Search form

Levítico 20

Stojol mulil ta sventa boch'o mu xch'un mantal

1Li Muc'ul Diose la sc'opan yan velta li Moisese, jech laj yalbe:

2“Jech xavalbe ya'yic li achi'iltac ta israelale:

“Boch'ouc no'ox, me israel, o me yanlum ti te nacal ta Israele, me ta xac' xnich'on ta smoton li dios Moloque, ac'o yich' milel ta ton yu'un li achi'iltaquic te ta avosilalique. 3Li vu'une ta jcontrain li boch'o jech tspase; ta xcules te ta atojolic yu'un tsoques li ch'ulna cu'une, xchi'uc tsoquesbe sc'oplal jch'ulbi ta sventa ti chac'be smotonin Moloc li xnich'one. 4Pero me mu sventaicuc li achi'iltaquique, me mu smilic li vinic ti chac' ta smoton Moloc li xnich'one, 5vu'un jtuc ta jcontrain xchi'uc yajnil xnich'nab li vinique. Ta jloq'ues o te ta atojolic xchi'uc scotol li boch'otic co'ol chopol c'usitic tspasic xchi'uque, ti ja' chbat yich'ic ta muc' li Moloque. 6Me oy boch'o ta xbat ta stojol li j'ic'ch'ulelaletic xchi'uc jt'unuletique, laj xa xch'ay sbaic o. Ta jcontrain li boch'o jech tspase; ta jloq'ues o ta atojolic.

7“Tuq'uibtaso me abaic, jech tuc' chac'otic ta jtojol; vu'un li Muc'ul Diosun avu'unique. 8Ch'unic me, pasilanic me c'usi chal li mantaletic cu'une; vu'un Muc'ul Diosun ti voc'biloxuc cu'une.

9“Li boch'o chchopolc'opoj ta stojol stot, o me sme'e, ac'o yich' milel. Ta sventa ti ichopolc'opoj ta stojol stot, o me sme'e, ja' yu'un ja' ta smul stuc ti chchame.

10“Me oy boch'o tsc'opanbe yajnil xchi'ile, ac'o yich' milel li vinic xchi'uc li antse.

11“Me oy boch'o ta xchi'inbe yajnil stote, laj xa yuts'inta li stote. Ta sventa ti jech la spase, ac'o yich' milel li vinic xchi'uc antse; ja' ta smul stuquic ta xchamic.

12“Li boch'o ta xchi'in yalibe, ac'o yich' milel xchibalic. Ja' ta smul stuquic ta xchamic, yu'un toj chopol ti jech tspasique.

13“Li boch'o ta xmulivaj ta xchi'il no'ox sbaic ta vinical jech chac c'u cha'al ta xchi'in sbaic xchi'uc jun antse, ac'o yich' milel xchibalic. Ja' ta smul stuquic ta xchamic, yu'un toj ven chopol ta jyalel ti jech tspasique.

14“Li boch'o ta xic' jun tseb xchi'uc sme'e, toj chopol li c'usi tspasique; cuxul ac'o yich'ic chiq'uel yoxibalic, yu'un jech mu x'epaj te ta atojolic li c'usi toj chopole.

15“Me oy jun vinic ta xchi'in sbaic xchi'uc jcot chonbolome, ac'o yich' milel li vinique. Jech noxtoc ac'o yich' milel ec li chonbolome.

16“Me oy jun ants ta xchi'in sbaic xchi'uc jcot chonbolome, li ants xchi'uc li chonbolome ac'o yich'ic milel. Ja' ta smul stuquic ta xchamic.

17“Me oy boch'o ta xic' yixlal, o me xvixe, ac'o me stseb stot, o me stseb sme', me la xchi'in sbaique, xchibalic ac'o yich'ic milel ta sat scotol li achi'iltaque, yu'un toj q'uexlal sba ta sventa ti la xchi'in sbaic xchi'uc yixlale, jech ta smul stuquic ta xchamic.

18“Me oy boch'o ta xchi'in jun ants c'alal yorail chil jujun ue, laj xa yac' ta q'uexlal li antse. Jech ec li antse laj yac' sba ta q'uexlal stuc, ja' yu'un ac'o yich'ic loq'uesel ta atojolic.

19“Mu me xac'opanbe yixlal atotic, o me smuc ame'ic, yu'un li boch'o ta xchi'in yuts' yalale te xcuchoj smul chcom xchibalic.

20“Me oy boch'o ta sc'opanbe yajnil sjuntote, ta xuts'inta li sjuntote. Li boch'o jech tspase, te xcuchoj smul chcom xchibalic: mu'yuc yol xnich'onic o c'alal chchamic.

21“Li boch'o ta spojbe yajnil xchi'il ta voq'uele, ta xuts'inta li xchi'il ta voq'uele. Le'e toj chopol ti jech tspase, jech mu'yuc yol xnich'onic chcomic o.

22“Pasilanic me li mantaletic, li chanubtaseletic cu'une; ch'unic me scotol yu'un jech mu xasnutsoxuc loq'uel li banamil bu chbat cac' naclanique. 23Mu me xachanic c'usi tspasic li yantic lumetic ta jnuts loq'uel ta atojolique, yu'un li stuquique ja' jech tspasic jech chac c'u cha'al laj calboxuque, ja' yu'un mu sts'ic cu'un ti jech tspasique. 24Ja' yu'un laj calboxuc ti vo'oxuc chavich'beic li yosilalique. Vu'un jtuc chacac'boxuc ta ac'obic li banamil le'e; ja' ti bu ta xloc' ep ya'lel xchu' vacax xchi'uc pom jech chac c'u cha'al chloc' vo'e.

“Vu'un Muc'ul Diosun avu'unic ti la jt'ujoxuc loq'uel ta stojol yantic lumetique. 25Ja' yu'un li vo'oxuque t'ujic me ec li chonbolometic stac' ti'ele xchi'uc ti bu mu stac' ti'ele. Mu me xabolibtas abaic ta scoj li chonbolometic, li mutetic, li c'usi xquilet ta banamil chanovic ti calojboxuc mu stac' ti'ele. 26Ja' yu'un tuc' me xapas abaic ta jtojol, yu'un vu'un li Muc'ul Diosune tuc' co'nton. Vu'un la jt'ujoxuc loq'uel ta stojol li yantic lumetique, yu'un jech jteclumal chac'otic.

27“Me oy jun vinic, o me ants ti xchanoj ic'ch'ulelale xchi'uc ti chchan xa t'unule, ac'o yich' milel ta ton. Ja' ta smul stuquic ta xchamic”, uto li achi'iltaque, x'utat yu'un Dios li Moisese.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index