Search form

Levítico 26

Chich'ic bendición boch'o chch'unbeic smantal Dios

(Dt 7.12-24; 28.1-14)

1“Mu me xapas adiosic; mu me c'usi xava'anic sventa chavich'ic ta muc'. Mu me xava'anic tonetic, ajanbil tonetic te ta avosilalic yu'un chaquejan abaic ta stojol, yu'un vu'un no'ox jtuc Muc'ul Diosun avu'unic. 2Chabiic me li sc'ac'alil chacux avo'ntonic cu'une; ich'ic me ta muc' li ch'ulna cu'une, vu'un li Muc'ul Diosune.

3“Me chach'unic, me chapasic li mantaletic xchi'uc li chanubtaseletic cu'une, 4ta xcac' taluc ep vo' ti c'alal yoraile, jech lec chac' li c'usitic chats'un ta avosilique xchi'uc li ts'unubaltic avu'unique. 5Jech oy atrigoic o ti c'alal chloc' li sat ats'usubique, xchi'uc oy ats'usubic o ti c'alal yorail chats'unubajique. Oy lec ave'elic jech lec noj ach'utic, jech xcuxet no'ox avo'ntonic te chanaquiic ta avosilic. 6Ta xcac' ti jun no'ox avo'ntonic te oyoxuc ta alumalique; xcuxet no'ox avo'ntonic chavayic; mu'yuc boch'o chtal sibtasoxuc. Ta jloq'ues batel te ta avosilalic li jti'val bolometique, xchi'uc mu'yuc boch'o chtal stsacoxuc ta pleito. 7Xchi'uc xu' avu'un chanutsic batel li avajcontraique; te no'ox chamilic ta espada scotolic. 8Me oy vo'oboxuc li vo'oxuque, xu' chanutsic batel vo'vinic (100). Me vo'vinicoxuc (100) li vo'oxuque, xu' chanutsic batel lajunmil (10,000). Jech te no'ox chamilic comel ta espada li avajcontraique. 9Lec chaquiloxuc o. Ta xcac' bolanic, ta xcac' epajanic, xchi'uc j'ech'el te ta xcac' comuc ta atojolic li c'usi chapanbil cu'une. 10Ep c'ac'al chave'ic li trigo ti oy xa sjabilal atsobojique, xchi'uc ta to xaloq'uesic ti c'alal chatiq'uic ochel ti bu ja' to chloc' avu'unique.

11“Te chajchi'inoxuc o ta naclej; mu'yuc chajbajoxuc. 12Te chixanov scotol c'ac'al ta atojolic; vu'un Diosun avu'unic chic'ot, jech jnich'naboxuc chac'otic o. 13Vu'un Muc'ul Diosun avu'unic ti la jloq'uesoxuc tal ta Egiptoe yu'un mu jc'an ti te tiq'uiloxuc o ta mozoil yu'unique. Jech vu'un la jtuch' ya'yel li slasual yabtejeb vacax ti acuchojic ti toj ole. Laj cac' ti jun xa avo'nton tuc' xateltun chaxanovique.

Tstoj smul boch'otic mu xch'unbeic smantal Dios

(Dt 28.15-68)

14-15“Pero me mu xachiquintaic, me mu xapasic scotol li mantaletic li chanubtaseletic cu'un li'i, me chabajic, me mu'yuc tsots sc'oplal chava'yique, laj xa asoquesic o li c'usi chapanbil cu'une. 16Me jech chapasique, li vu'une ja' jech ta jpasboxuc ec jech chac li'i: Ta jtac tal muc'ta xi'el ta atojolic; ta jtac tal tsatsal chamel, xchi'uc c'ac'ubel, xchi'uc xchamel asatic, xchi'uc chamel ti c'unc'un ta slajes stsatsal abec'talique. Altic chavac' avocolic ta sts'unel li c'usitic chats'unique; mu'yuc chabalinic yu'un ja' chtal slajesic li avajcontraique. 17Ta xlic jcontrainoxuc, jech tsalbil chac'otic yu'un li avajcontraique. Ja' chlic spasoxuc ta mantal li boch'otic chopol to'ox chavilique. Xchi'uc jech no'ox chajatovic batel, ac'o me mu'yuc boch'o chtal snutsoxuc.

18“Pero me mu xavich' avo'ntonic o c'alal jech chc'ot ta pasele, x'ech' to vucub velta ta xcac'boxuc stojol li amulique. 19Ta jbic'tajesoxuc o ta j'ech'el ta scoj li atoyobbailique. Mu'yuc xa ta xyal tal vo' ta vinajel, jech mu xa xch'i c'usitic chats'unic ta banamil, yu'un ta jbacubtas jech chac c'u cha'al ton. 20Jeche' chavac' avocolic ta abtel, yu'un mu'yuc xa c'usi chch'i ta avosilic, xchi'uc mu xa xac' sat li te'etic ta banamile.

21“Me ja' no'ox jech chopol c'usi chapasic o ta jtojole, me mu xac'an xach'unic o li jmantaltaque, ta xacac'boxuc to yan vucub velta stojol li amulique. 22Ta jtac tal noxtoc jti'val chonbolometic; ja' chtal sti'ic li anich'nabique xchi'uc li ats'unub avovolique. Ja' jech ta c'unc'un chabic'tajic o batel; mu'yuc xa boch'o chanov ta bebetic avu'unic.

23“Pero me mu xatuq'uibtas abaic o jeche, me te acontrainojicun oe, 24ja' no'ox jech ec li vu'une ta jcontrainoxuc o ec. Ta xcac'boxuc to yan vucub velta stojol li amulique. 25Ta jtac tal boch'otic chasmiloxuc; ja' spacol ta sventa ti mu xach'unic li c'usi chapanbil cu'une. Ac'o me chbat anac' abaic ta lumetic avu'unic, pero ta jtac tal chamel ta atojolic; xchi'uc chacac'oxuc o ta sc'ob li avajcontraique.

26“C'alal ta xcules li ave'elic cac'ojboxuque, lajuneb antsetic ta spasic pan ta jun no'ox horno, jech chlic avoq'uilanbe abaic ti c'alal chave'ique, pero mu xnoj ach'utic o.

27“Me mu xlic avich'icun o ta muc' jeche, me te staoj yav acontrainojicun oe, 28jech ec li vu'une ta jcontrainoxuc ec; ta xlic ep sc'ac'al co'nton avu'unic, jech chacac'boxuc to yan vucub velta stojol li amulique. 29Ja' chlic ati'ic aqueremic xchi'uc atsebic. 30Ta jlilin li toyol c'opojebaletic avu'unique. Ta jines noxtoc li scajleb xchic'ubil pom avu'unique. Li abec'talic ti mu'yuc xa cuxule te jmoj ta jbusan ta sba yo' bu busul li sloc'obal adiosic ti mu cuxuluque yu'un chcac' ta ilel ti chopol chaquiloxuc oe. 31Ta jyavnaijes li alumalique; ta jlilin li ch'ulnaetic avu'unique. Mu xa jc'an xquich'be yic' li aperfume chavaq'uique.

32“Ta xcules o li alumalique. Li avajcontraic te chtal naquiicuque ch'ayel chc'ot yo'ntonic ti jech chc'ot ta pasele. 33Ta jpucoxuc batel ta yantic lumetic. Ta jloq'ues espada ta atojolic; ja' ta jnutsoxuc o batel. Li avosilalique ja' jech chcom jech chac c'u cha'al xocol banamil. Li alumalique ta xyavnaij o ta j'ech'el. 34Li avosilalique xcuxet no'ox yo'nton ta xcuxic ti jayib c'ac'al xocol chcom c'alal te oyoxuc ta yosilal avajcontraique. Jech te to chcux o li avosilique; ja' tspac'an ti mu'yuc ono'ox chavac'beic xcuxe. 35Ti c'u yepal c'ac'al xocol chcome, ja' to te chcux o ta sventa ti mu'yuc ono'ox xavac'beic xcux ti c'alal te nacaloxuque.

36“Li boch'o cuxul to chcom avu'unic te ta yosilal avajcontraique, ta xcac'beic ep xi'el. Ta jlic no'ox yanal te' chbaj, ta xjatovic batel ta anil jech chac c'u cha'al nutsbilic ta espada. Te ta xyalic o ta lum ac'o me mu'yuc nutsbilic. 37Stuquic xa no'ox te tstsuculin sbaic, yu'un ja' jech chjatovic batel jech chac c'u cha'al nutsbilic ta pleito ac'o me mu'yuc nutsbilic. J'ech'el mu xu' avu'un chapoj abaic o yu'un li avajcontraique. 38Jech tsalbil chacomic o yu'un li yantic lumetique. Te cha'ulic o ta yosilal li avajcontraique. 39Li boch'o cuxul to chcom avu'unic te ta yosilal avajcontraique, te xa no'ox ta xchamic ta scoj li smulique. ¡Ta scoj xa no'ox smul stotic co'ol chcham xchi'uquic!

40“Pero me chlic avalic ta jamal ti ta melel oy amulique xchi'uc ti oy smul li atotique, ti ep laj ata amulic ta scoj ti laj atoy abaic ta jtojole, xchi'uc me chlic avalic ti ja' ta scoj contra laj avilicun 41ti jech lic jcontrainoxuc eq'ue, ti laj quic'oxuc batel ta yosilal li avajcontraique, ja' svinajeb ti chasutes avo'ntonique, ti chavotquin li amulique. 42Jech chlic t'abuc ta co'nton li c'usi jchapanoj jchi'uc Jacob, jchi'uc Isaac, jchi'uc Abrahame. Xchi'uc chlic t'abuc ta co'nton noxtoc li banamil bu cac'ojboxuque, 43ja' ti bu xocol icom avu'unique, jech te to chcux li avosilic c'alal mu'yuc te nacaloxuque. Ja' jech chatoj amulic ta scoj ti mu'yuc tsots sc'oplal laj ava'yic li c'usitic calojboxuque, xchi'uc ti laj abajic li mantaletic cu'une.

44“Ac'o me jech chc'ot ta pasel, ac'o me te oyoxuc ta yosilal li avajcontraique, muc j'ech'eluc ta jipoxuc o ta co'nton, xchi'uc muc j'ech'eluc ta jbajoxuc o, mu'yuc ta xculesoxuc o ta jyalel, yu'un mu xcac' ch'ayuc c'usi la jchapan jchi'uc li amoltotic ta vo'one, vu'un li Muc'ul Diosun avu'unique. 45Ta jt'ab ta co'nton noxtoc c'usi la jchapan jchi'uc li amoltotic ta vo'one c'alal la jloq'uesic tal ta Egipto ta sat yantic lumetique, yu'un vu'un Diosun avu'unic chic'ot; vu'un li Muc'ul Diosune”, xi li Diose.

46Ja' jech li mantaletic, li chanubtaseletic, xchi'uc li c'usitic yan yaloj Muc'ul Dios ta sventa Moisés ti la sliques stuc ta stojol li israeletic c'alal te oyic ta vits Sinaie.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index