Search form

Levítico 22

Li paleetique tsc'an lec oyic c'alal chac'beic ch'ul matanal li Diose

1Li Muc'ul Diose la sc'opan yan velta li Moisese, jech laj yalbe:

2“Albo ya'ay Aarón xchi'uc xnich'nab ti ac'o sq'uel sbaic lec ta sventa li ch'ul matanaletic chaq'uic achi'iltaquic ti svoc'ojbicun xa oe, yu'un jech mu soquesic sc'oplal jch'ulbi vu'un li Muc'ul Diosune.

3“Jech xavalbe ya'ay: Li' ta ora, xchi'uc le' to batele, me oy junuc smomnich'nab mu'yuc lec ti c'alal chtal yac' ta jtojol li ch'ul matanaletic yac'ojbicun achi'iltaque, ac'o yich' loq'uesel o ta jtojol; vu'un li Muc'ul Diosune.

4“Me oy junuc smomnich'nab Aarón ip cha'ay c'a'el chamel, o me oy c'usi chloc' ta sbec'tale, mu xu' tsti' li ch'ul matanaletique; ja' to xu' tsti' me laj yich' lecubtasele.

“Me oy boch'o ta spic li c'usi soquem ta scoj junuc animae, o me ta spic jun vinic ti oy c'usi tsjelubtase, 5o me ta spic li boch'o mu'yuc xa lec ta sventa ti spicoj jcotuc chone, o me ta spic jun vinic ti mu'yuc lec ta scoj ti oy bu la soques sbae, li boch'o jech la spique chopol ta xcom o ec. 6Jech chopol chcom o c'alal to ta bat c'ac'al. Mu xu' tsti' li c'usi ts'u'iltasbil cu'un ti me mu'yuc to atineme. 7Ja' to lecuben chcom c'alal me ich'ay c'ac'ale; xu' xa tsti' li c'usi ts'u'iltasbil cu'une yu'un ja' ono'ox sve'elic. 8Me oy c'usi jech no'ox chcham stuque xchi'uc me scomelal xa ta ti'el yu'un jti'vanej bolome, mu xu' ta sti'ic yu'un jech mu soques sbaic ta sventa. Jech chcal vu'un li Muc'ul Diosune.

9“Albo ya'yic ti ac'o me xch'unic li jmantaltaque yu'un jech mu sta smulic ta jtojol, jech mu xchamic yu'un voc'bilic cu'un; vu'un li Muc'ul Diosune.

10“Mu'yuc boch'o yan xu' tsti' li c'usi ts'u'iltasbil cu'une.

“Me jvayna yu'un li palee, o me svinic ta abtel, mu xu' tsti' li c'usi ts'u'iltasbil cu'une.

11“Me oy smozo ti manbil yu'un li palee, xu' tsti' li c'usi ts'u'iltasbil cu'une. Jech noxtoc li boch'otic te voq'uemic ta sna li palee, xu' te tsti'ic ec li sve'el palee.

12“Me oy stseb jun pale malijem ta yan vinic ti yan o bu liquem sts'unubale, mu xu' tsti' li ch'ul matanal chich'ic ac'bel li paleetique. 13Yan me ja' me'on ants, o ictabil yu'un smalal ti mu'yuc yalab, ti co'ol chac c'u cha'al stsebal tsut batel ta sna stote, xu' tsti'be sve'el li stote. Ja' no'ox mu xu' tsti' li boch'o yan bu liquem tale.

14“Me oy boch'o ta sve' ti muc sna' me ja' li c'usi ts'u'iltasbil cu'une, ac'o xq'uextabe sutel li palee, xchi'uc ac'o to yac' yan jun ta vo'vo'. 15Li paleetique mu me xaq'uic soquesic achi'iltaquic li c'usitic lecubtasbil xa cu'un ti chtal yac'bicun ta jtojole. 16Yu'un chac'be sta smulic ta jtojol me chac'be sve'ic li c'usi ts'u'iltasbil cu'une; vu'un Muc'ul Diosun”, xi li Muc'ul Diose.

Mantaletic ta sventa c'u x'elan sts'unub yovolic xu' chaq'uic smoton Dios

17Li Muc'ul Diose la sc'opan yan velta li Moisese, jech laj yalbe:

18“Jech xavalbe ya'yic li Aarón, xchi'uc xnich'nabe, xchi'uc scotol li achi'iltaque: Me oy jun israel, o me yanlum te achi'inojic ta naclej ti chtal yaq'uic jmoton sventa chich' chiq'uel yu'un its'aqui xa yu'unic li c'usi yalojic ta jtojole, o me matanal ti yutsil no'ox yo'nton chtal yaq'uique, 19ja' ac'o yich' tal ti bu ven leque, yu'un jech xu' ta jtsac. Ja' ac'o tal yaq'uic li tot vacaxe, li tot chije, o li tot tentsune, 20pero tsc'an ja' ti bu ven leque, yu'un jech xu' ta jtsacbeic.

21“Jech noxtoc me oy boch'o chtal yaq'uic jmoton sventa lec chquilique, o me sventa its'aqui xa yu'un li c'usi yaloj tspasique, o me ja' li jmoton ti yutsil no'ox yo'nton chaq'uique, ja' no'ox ac'o yiq'uic tal vacax, o me chij ti ven leque yu'un jech ta jtsacbeic. 22Mu me ja'uc xaq'uic li ma'sate, ti tuch'ultic sbae, ti mu'yuc lec yoc sc'obe, ti oy xch'ocale, ti oy ch'inin ta sbec'tale, ti oy xchamel snuculilique. Xchi'uc mu me xaq'uic sventa chich' chiq'uel te ta scajleb jmoton; vu'un li Muc'ul Diosune. 23Li jmoton ti ta yutsil yo'nton chaq'uique, xu' chiq'uic tal jcotuc tot vacax, o tot chij ti bu mu co'oluc snatiquil yoc sc'obe. Pero me ja' jech chich'ic tal ta sventa tsts'aqui yu'unic spasel c'usi yalojic ta jtojole, mu'yuc ta jtsacbeic. 24Jech noxtoc mu xu' chich'bicun tal jmotonin sts'unub yovolic me tuch'emic, o me t'usem sbec' sc'unilic, o me pasbilic ta capone. Le'e mu me jechuc xapasic te ta avosilalic. 25Jech noxtoc mu me xatsaquic me ja' jech x'elan chtal yac'boxuc ve'lil chtun te ta ch'ulna avu'unic li yanlumetique yu'un mu'yuc lequic, jech mu'yuc ta jtsac”, xi li Muc'ul Diose.

Mantaletic ta sventa c'u x'elan tsmilic matanaletic

26Li Muc'ul Diose la sc'opan noxtoc li Moisese, jech laj yalbe:

27“C'alal me oy chvoc' avacaxic, achijic, o me atentsunique, vucub c'ac'al te ac'o chu'untasatuc yu'un sme'. Te xlic batel ta xvaxquibal c'ac'ale xu' xa chich' chiq'uel ta sventa jmoton; tsacbil xa chc'ot.

28“Mu me ta junuc no'ox sc'ac'alil xamilic xchi'uc yol li avacaxic, o achijique.

29“C'alal chavac'bicun jmoton sventa oy c'usi chatojbicun ta vocole, ja' me jech xapasic jech chac c'u cha'al tsc'an pasel ta sventa lec tsacbil chc'ote. 30Jech noxtoc, ti'anic te no'ox ta yorail. Mu xa me xacomtsanic ta sventa yoc'omal. Vu'un Muc'ul Diosun.

31“Pasilanic me, ch'unic me scotol li mantaletic cu'une; vu'un li Muc'ul Diosune.

32“Mu me xasoquesbeic sc'oplal li jch'ulbie, yu'un jech chvinaj ti ch'ul Diosun o te ta atojolic, vo'oxuc li israeloxuque. Vu'un Muc'ul Diosun ti voc'biloxuc o cu'une. 33Xchi'uc vu'un la jloq'uesoxuc tal ta Egipto jech vu'un Diosun chic'ot o avu'unic”, xi li Muc'ul Diose.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index