Search form

Levítico 4

Smoton Dios ta sventa mulil

1Li Muc'ul Diose la sc'opan yan velta li Moisese, jech laj yalbe:

2“Albo ya'yic scotol achi'iltac li c'usi chacalbot li'i: Me oy boch'o tsta smul ta sventa li jmantaltac ti muc ta yutsiluc yo'nton la spasique, xchi'uc me oy tspasic li c'usi sc'oplal mu stac' chapasique, tsc'an jech ac'o spasic chac li'i:

3“Me ja' stuc banquilal pale la sta smul ta jtojol, jech oy smul chc'ot yu'un li xchi'iltac ta israelale. Ac'o yac'bun jmotonin jcotuc ch'ium vacax ta sventa li smul staoje. Ja' ac'o yac'bun ti bu ven leque. 4Ac'o yic' tal ta jtojol ta ti'ch'ulna pasbil ta nucul. Ac'o yac' sc'ob ta sjol li vacaxe. Ts'acal ac'o smil te ta jtojol. 5Ja' stuc ac'o yich' batel jutebuc xch'ich'al te ta ch'ulna pasbil ta nucul. 6Ac'o sts'aj sbic'tal sc'ob ta ch'ich'. Ac'o svij batel vucub velta ta jtojol ta stuq'uil li poc' te joc'ol ta ch'ulnae. 7Ac'o sbon ta ch'ich' noxtoc li xulub scajleb xchic'ubil pom ti te oy ta yut ch'ulna ta jtojol, vu'un li Muc'ul Diosune. Li scomelale ac'o smal te ta yoc li scajleb xchic'ubil jmoton ti te oy ta stuq'uil ti'ch'ulna pasbil ta nucule. 8Li vacaxe ac'o yich' loq'uesbel scotol li xepualtac sbiquil, 9li srinyontaque, li xepualtac srinyone, li xepual yolon xch'ilte'e, xchi'uc li xepual secub ti co'ol tsc'an loq'uesel xchi'uc srinyon 10jech chac c'u cha'al chich' loq'uesbel li jmoton sventa lec chaquiloxuque. Ts'acal ac'o xchic' scotol te ta scajleb xchic'ubil jmoton li palee. 11Li snuculil vacaxe xchi'uc li sbec'tale, li sjole, li yacane, li sbiquile, xchi'uc li stso'e, 12o xu' chcaltic ti ja' scotlijil li vacaxe, loq'uesic batel ta spat to acarpanaic, te xbat avaq'uic ti bu lec jamal te ta yav bu chich' busanel tane. Ac'beic lec si'il; ja' te xachiq'uic li vacaxe.

13“Me scotol achi'iltac la sta smulic ti muc ta yutsiluc yo'nton la spasique, me mu'yuc boch'o sna' yu'unic ti mu jechuc chal mantaletic cu'un, vu'un li Muc'ul Diosune, oy ono'ox smulic o ta jtojol. 14C'alal me la sna'ic ti oy smulique, ac'o yaq'uic jcot ch'ium vacax ta sventa smul scotolic. Ac'o yich'ic batel ta ch'ulna pasbil ta nucul. 15Li moletic yu'unique, ac'o yac' sc'obic ta sjol li vacaxe, xchi'uc te ac'o smilic ta jtojol, vu'un li Muc'ul Diosune. 16Li palee ac'o yich' ochel ta yut ch'ulna pasbil ta nucul jutebuc li xch'ich'al vacaxe. 17Ac'o sts'aj sbic'tal sc'ob ta ch'ich' li palee. Ac'o svij batel vucub velta ta jtojol te ta poc' ti te joc'ol ta ch'ulnae. 18Ac'o sbon ta ch'ich' noxtoc li xulub scajleb jmoton ti te oy ta jtojol ta ch'ulna pasbil ta nucule. Li scomelal ch'ich'e, ac'o smal te ta yoc li scajleb xchic'ubil jmoton te ta stuq'uil ti'ch'ulna pasbil ta nucule. 19Ac'o sloq'uesbe scotol li xepuale. Ac'o xchic' ta scajleb jmoton. 20Ja' jech ac'o yich' pasbel li vacax jech chac c'u cha'al chich' pasbel li yan ta sventa mulile. Ja' jech ac'o spas ta stojol xchi'iltac li palee. Jech ch'aybil smulic chcom o. 21Ac'o sloq'uesic batel ta spat to acarpanaic li ch'ium vacaxe. Te ac'o xchiq'uic jech chac c'u cha'al la xchiq'uic li yan jcot ch'ium vacaxe. Ja' matanal ta sventa smul scotol li achi'iltac ta israelale.

22“C'alal me ja' la sta smul junuc li banquilaletique, me mu spas jech c'u cha'al chal li mantaletic cu'un, vu'un li Muc'ul Diosun avu'unique, oy smul ta jtojol ac'o me muc ta yutsiluc yo'nton la spas. 23C'alal me laj xa sna' ti oy smulique, ac'o yac'bun jmotonin jcotuc stentsun ti bu ven leque. 24Ac'o yac' sc'ob ta sjol li stentsune; te ac'o smil ti bu ono'ox chich' milel li yantic matanaletic chich' aq'uele yu'un ja' matanal ta sventa li smule. 25Li palee ac'o sts'aj sbic'tal sc'ob ta xch'ich'al li tentsune, ac'o sbon ta xulub scajleb xchic'ubil jmoton. Li scomelale te ac'o smal ta yoc li scajleb jmotone. 26Scotol li xepuale ac'o yich' chiq'uel te ta scajleb jmoton jech chac c'u cha'al chich' chic'bel xepual li matanal sventa lec chaquiloxuque. Ja' jech ac'o spas li pale ta sventa chch'aybe smul li jun banquilal avu'unique, jech ch'aybil smulic chc'ot o.

27“Me oy tsta smul junuc boch'o mu'yuc yabtel te ta atojolic ti mu xch'un c'usi chal ta mantaletic cu'un, vu'un li Muc'ul Diosune, ac'o me muc ta yutsiluc yo'nton la spas, oy smul o ta jtojol. 28C'alal tsna' ti oy smule, ac'o yac' jcotuc me' tentsun ta sventa li smul la stae. Ja' ac'o yac' ti bu ven leque. 29Ac'o yac' sc'ob ta sjol li stentsune; te ac'o smil yo' bu chich' milel li yantic matanaletic chich' chiq'uele. 30Li palee ac'o sts'aj sbic'tal sc'ob ta xch'ich'al li tentsune; ac'o sbon te ta xulub scajleb xchic'ubil jmoton. Li scomelal ch'ich'e, te ac'o smal ta yoc li scajleb jmotone. 31Ac'o sloq'uesbe scotol li xepual jech chac c'u cha'al chich' pasbel li matanal ta sventa lec chaquiloxuque. Li palee ac'o xchic' te ta scajleb jmoton, jech lec mu yic' chc'ot ta jtojol, vu'un li Muc'ul Diosune. Ja' jech ac'o spas li pale sventa chch'aybe smul li boch'o oy smule, jech ch'aybil smul chc'ot o.

32“Yan me xchij chich' tal ta sventa li smul la stae, ac'o yic' tal jcotuc sme' xchij ti bu ven leque. 33Ac'o yac' sc'ob ta sjol li chij sventa xch'ayubil smule. Ac'o smil te yo' bu chich' milel li yantic matanaletic chich' chiq'uele. 34Li palee ac'o sts'aj sbic'tal sc'ob ta xch'ich'al li chije; ac'o sbon te ta xulub li scajleb xchic'ubil jmotone. Li scomelale ac'o smal te ta yoc li scajleb jmotone. 35Ac'o sloq'uesbe scotol li xepualtac jech chac c'u cha'al chich' pasbel li matanal sventa lec chaquiloxuque. Li palee ac'o xchic' te ta scajleb jmoton te ta sba li yan matanal te chc'ac' ta jtojole. Ja' jech ac'o spas sventa chch'aybe smul li boch'o la sta smule, jech ch'aybil smul chc'ot o.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index