Search form

Levítico 24

Aceite sventa candiletic

(Ex 27.20-21)

1Li Muc'ul Diose la sc'opan yan velta li Moisese, jech laj yalbe:

2“Albo scotol achi'iltac ti ac'o yich'ic tal mero yaceiteal olivaetic sventa candiletic yu'un tsc'an te tsanal o scotol c'ac'al. 3Ja' oy ta sventa chchapan li Aarone yu'un jech te ac'o tsanaluc o scotol c'ac'al ta jtojol te ta ch'ulna pasbil ta nucul ta sc'al li velo ta sts'el xcaxail jmantale. Li'i ja' jun mantal chcom o ta atojolic c'alal ta avalab anich'nabic. 4Jech noxtoc ja' oy ta sventa chchapan lec li candiletic ta candelero pasbil ta c'anal taq'uine yu'un jech te tsanaluc o ta jtojol.

Sc'oplal pan ac'bil ta stojol Dios

5“Pasic lajchabuc (12) pan ta arina ti bu ven leque; ja' o'lol yo'bal kilo arina xapasic li jujun pane. 6Te xavaq'uic ta ba mexa ti pasbil ta c'anal taq'uin te oy ta jtojole. Cha'chol xavaq'uic, vacvac yich'oj sba jujuchol. 7Ta jujuchol li pane aq'uic bats'i pom ta sba yu'un jech lec mu yic'; ja' jech chac c'u cha'al chic'bil matanal chc'ot ta jtojol ta sventa sna'ubil li israeletique. 8Ta jujun sc'ac'alil chacux avo'ntonique te me xavaq'uic o scotol c'ac'al li pan ta jtojol, vu'un li Muc'ul Diosune. Ja' jech chapal chcom o ta atojolic, vo'oxuc li israeloxuque. 9Li pane ja' yu'unic o li Aarón xchi'uc xnich'nabe. Te no'ox ac'o sve'ic ta ch'ul banamil, yu'un li matanaletic chich' chiq'uel ta jventae ja' bats'i lequil ch'ul matanal c'otem”, xi li Muc'ul Diose.

Stojol smulic boch'otic chopol chc'opojic ta stojol Dios

10-11Oy jun vinic te ta stojol li israeletique, ja' Egipto vinic li stote. Yan li sme'e ja' israel ants; Selomit sbi li antse. Ja' stseb jun vinic Dibri liquem ta jchop yu'un Dan. Li yol israel antse laj yut sbaic xchi'uc jun israel vinic te ta scarpanaic. Li yol israel antse la xchopolc'optabe sbi li Muc'ul Diose. Jech te laj yiq'uic batel ta stojol li Moisese. 12Te to la stiq'uic ta chuquel, yu'un ta smalaic albel yu'un Muc'ul Dios c'usi xu' tspasbeic li vinique. 13Li Muc'ul Diose la sc'opan li Moisese, jech laj yalbe:

14“Loq'uesic batel te ta acarpanaic li boch'o ichopolc'opoje. Li boch'otic laj ya'yic c'usi laj yale ac'o yac' sc'obic ta sjol. Ac'o smilic ta ton scotol li achi'iltac ta israelale. 15-16Jech xavalbe ya'yic scotol li achi'iltac ta israelale: Li boch'o chchopolc'opoj, o me yan xich' xal ta jtojol, vu'un li Muc'ul Diosun yu'une, te xcuchoj smul chcom o. Ac'o yich' milel ta ton yu'un scotol li achi'iltaquic ta israelale. Me yanlum, o me achi'ilic ta israelal ti chopol chc'opoj ta jtojol vu'un li Muc'ul Diosune, ac'o yich' milel.

17“Li boch'o ta smil xchi'ile, ac'o yich' milel ec.

18“Li boch'o ta smilbe sts'unub yovol xchi'ile, ac'o xq'uextabe.

19“Li boch'o ta syayijes xchi'ile, ac'o yich' yayijesel ec jech chac c'u cha'al tspasbe xchi'ile. 20Me ta sc'asbe sbaquil xchi'ile, ac'o yich' c'asbel sbaquil ec. Me ta stu'pbe sat xchi'ile, ac'o yich' tu'pbel sat ec. Me ta scolesbe stanal ye xchi'ile, ac'o yich' colesbel stanal ye ec. Ti c'u x'elan svocol chac'be xchi'ile, ja' jech ac'o yich' pasbel ta sbec'tal stuc ec.

21“Li boch'o ta smilbe sts'unub yovol xchi'ile, ac'o yac'be xq'uexol. Yan li boch'o ta smil xchi'ile, ac'o yich' milel ec.

22“Ja' jech mantal ta xcom ta sventa li yanlumetique xchi'uc vo'oxuc li israeloxuque; vu'un li Muc'ul Diosun avu'unique”, xi li Muc'ul Diose.

23Li Moisese lic yalbe ya'ay scotol li xchi'iltaque. Jech te laj yiq'uic loq'uel li boch'o ichopolc'opoj ta stojol Diose; la smilic ta ton. Li israeletique ja' jech la spasic jech chac c'u cha'al i'albat yu'un Muc'ul Dios li Moisese.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index