Search form

Levítico 2

Sc'oplal c'u x'elan chaq'uic ta smoton Dios strigoic xchi'uc c'usitic yan jech chac c'u cha'al trigo

1“C'alal me oy boch'o chich'bun tal jmotonin li strigo xchi'uc c'usitic yan jech chac c'u cha'al trigoe, ja' ac'o yich'bun tal arina ti bu ven leque. Ac'o yac'beic aceite xchi'uc pom. 2Ac'o yich' batel ta stojol li paleetique, ja' li xnich'nabtac Aarone. Jun pale ac'o sjop batel jopuc ta sc'ob li arina capal ta aceite xchi'uc pome. Ac'o xchic' te ta scajleb jmoton sventa sc'anubil vocol ta stojol li boch'o laj yaq'ue; ja' chic'bil matanal chc'ot ta jtojol ti lec mu yiq'ue, vu'un li Muc'ul Diosune. 3Ta sventa ti ts'u'iltasbil xa scotol li c'usitic chich' chiq'uel ta jmoton vu'un li Muc'ul Diosune, ja' yu'un li scomelale, ja' yu'un li Aarón xchi'uc xnich'nabtaque. 4“C'alal chavac'bicun jmotonin li atrigoic xchi'uc c'usitic yan jech chac c'u cha'al trigo ti ta'ajem xa ta hornoe, ja' xavac'bicun li pan pasbil ta lequil arina vots'bil ta aceite ti mu'yuc yich'oj svolesubil xch'ute, o me bic'tal vaj vijbil ta aceite.

5“Pero me ja' chavac'bicun atrigoic ti ta'ajem ta xalteme, ja' xavaq'uic li lequil arina vots'bil ta aceite ti mu'yuc yich'oj svolesubil xch'ute. 6Voq'uilanic ta jayvoc'. Vijic ta aceite yu'un ja' jmoton sventa atrigoic xchi'uc c'usitic yan jech chac c'u cha'al trigo.

7“Me ja' chavac'bicun atrigoic xchi'uc c'usitic yan jech chac c'u cha'al trigo ti panbil ta jayil lume, ja' xavaq'uic ti bu pasbil o ta lequil arina xchi'uc aceitee. 8C'alal me chapal xa avu'unic li matanaletic jech chac le'e, ich'ic tal ta jtojol. Ac'beic ta sc'ob li palee; ac'o bat yac' te ta scajleb jmoton. 9Li palee ac'o stsac c'uuc yepal li matanale; ac'o xchic' te ta scajleb jmoton. Ja' sventa sna'ubil cu'un li achi'iltaque. Ja' chic'bil matanal ti lec mu yic' chc'ot ta jtojol, vu'un li Muc'ul Diosune. 10Ta sventa ti ts'u'iltasbil xa scotol li c'usitic chich' chiq'uel ta jmoton vu'un li Muc'ul Diosune, ja' yu'un li scomelale, ja' ac'o yich'ic li Aarón xchi'uc xnich'nabtaque. 11“Li matanaletic ti co'oltic jech chac c'u cha'al trigo chavac'bicun, vu'un li Muc'ul Diosune, mu me xavac'beic svolesubil xch'ut yu'un mu xu' chachic'bicun jmotonin li c'usi yich'oj svolesubil xch'ute, xchi'uc li spom muc'ta pome. 12Ja' no'ox xu' chavac'bicun li svolesubil xch'ut, xchi'uc spom muc'ta pom me ja' sventa sba c'usitic chloc' avu'unique. Pero mu xu' chich' chiq'uel te ta scajleb jmoton jech chac c'u cha'al chich' chiq'uel jmoton ti lec mu yiq'ue.

13“Scotol li c'usitic chavac'bicun jmotonine ac'beic yats'amil. Mu me xapasic jech ti mu'yuc chavac'beic yats'amil li jmoton chavaq'uique. Yu'un li ats'ame ja' senyail li c'usi chapanbil cu'un, vu'un li Diosun avu'unique. Scotol li atrigoic chavac'bicun jmotonine ac'beic yats'amil.

14“Me ja' chavac'bicun li sba sat atrigoic xchi'uc li c'usitic yan jech chac c'u cha'al trigoe, bacubtasic ta c'oc' li jujulic c'alal yox toe. Yan me sbec' chavich'ic tale juch'bil ta tse xavich'ic tal. 15Ac'beic yaceiteal xchi'uc pom yu'un ja' sventa jmoton. 16Li palee ac'o xchic' c'uuc yepal li juch'bil trigo xchi'uc aceite, xchi'uc li pome. Ja' sventa sna'ubil israeletic chc'ot, xchi'uc ja' chic'bil matanal chc'ot ta jtojol, vu'un li Muc'ul Diosune.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index