Search form

Levítico 21

Mantaletic ta sventa paleetic

1Li Muc'ul Diose jech laj yalbe li Moisese:

“Albo li paleetic, xnich'nabtac Aarone, mu me xbat scap sbaic ta sq'uelel me oy chcham junuc yuts' yalale yu'un ta soques sbaic me jech tspasique. 2Ja' no'ox xu' chbat sq'uel li boch'o mero xchi'il ta voq'uele, me stot, o me sme', me squerem, o me stseb, me sbanquil, o me yits'in, 3me xvix, o me yixlal ti te co'ol nacal xchi'uc ti mu'yuc to malijeme. Xu' chbat sq'uel, ac'o me te ta soc ta sventa. 4Pero mu xu' chbat soques sbaic ta sventa boch'ouc no'ox.

5“Mu me xjux sjolic; mu me setbe sni'ni' yisimic, xchi'uc mu me bu xyayij sbec'talic. 6Ch'ul vinic ac'o spas sbaic o ta jtojol yu'un jech mu soquesbicun jc'oplal. Yu'un ja' oy ta sventaic chchiq'uic li matanaletique xchi'uc chaq'uic li pan te ta jtojole, ja' yu'un ta jc'an ti ch'ul vinic chcomic o ta jtojole.

7“Mu me xnupin xchi'uquic jmulavil ants, xchi'uc ti bu c'opanbil xa ta vinique, xchi'uc ti bu ictabil yu'un smalale, yu'un voc'bilic o cu'un, vu'un li Diosune. 8Voc'bil ac'o comicuc o ta sventa scotol, yu'un ja' oy ta sventaic chaq'uic li pan te ta jtojol, vu'un li Diosune. Jech tsc'an ch'ul viniquetic ac'o comicuc o ta atojolic ec, yu'un vu'un ti la jts'u'iltasique, ch'ul Muc'ul Diosun.

9“Me oy stseb jun pale ti chlic mulivajuc jech chac c'u cha'al jun jmulavil antse, cuxul ac'o yich' chiq'uel ta c'oc' yu'un laj xa soquesbe sc'oplal li stote.

10“Li banquilal paleetique oy ta sventaic xu' tslapic li ch'ul c'u'iletique yu'un laj xa yich' malbel ta sjolic li aceite sventa ich'ub abtelale. Ja' yu'un tsc'an ti mu me sloq'uesic li xpix sjolique, xchi'uc mu me sli' sc'u'ic ta sventa me oy boch'o chcham yu'unique. 11Mu xu' ch-ochic ti bu oy animae, ac'o me stot, me sme'; mu xu' tsbolibtas sbaic o. 12Jech noxtoc mu xu' chloq'uic o ta ch'ulna; mu xu' tsoquesbeic sc'oplal li ch'ulna cu'une yu'un malbil xa ta stojolic li aceite sventa ich'ub abtelal avu'unique.

13“C'alal ta sa' yajnilique, tsc'an ja' ac'o yiq'uic ti bu stsebal toe. 14Mu me xiq'uic jun me'on ants, me ictabil ants, me c'opanbil ta vinic, o me jmulavil ants. Tsc'an ja' ac'o yiq'uic ti bu stsebal toe, ti bu co'ol liquem sts'unubalic xchi'uque. 15Yu'un jech mu chopoluc sc'oplalic xnich'nabtac xchi'uc smomnich'nabtaquic te ta stojol li xchi'iltaque. Yu'un vu'un li Muc'ul Diosune, vu'un la jts'u'iltasic jech voc'bil chcomic o ta jtojol”, xi li Muc'ul Diose.

Ja' no'ox xu' chac'beic smoton Dios li paleetic ti lec chapal sbec'talique

16Li Muc'ul Diose la sc'opan yan velta li Moisese, jech laj yalbe:

17“Jech xavalbe ya'ay li Aarone: Li' ta ora, xchi'uc le' to batele mu me xac'be yabtel smomnich'nabtac sventa chtal yaq'uic pan ta jtojol ti me mu'yuc lec sbec'talique. 18Me junuc mu me xnopaj tal ti me mu'yuc leque: me ma'sat, me coxo, me mu'yuc lec xchiquin, o me sni', 19me c'asem yacan, o me sc'ob, 20me vucvuc spat, me ven comcom, me oy toc ta sat, me tabil ta ch'inin, me mu'yuc lec snuculil, o me t'usem sbec' sc'unilique. 21Me oy jech mu'yuc chapal sbec'tal li smomnich'nabtac Aarone, mu me xtal xchiq'uic matanal li' ta jtojol. Me oy c'usi soquem yu'unique, mu xu' chtal yac' pan ta jtojol, vu'un li Diosune. 22Xu' tsve' li pan ac'bil ta jtojole, xchi'uc li yantic ch'ul matanaletique, xchi'uc li bats'i lequil ch'ul matanaletique. 23Ja' no'ox mu xu' ch-ochic batel te ta spat li veloe, xchi'uc mu xu' ta xnopajic ta sts'el li scajleb jmotone yu'un xu' tsoquesic jch'ulna ta sventa ti mu'yuc lequique. Yu'un li paleetique voc'bilic cu'un. Vu'un li Muc'ul Diosune”, x'utat li Moisese.

24Scotol li c'usi laj yich' albel Moisese, laj yalbe ya'ay li Aarón xchi'uc xnich'nabe, xchi'uc scotol li israeletique.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index