Search form

Levítico 3

Sc'oplal matanaletic sventa xu' chnopajic ta stojol Dios

1“C'alal chamilbicun jmoton sventa chanopajic ta jtojole, xu' chavaq'uic avacaxic, me stot, me sme', pero tsc'an ja' chavac'bicun, ti bu ven leque. 2Li boch'o chaq'ue, ac'o yac' sc'ob ta sjol li xvacaxe. Ts'acal ac'o smil ta stuq'uil sti' ch'ulna pasbil ta nucul. Li paleetique ja' ac'o svijbeic ta sba scajleb jmoton li xch'ich'ale, xchi'uc ta spat xocon scajleb jmoton.

3-4“Li boch'o chac' jmotonin xvacax sventa chnopaj ta jtojole, ja' ac'o yac' li xepualtac sbiquile, xchi'uc li srinyontac xchi'uc xepuale, xchi'uc li xepual yolon xch'ilte'e, xchi'uc li xepual secube. Ja' co'ol ac'o yich' loq'uesel xchi'uc li chib srinyone. Le'e ja' chic'bil matanal chc'ot ta jtojol. 5Li paleetique ac'o xchic' ta scajleb jmoton. Jmoj ac'o xchic' xchi'uc li yan jmoton te chc'ac' yo' bu tsanal li si'e. Ja' chic'bil matanal ti lec mu yic' chc'ot ta jtojol, vu'un li Muc'ul Diosune.

6“Pero me ja' xchij chiyac'bun jmotonin sventa xu' chnopaj ta jtojole, ja' ac'o yac'bun ti bu ven leque, ac'o me stot, o me sme'. 7Me oy boch'o chiyac'bun jmotonin jcotuc ch'ium chije, ac'o tal yac' ta jtojol, vu'un li Muc'ul Diosune. 8Ac'o yac' sc'ob ta sjol li xchije. Ts'acal ac'o smil te ta yeloval ti'ch'ulna pasbil ta nucul. Li paleetique ja' ac'o svijbeic xch'ich'al ta sba scajleb jmoton xchi'uc ta spat xocon.

9“Li boch'o chiyac'bun milbil matanal sventa lec chquile, ja' ac'o yac' ta chiq'uel sventa jmoton scotol li xepuale xchi'uc li stelijil snee, li xepualtac sbiquile, 10li chib srinyon xchi'uc xepuale, li xepual yolon xch'ilte'e, xchi'uc li xepual secube. Co'ol ac'o yich' loq'uesel xchi'uc li chib srinyone. 11Li palee ac'o xchic' scotol te ta scajleb jmoton. Ja' chic'bil matanal sventa ve'lil chc'ot ta jtojol, vu'un li Muc'ul Diosune.

12“Li boch'o chiyac'bun jmotonin stentsune, ac'o tal yac' te ta jtojol, vu'un li Muc'ul Diosune. 13Ac'o yac' sc'ob ta sjol li stentsune. Ts'acal ac'o smil ta yeloval ti'ch'ulna pasbil ta nucul. Li paleetique ja' ac'o svijbeic xch'ich'al ta sba li scajleb jmotone xchi'uc ta spat xocon.

14“Li boch'o chaq'ue, ja' ac'o yac' ta chiq'uel sventa jmoton li xepualtac sbiquile, 15li srinyontac xchi'uc xepuale, li xepualtac yolon xch'ilte'e, xchi'uc li xepual secube. Co'ol ac'o yich' loq'uesel xchi'uc li chib srinyone. 16Li palee ac'o xchic' scotol ta scajleb jmoton. Ja' chic'bil matanal sventa ve'lil chc'ot ti lec mu yiq'ue. Scotol li xepualtaque ja' cu'un, vu'un li Muc'ul Diosune.

17“Li'i ja' jech jmantal chcom o ta atojolic c'alal ta avalab anich'nabic ti buyuc no'ox nacaloxuque: mu xu' chati'ic li xepuale xchi'uc xch'ich'al ats'unub avovolique, uto li achi'iltaque”, x'utat yu'un Dios li Moisese.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index