Search form

Levítico 17

Ja' no'ox te ta ch'ulna xu' chich' ac'bel smoton li Diose

1Li Muc'ul Diose la sc'opan yan velta li Moisese, jech laj yalbe:

2“Jech xavalbe li Aarón, xchi'uc xnich'nabe, xchi'uc scotol li achi'iltac ta israelale; vu'un li Muc'ul Diosune, ja' jech chacalboxuc mantal chac li'i:

3“Me oy junuc Israel vinic te ta atojolic ta smil jcotuc vacax, me chij, o me tentsun te ta acarpanaic, o me ta spat to acarpanaic, 4ti muc xich' tal ta ti'ch'ulna pasbil ta nucul sventa chiyac'bun jmotonin, vu'un li Muc'ul Diosune, oy smul chc'ot o ta sventa ti la smal ch'ich'e, ac'o yich' loq'uesel batel ta atojolic. 5Ti jech chich' pasele, yu'un jech ac'o tal yaq'uic ta jtojol ti me oy tsmilic sts'unub yovolic ta buyuc no'ox li achi'iltaque. Yu'un jech ac'o tal yac'beic li pale te ta ti'ch'ulna pasbil ta nucule, jech xu' chiyac'bun ta jtojol. Ja' matanal chc'ot ta sventa lec chquilic li achi'iltaque. 6Li palee ac'o svijbe xch'ich'al ta sba scajleb jmoton te ta nopol ti'ch'ulna pasbil ta nucule. Li xepuale ac'o xchic' sventa lec mu yic' chc'ot ta jtojol, vu'un li Muc'ul Diosune. 7Yu'un jech mu xa ja'uc chbat smilbeic smoton li pucujetic ti ja' to'ox yich'ojic ta muc' chac c'u cha'al sdiosique. Li'i ja' jun mantal chcom o ta atojolic c'alal ta avalab anich'nabic.

8“Jech xavalbe ya'yic noxtoc: Me oy junuc israel vinic, o me yanlum ti te co'ol nacaloxuc achi'uquic ti tsc'an chaq'uic chic'bil, o milbil matanal ta jventae, 9me muc teuc xich'ic tal ta ti'ch'ulna pasbil ta nucule, li boch'o jech tspase, ac'o yich' loq'uesel batel ta atojolic.

I'albatic ti mu xu' tsti'ic ch'ich'e

10“Me oy boch'o ta sti' ch'ich', me israel, o me yanlum ti te co'ol nacaloxuc achi'uquique, ta jcontrain li boch'o jech ta spase. Ta jtu'pbe sts'unubal te ta atojolic. 11Yu'un ja' ta sventa xch'ich'al cuxul li c'usitic cuxajtique. Xchi'uc li ch'ich'e ja' cac'oj ta sventa chich' aq'uel ta scajleb jmoton sventa aq'uexolic yu'un jech mu xachamic li vo'oxuque, yu'un ja' ta sventa ch'ich' tojbil chc'ot ti jech cuxul chacomique.

12“Ja' yu'un jech ono'ox calojbeic li achi'iltac ta israelale: Me junuc mu me boch'o sti' ch'ich' avu'unic, vo'oxuc li israeloxuque, xchi'uc li yanlum te achi'inojic ta nacleje. 13Me oy boch'o junucal avu'unic, me vo'oxuc li israeloxuque, o me yanlum ti tsmil jcotuc chonbolom, o me mutetic ti stac' ti'ele, malbeic li xch'ich'ale; but'ic ta banamil. 14Yu'un ta sventa xch'ich'al cuxulic li c'usitic cuxajtique. Ja' yu'un calojboxuc ti mu xu' chati'beic xch'ich'al li c'usitic chamilique yu'un ja' te cuxulic o ta xch'ich'alic. Li boch'o ta sti'be xch'ich'ale, ac'o yich' loq'uesel ta atojolic, xcut ono'ox li achi'iltaque.

15“Boch'ouc no'ox, me achi'iltac ta israelal, o me yanlum tsti' li c'usi jech no'ox icham stuque, o me scomelal ta ti'el yu'un jti'vanej bolome, ac'o xchuc' lec sc'u'; ac'o atinuc lec, pero chopol chcom o c'alal to ch-och ac'ubal. Ts'acal lec chcom yan velta. 16Pero me mu'yuc ta xchuc' sc'u' xchi'uc me mu'yuc ch-atine, te xcuchoj smul ta xcom o”, xi li Diose.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index