Search form

Levítico 19

Mantaletic ta sventa c'usi lec c'usi tuc' ta spasel

1Li Muc'ul Diose la sc'opan yan velta li Moisese, jech laj yalbe:

2“Jech xavalbe ya'yic scotol li achi'iltac ta israelale:

“Tuc'uc me avo'ntonic, yu'un vu'un li Muc'ul Diosun avu'unique tuc' co'nton.

3“Jujunoxuc ich'ic ta muc' li atot ame'ique.

“Chabiic me li sc'ac'alil chacux avo'ntonique, vu'un li Muc'ul Diosun avu'unique.

4“Mu me xbat avich'ic ta muc' yan velta li yantic diosetique. Mu me xapas sloc'obal adiosic ta unijesbil taq'uin. Vu'un li Muc'ul Diosun avu'unique.

5“C'alal chavac'bicun milbil matanal sventa co'ol co'ntontique, ja' me xavaq'uic ti c'u cha'al xu' lec tsacbil chc'ot cu'un, vu'un li Muc'ul Diosune. 6Li matanal chavaq'uique ac'o yich' ti'el ta yorail no'ox, xchi'uc ta yoc'omal. Me icomelaj ta sventa yoxibal c'ac'ale, ac'o xa yich' chiq'uel. 7Me ta to xich' ti'el ta yoxibal c'ac'ale, chopol xa chcom o; mu'yuc xa ta jtsac. 8Li boch'o la sti'e oy smul chcom o, yu'un la soques li c'usi voc'bil xa ta jtojol, vu'un li Muc'ul Diosune. Ac'o yich' loq'uesel ta atojolic.

9“C'alal tsta yorail chatuch' atrigoique, mu me solel xquechetuc xatuch'ic, xchi'uc mu me xbat acha'q'uelic ti butic icome. 10Jech noxtoc mu me xbat ac'uxc'ultabeic sat li ats'usubique, xchi'uc mu xa me xatamic li butic bajemique. Te ac'o comuc ta sventa me'onetic xchi'uc ta sventa yanlumetic. Vu'un li Muc'ul Diosun avu'unique.

11“Mu me xa'elc'ajic. Mu me xa'epalc'opojic; mu me xalo'la abaic.

12“Mu me xat'abic jbi ta sventa li c'usi chavalique, yu'un xu' jech chasoquesbicun o jc'oplal, vu'un li Muc'ul Diosune.

13“Mu me toj simaronuc xapas abaic ta stojol achi'ilic; mu me xapojbeic c'usi oy yu'un.

“Mu me xamacbeic stojol aviniquic yu'un ta yoc'omal to chavac'beic.

14“Mu me xachopolc'optaic li boch'o coque.

“Mu me c'usi xavac'beic ta sbe sventa tsbosi yacan avu'unic li ma'satetique. Xi'anic me yu'un li Dios avu'unique, vu'un Muc'ul Diosun.

15“Mu me chopoluc xachapanvanic. Mu me ja'uc xapojic li me'one; mu me ja'uc xavich'ic ta muc' li jc'uleje. Tuc' me xachapanic li achi'iltaquique.

16“Mu me xalo'ilta batel achi'ilic.

“Mu me xachapanbe sc'oplal achi'ilic yu'un chamilic. Jech chcal vu'un li Muc'ul Diosune.

17“Mu me stsoq'uetuc no'ox avo'ntonic yu'un li achi'ilic ta voq'uele.

“Taq'uio lec li achi'ilic ti c'alal jech tsc'ane, yu'un jech mu xamaquibe ec li smule.

18“Mu me tojtoj paqueluc avu'unic li c'usi chapasbatique; mu me tojtoj ilineloxuc no'ox ta stojol li achi'iltaquic ta israelale. C'ano achi'il jech chac c'u cha'al c'ux ta avo'nton abec'tal atuc, yu'un vu'un Muc'ul Diosun.

19“Pasilanic me batel li mantaletic cu'une.

“Mu me xavac' stec' sbaic avacaxic xchi'uc yan ats'unub avovolic ti mu jmojicuque.

“Mu me capvots'uc xapasic li ats'unubique.

“Mu me xalapic li c'u'il me oy c'usi yan capbil o ta jalele.

20“Me oy boch'o ta xchi'in sba xchi'uc jun quiara ti jac'bil xa yu'un jun vinique, pero me mu'yuc to tojbil, xchi'uc me mu'yuc coltabil batele, ac'o stoj smulic, pero mu'yuc chich'ic milel yu'un mu'yuc to coltabil batel li antse. 21Li vinique ac'o yic'bun tal jcotuc chij te ta ti'ch'ulna pasbil ta nucul; ja' matanal ta sventa li smul la stae. 22Li palee ac'o yac' ta ch'aybel smul li vinic ta sventa li jcot chij chaq'ue. Jech ch'aybil smul chc'ot li vinique.

23“C'alal me la'ochic xa batel ta avosilalique, me laj ats'unic te'etic ti stac' lo'bel sate, oxib jabil mu xu' chatul alo'ic. 24Ta xchanibal jabile voc'bil xa chcom o ta sventa chavich'icun ta muc'; vu'un li Muc'ul Diosune. 25Ta yo'bal jabile xu' xa chalo'beic li sate, jech chac' lec sat li ts'unubaltic avu'unique. Jech chcal, vu'un li Muc'ul Diosun avu'unique.

26“Mu me xati'ic xchi'uc xch'ich'al li c'usi chati'ique.

“Mu me xachanic t'unul; mu me xanopic ti xana'ic c'usi chc'ot ta pasel le' to batele.

27“Mu me quepquepuc xaloc' li ajolique, xchi'uc mu me xatuch'beic sni'ni' li avisimique.

28“Mu me xayayijes abec'talic ta scoj me oy boch'o ichame. Mu me xats'ibta anuculilic sventa senyail. Jech chcal vu'un li Muc'ul Diosune.

29“Mu me xavaq'uic pasuc ta jmulavil ants li atsebique yu'un chabolibtasic. Mu me xavaq'uic socuc li alumalique; mu me xanojesic mulil.

30“Ich'ic me ta muc' li sc'ac'alil chacux avo'ntonique. Ich'ic me ta muc' li ch'ulna cu'une. Vu'un li Muc'ul Diosune.

31“Mu me c'usi xbat ajaq'uic ta stojol li j'ic'ch'ulelaletique xchi'uc li jt'unuletique. Mu me xabolibtas abaic ta scojic. Yu'un vu'un Muc'ul Diosun avu'unic.

32“Va'ano me abaic; ich'ic me ta muc' li moletique. Ich'icun ta muc'; Vu'un li Muc'ul Diosun avu'unique.

33“Mu me ilbajuc xavilic li yanlumetic te co'ol nacaloxuc achi'uquique. 34Cuyic jech chac c'u cha'al mero achi'ilic ta israelal, c'anic lec jech chac c'u cha'al ac'anoj abaic li vo'oxuque. Yu'un ja' jech yanlum c'otemoxuc ec ti c'alal te to'ox oyoxuc ta Egiptoe, vu'un li Muc'ul Diosune.

35“Mu me xapasic manya ti c'alal chabis avosilique xchi'uc li c'usiuc no'ox chabisique. 36Lec tuc', lec chapal, lec staoj xabisic. Vu'un Muc'ul Diosun avu'unic ti la jloq'uesoxuc tal ta Egiptoe.

37“Ch'unic me, pasic me li mantaletic, li chanubtaseletic cu'un, vu'un li Muc'ul Diosune”, xi li Muc'ul Diose.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index