat slecubtas ta ora noxtoc li scajleb jmoton te oy ta jtojole. Ac'o stsac jutebuc li xch'ich'al ch'ium tot vacaxe xchi'uc li xch'ich'al tentsune; ac'o xjaxbe ta xulub xchi'uc ta spat xocon li scajleb jmotone. 19Xchi'uc ac'o svij ta sbic'tal sc'ob vucub velta ta ch'ich' li scajleb jmotone. Jech lecubtasbil chcom o ta sventa yi'lalic li achi'iltaque, jech ts'u'iltasbil chcom o.

20“C'alal me laj xa slecubtasbe yut, xchi'uc scotol ch'ulna pasbil ta nucul, xchi'uc scajleb jmoton li Aarone, ac'o stac ta ich'el li jcot tentsun ti cuxul toe. 21Ac'o yac' xchibal sc'ob ta sjol li tentsune; ac'o yal ta jamal c'usi chopol spasojic, c'u x'elan stoyoj sbaic, xchi'uc c'usi smulic li achi'iltaque. Ja' jech chich' ac'bel xcuch scotol muliletic li tentsune. Jun vinic ac'o yic' batel li tentsune; ac'o bat scolta comel ta xocol banamil. 22Jech te cuchbil o batel smulic ta xocol banamil yu'un li tentsun yo' bu mu'yuc xa boch'o te nacale. 23Ts'acal ac'o ochuc ta ch'ulna pasbil ta nucul li Aarone; ac'o sloc' li sc'u' spoc' la slap sventa ch-och ta ch'ulna pasbil ta nucule; te ac'o sq'uej comel. 24Te no'ox ta yut ch'ulna ac'o atinuc lec. C'alal me laj xa slap sc'u' spoq'ue, ac'o loc'uc tal; ac'o bat xchic' li matanal ta sventa stuque xchi'uc li matanal ta sventa achi'iltaquique. Ja' jech ch'aybil chc'ot smul stuc xchi'uc smulic li achi'iltaquique. 25Li xepual milbil matanal sventa mulile ac'o xchic' te ta scajleb jmoton. 26Li boch'o chbat scolta comel ta xocol banamil li tentsun sventa jcuchmulile, ac'o xchuc' lec sc'u'; ac'o atinuc lec, jech xu' ch-och tal ta acarpanaic.

27“Li ch'ium tot vacax xchi'uc li tentsun ti chich' milel ta sventa mulil, xchi'uc ti chich' ich'bel ochel xch'ich'al ta yut ch'ulna sventa xch'ayubil mulile, ac'o yich' ich'el batel ta spat to ti bu nacaloxuque. Te ac'o yich' chic'bel li snuculile, li sbec'tale, xchi'uc li sbel xch'ute. 28Li boch'o chbat xchiq'ue, ac'o xchuc' lec sc'u'; ac'o atinuc lec, jech xu' ch-och tal ta acarpanaic.

29“Ja' jech jmantal ta xcom o ta atojolic: ta slajunebal c'ac'al yochel li svucubal ue, tsc'an chavictaic ixim. Mu me boch'o spas jchopuc abtel avu'unic, vo'oxuc li israeloxuque xchi'uc li yanlumetic te nacal ta atojolique. 30Yu'un li jun c'ac'al le'e ja' yorail ch'aybil chc'ot amulic ta jtojol, vu'un li Muc'ul Diosune, jech pocbil chacomic ta sventa li amulique. 31Ja' jech jmantal ta xcom o ta atojolic: li jun c'ac'al le'e ja' xcuxubil avo'ntonic chcom o, xchi'uc ja' sventa chavictaic ixim. 32Li pale ti t'ujbil xa sventa ch-och ta xq'uexol stote ac'o spas li c'usi tsc'an pasel ta sventa ch'aybil chc'ot amulique. Ac'o slap li ch'ul c'u'il pasbil ta lino noe; 33ac'o slecubtas li bats'i lequil ch'ul cuartoe, xchi'uc scotol li ch'ulna pasbil ta Nucule, xchi'uc li scajleb jmotone. Xchi'uc ac'o yac' ta ch'aybel smul li paleetique xchi'uc scotol li achi'iltaquique.

34“Ja' jech jmantal chcom o ta atojolic: ja' jun velta ta jujun jabil ac'o yac' ta ch'aybel smulic scotol li achi'iltaquique”, xi li Muc'ul Diose.

Scotol c'usi i'albat yu'un Muc'ul Dios li Moisese ja' jech la spasic.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index