Search form

Levítico 25

Sjabilal sventa chac'be xcux yosilic

1Li Muc'ul Diose la sc'opan li Moisés te ta vits Sinaie, jech laj yalbe:

2“Jech xavalbe ya'yic scotol li achi'iltac ta israelale: C'alal me la'ochic xa'ox batel ta avosilic ti bu chacac'boxuque, li avosilique tsc'an chavac'beic xcux sventa chavich'icun ta muc'. 3Vaquib jabil xu' chats'unic li c'usitic chats'un ta avosilique, xchi'uc vaquib jabil xu' chaq'uel chatuc'ulanic li ts'usubtic avu'unique, xu' chatulbeic sat. 4Ta svucubal jabile ac'bo xcux li avosilique; ja' sventa chavich'icun ta muc'. Mu xa c'usi xats'unic; mu xa xaq'uel xatuc'ulanic li ts'usubtic avu'unique. 5Xchi'uc mu xa xatuch'ic, mu xa xatsobic li atrigoic ti jech xa no'ox te chch'i stuc c'alal lajem xa atsobic scotole. Xchi'uc mu me xatsobbeic sat li ts'usubtic avu'unic ti c'alal mu'yuc xa q'uelbil tuc'ulanbil avu'unique yu'un tsc'an chavac'beic lec xcux o li avosilique. 6Ti c'u yepal c'usitic chloc' c'alal yorail chcux li avosilique, ja' yu'unic o li amozoique, li aquiaraique, li aviniquic ta abtele, xchi'uc li yanlumetic ti te co'ol nacaloxuc achi'uquique. 7Xchi'uc lec xve' o ats'unub avovolic xchi'uc li te'tical chonbolometic oy ta avosilalique. Scotol li c'usitic chloc' stuc ta avosilique ja' sve'elic scotolic.

Sjabilal Colem Chcom Scotol

8“Tsc'an chavatic vucub velta chcux li avosilique. Ja' jun velta chavatic ta vucvuc jabil; ja' baluneb yoxvinic (49) jabil xloc' ta scotol ti c'alal tsts'aqui li vucub velta chcux avosilique. 9Ta slajunebal c'ac'al yochel li svucubal ue ja' Sc'ac'alil Xch'ayubil Mulil. Jupanic li xulub achijic ta scotol avosilalique. 10Ta slajunebal yoxvinic (50) jabile ja' ch'ul jabil chc'ot avu'unic. Ja' Sjabilal Colem Chcom Scotol, ja' yorail xu' chataic ti c'u ono'ox x'elan oyoxuc jujunoxuque. Xchi'uc ja'o yorail xu' chavalic ti colem chcom scotol li jnaclumetic te ta avosilalique. Ac'o suticuc ta sna stuquic, o ta sna stot sme'ic. Ac'o sventainic yan velta li yosil stuquique. 11Ta slajunebal yoxvinic (50) jabile ja' Sjabilal Colem Chcom Scotol. Li jun jabil le'e mu me c'usi xats'unic ta avosilic; mu me xatsobic, mu me xatuch'ic li trigo ti te no'ox chch'i stuque. Mu me xaq'uel xatuc'ulanic li ts'usubtic avu'unique, xchi'uc mu me xatsobbeic sat. 12Yu'un ja' li Sjabilal Colem Chcom Scotole; ja' ch'ul jabil c'otem avu'unic. Li c'usitic chloc' ta te'tique xu' chave'ic.

13“Li Sjabilal Colem Chcom Scotole xu' chasutic batel chbat aventainic li avosilic jujunoxuque. 14C'alal me oy boch'o tsman, o me chchon yosil avu'unique, mu me xalo'la abaic. 15Li boch'o ta smane ja' te ac'o sliquesbe stojol ta yech'el li Sjabilal Colem Chcom Scotole. Jech ec li boch'o ta xchone ja' jech yepal ac'o sc'anbe stojol ti c'u yepal jabil xu' tsbalin c'alal to tsta li yan Sjabilal Colem Chcom Scotole. 16Me ep to jabil tsbaline, toyol stojol chloc'; yan me mu'yuc xa ep jabil tsbaline, tsulul xa stojol chloc', yu'un li c'usitic chich' chonele ja' jech chich' tsacbel stojol ti jaypoj xu' tsloq'ues li c'usitic tsts'une.

17“Mu me boch'o slo'la sba avu'unic. Aq'uic me ta ilel ti avich'ojicun ta muq'ue yu'un vu'un Muc'ul Diosun avu'unic. 18Ch'unic me li mantaletic cu'une; pasilanic me batel li chanubtaseletic cu'une. Me chach'unique, jech jun no'ox avo'ntonic te chanaquiic ta avosilalic. 19Te ta banamile lec ta xac' sat li c'usitic chats'unique, jech xcuxet avo'ntonic te chanaquiic, lec xave'ic o; lec noj ach'utic o yu'un.

20“Oy yic'al jech chavalic: ‘¿C'usi ta jve'tic ta svucubal jabil ti me mu xu' c'usi ta jts'untic, me mu xu' ta jtsobbetic sat li c'usitic chloc' cu'untique?’, oy yic'al xachiic. 21Ta svaquibal jabile vu'un ta jtac tal ep bendición cu'un, jech lec chac' li c'usitic chats'unique; lec xu' avu'unic o sventa oxib jabil. 22C'alal chats'unic yan velta ta xvaxquibal jabile, ja' chave'ic ti c'u yepal tsobbil avu'unique, xchi'uc ja' to chave'ic ta sbalunebal jabil ja' to c'alal tsta yorail chatsobbeic sat li c'usitic chats'unic ta ach'e.

23“Li banamile mu xu' chachonic o sbatel osil yu'un ja' cu'un. Li vo'oxuque j'ech'elbeoxuc no'ox; jch'om osiloxuc no'ox c'otemoxuc ta jtojol. 24Ti bu laj aman avosilic jujunoxuque, tsc'an ja' no'ox chavac'beic sman yan velta ti c'usi ora tsc'an tsman li boch'o yajval ono'oxe.

25“Me oy jun achi'ilic ti tspas ta me'on jech chlic xchonboxuc yosile, li boch'o noch' no'ox nacal xchi'uque xu' ac'o tal sc'an sutel li osile; ac'o xq'uextabe li stojole.

26“Me mu'yuc boch'o xu' xtal coltaatuc yu'une, ac'o snop lec c'u x'elan xu' ta scolta sba stuc. 27Ac'o yich' ta venta sjayibal jabil la xchon, xchi'uc c'u yepal jabil muc sta li Sjabilal Colem Chcom Scotole, jech ac'o sutesbe xq'uexol staq'uin li boch'o la sman to'oxe. Jech xu' chlic yich' yan velta li yosile. 28Pero me mu sta c'u yepal tsc'an sventa xu' chich' sutel li yosile, li boch'o la smane xu' te chich' o, ja' to me la sta li Sjabilal Colem Chcom Scotole. Jech mu'yuc xa ich'bil ta venta chcom li osile; xu' xa chich' sutel li yajvale.

29“Me oy boch'o la xchon sna ta junuc lum ti lec setbil ta coralton yu'une, xu' chcha'man sutel yan velta c'alal me muc to chloc' jun jabil la xchone. 30Pero me mu'yuc la xcha'man sutel yan velta c'alal me iloc' jun jabil la xchone, li boch'o la smane xu' xa te chich' o; chcom o c'alal ta smomnich'nabtac. C'alal me la sta li Sjabilal Colem Chcom Scotole, li nae mu xa xu' chich' sutel li yajvale. 31Pero li naetic ta jujun bic'tal lum ti mu'yuc setbilic ta coraltone, le'e co'ol sba xchi'uc osil, xu' chich' manel sutel yan velta. C'alal me la sta li Sjabilal Colem Chcom Scotole, mu'yuc xa ich'bil ta venta chcom li nae.

32“Li levietique xu' chcha'manic sutel li naetic ti te oy ta lum yu'un stuquique. 33Li boch'o smanojbe sna levietic te ta lum yu'unique, ac'o loc'uc batel c'alal me la sta li Sjabilal Colem Chcom Scotole. Ac'o batuc te ta lum yo' bu staoj yosil stuque. Yu'un li levietique ja' no'ox te snaic o ti bu oy slumalique. 34Li sve'ub xchijic ac'bilic sventa yosil slumalique mu xu' chich' chonel, yu'un ja' yu'unic o.

35“Me oy junuc achi'ilic ti solel me'one, me te chc'ot ta anaique, iq'uic ochel ta anaic. Te chi'inic jayibuc c'ac'al jech chac c'u cha'al jvayna avu'unic. 36Mu me c'usi xac'anbeic; mu me xac'anbe sloc' li anaique. Aq'uic me ta ilel ti avich'ojicun ta muq'ue; te no'ox chi'inic ta naclej. 37Mu me xac'anbe sjol me oy chaxq'uexboxuc ataq'uinique, xchi'uc mu me xatoybeic stojol li sve'el chavac'beique. 38Yu'un vu'un Muc'ul Diosun avu'unic ti la jloq'uesoxuc tal ta Egiptoe yu'un jech vo'oxuc chacac'boxuc li Canaán banamile, xchi'uc jech vu'un Diosun avu'unic chic'ot o.

39“Me oy jun achi'ilic te achi'uquic ti mu'yuc c'usi oy yu'une, me tsc'an chchon sba ta atojolique, mu me xavaq'uic abtejuc jech chac c'u cha'al amozoic. 40Cuyo jech chac c'u cha'al aviniquic ta abtel, o jech chac c'u cha'al jvayna avu'unic. Te ac'o abtejuc avu'unic ja' to me la sta li Sjabilal Colem Chcom Scotole. 41Xu' chacoltaic batel xchi'uc yajnil xnich'nab; ac'o sutuc batel ta yosil stot sme'ic ti bu liquem sts'unubalique. 42Yu'un ja' jnich'nabtac ti la jloq'ues tal ta Egiptoe, jech mu smeloluc ti chonbilic o jech chac c'u cha'al mozoetique. 43Mu me uts'il ilbajuc xavilic; aq'uic ta ilel ti avich'ojicun ta muc'; vu'un li Diosun avu'unique.

44“Me chac'an oy amozoic, oy aquiaraique, manic ta yantic lum te ta spat xocon avosilalic. 45Xchi'uc xu' chamanic noxtoc li yanlumetic te nacal ta avosilalique xchi'uc li xnich'nabic te voq'uemic ta alumalique; le'e xu' chcom ta amozoic. 46Xchi'uc xu' te chcom ta smozo anich'nabic c'alal me lachamique; le'e xu' chcomic o ta amozoic. Yan li achi'ilic ta israelale mu xu' chamozoinic, mu xu' chavuts'intaic li boch'o co'ol ats'unubal achi'uquique.

47“Me oy tspas ta jc'ulej li yanlum te nacal ta atojolique, me ja' oy chlic pasuc ta me'on li achi'ilic ta israelal ti nopol nacal xchi'uc li yanlum vinique, me chlic xchon sba ta taq'uin ta stojol li yanlum vinic le'e, o me ta stojol yan, 48xu' chtal yich' coltael loq'uel ac'o me xchonoj xa sba. Xu' chtal yich' coltael yu'un junuc yuts' yalaltac, 49me sjuntot, me xnich'on sjuntot, o me junuc xchi'il ta voq'uel. Jech noxtoc xu' tscolta sba stuc ti me oy c'uxi xut sbae. 50Co'ol ac'o spasic venta xchi'uc li boch'o imanvane. Te ac'o lic stsaquic c'usi jabilal imanat c'alal to ta Sjabilal Colem Chcom Scotol. Ja' jech chich' ich'el ta venta ti c'u yepal jabil, o c'u yepal c'ac'al abtejem yu'une. Ja' jech chich' ich'el ta venta jech chac c'u cha'al chich' tojel jujun c'ac'al li boch'otic ch-abtejique. 51Me ep to jabil sc'an sts'aquie, ja' jech yepal ac'o sutes li taq'uin laj yich' c'alal la xchon sbae. 52Yan me mu'yuc xa ep jabil sc'an li Sjabilal Colem Chcom Scotole, ja' xa no'ox jech yepal ac'o stoj li c'u yepal jabil sc'ane. 53Ja' jech tsc'an pasel jech chac c'u cha'al jun vinic ch-abtej ti ch'acbil stojol ta jujun jabile. Mu me jechuc no'ox ch-abtej jech chac c'u cha'al jun mozo.

54“Me mu'yuc boch'o sutes o li taq'uin c'u yepal laj yich' tojele, xu' ja' to colem chcom xchi'uc xnich'nab c'alal me la sta li Sjabilal Colem Chcom Scotole. 55Yu'un li achi'iltac ta israelale ja' cajtuneltac la jloq'uesic tal ta Egipto. Vu'un li Muc'ul Diosun avu'unique.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index