Search form

Levítico 18

Pajesel ta sventa mulivajel

1Li Muc'ul Diose la sc'opan yan velta li Moisese, jech laj yalbe:

2“Jech xavalbe ya'yic li achi'iltac ta israelale:

“Vu'un li Muc'ul Diosun avu'unique.

3“Mu me xapasic jech chac c'u cha'al tspasic li egiptoetic ti bu to'ox lanaquiique.

“Mu me xapasic jech chac c'u cha'al tspasic li canaanetic ti bu chaquic'oxuc batele, xchi'uc mu me xapasic jech chac c'u cha'al chal li mantaletic yu'unique.

4“Ja' ich'ic ta muc' li chanubtasel cu'une; ja' pasic c'usi chal li mantaletic cu'une. Pasilanic me scotol c'ac'al yu'un vu'un Muc'ul Diosun avu'unic.

5“Pasilanic me batel scotol c'ac'al li mantaletic li chanubtaseletic cu'une. Li boch'o ta xch'un yu'une ta xcuxi ta sventa li mantaletique. Jech chcal vu'un li Muc'ul Diosun avu'unique.

6“Me junuc vinic mu me sc'opan jun ants ti ja' yuts' yalale, vu'un li Muc'ul Diosune.

7“Mu me xamulivaj achi'uc ame'ic, yu'un ja' chavuts'inta li atotique, xchi'uc mu xu' jech chapasic yu'un ja' ame'ic.

8“Mu me xac'opanbe yajnil atotic, yu'un chavuts'inta atotic me jech chapasique.

9“Mu me xac'opan avixic, o avixlalic ac'o me ja' xnich'on atotic, o me yol ame'ic, yu'un ja' acha'vix, acha'ixlalic; mu me xac'opan aba achi'uquic.

10“Mu me xac'opan amomnich'onic, me stseb aqueremic, o me stseb atsebic; mu me xachi'in aba achi'uquic. Me jech chapasique, chasoques ac'oplal atuquic.

11“Mu me xac'opanbe stseb atotic ta yan yajnil, yu'un ja' xnich'on atotic, xchi'uc ja' avixic, o me avixlalic, jech mu xu' chachi'in aba achi'uquic.

12“Mu me xac'opan abaic xchi'uc xvix, o me yixlal atotic, yu'un ja' jun xch'ich'alic xchi'uc li atotique.

13“Mu me xac'opanbe xvix, o me smuc ame'ic, yu'un ja' jun xch'ich'alic xchi'uc li ame'ique.

14“Mu me xac'opanbe yajnil ajuntotic, yu'un chavuts'inta ajuntotic me jech chapasique. Mu me xachi'in aba achi'uquic, yu'un ja' ajunme'ic.

15“Mu me xac'opan avalibic, yu'un ja' yajnil aqueremic; mu xu' chachi'in aba achi'uquic.

16“Mu me xac'opanbe yajnil abanquilic, o me avits'inic, yu'un chavuts'inta achi'ilic ta voq'uel me jech chapasique.

17“Mu me xac'opan aba achi'uquic jun ants xchi'uc stseb, xchi'uc mu me xavic'beic syal'ol, me xnich'on squerem, o me yol stseb li antse. Me jech chapasique, bats'i toj ven chopol ta jyalel, yu'un jun xch'ich'alic xchi'uc.

18“Mu xavic'beic smuc avajnilic; mu me xachi'in aba achi'uquic ti c'alal cuxul to li avajnilique yu'un jech mu xlic scontrain sbaic.

19“Mu me xachi'in avajnilic ti c'alal ja'o yorail ta xil jujun ue.

20“Mu me xac'opanbe yajnil achi'ilic, mu me xasoques abaic ta sventa.

21“Mu xachic' anich'onic ta smoton dios Moloc, yu'un ta soc o jc'oplal avu'unic, vu'un li Muc'ul Diosune.

22“Mu me xachi'in aba achi'uc achi'ilic ta vinical jech chac c'u cha'al chachi'inic li antsetique. Le'e bats'i toj ven chopol me jech chapasique.

23“Mu me xachi'in aba achi'uquic chonbolometic, yu'un chabolibtas abaic me jech chapasique. Jech ec li antsetique mu me xac' sbaic ta chi'inel yu'un chonbolometic. Li boch'o jech tspas chac le'e, bats'i chopol ta jyalel.

24“Mu me xasoques abaic ta sventa ti jech muliletic chac le'e, yu'un ja' jech sbolibtasoj sbaic li yanlum cristianoetic ti ta to jnuts loq'uel ta atojolique. 25Li banamil bu nacalique boliben o yu'unic. Ta jchapan ta sventa ti jech tspasique, jech ta xetaatic loq'uel yu'un li banamile. 26Pero vo'oxuc li israeloxuque xchi'uc li yanlum ti te co'ol nacaloxuc achi'uquique, ja' me pasilanic batel li mantaletic, li chanubtaseletic cu'une; mu me xapasic li c'usitic toj chopol jech chac c'u cha'al tspasique. 27Yu'un ja' jech tspasic li boch'otic te nacajtique yu'un mu'yuc to'ox chac'otic li vo'oxuque, jech boliben o yu'unic li banamile. 28¡Mu me xapasic jech, naca me xetaoxuc loq'uel ec li banamil jech chac c'u cha'al tspasbatic li cristianoetic te nacalique! 29Li boch'o ta spas li c'usi toj chopol jech chac le'e, ac'o yich' loq'uesel batel ta atojolic. 30Ja' yu'un ja' me pasilanic batel li mantaletic li chanubtaseletic cu'une. Mu me ja'uc xapasic li c'usitic toj chopol tspasic ti c'alal mu'yuc to te oyoxuque. Mu me xabolibtas abaic yu'un vu'un li Muc'ul Diosun avu'unique”, xi li Muc'ul Diose.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index