Search form

Levítico 5

Sc'oplal matanal sventa yan mulil

1“Me oy boch'o ch-ic'at ta testigoal ta sventa ti ja' yiloj, o ja' sna' lec li c'usi c'otem ta pasele me mu sc'an xale, oy smul chc'ot ec.

2“Jech noxtoc me oy boch'o tspic li c'usi toj chopole, me chamen te'tical chonbolometic, o me ats'unub avovolic, o me jcot jti'val chon ti mu ono'ox stac' chapiquique, chopol chcom li boch'o la spique, xchi'uc oy smul chc'ot o, ac'o me mu sna'.

3“Me oy boch'o tspicbe c'usiuc no'ox chopol yu'un achi'iltaquique, ja' li c'usi chopol, li c'usi ip yu'une, ac'o me muc sna' ta ora, pero me ts'acal to la sna'e, li boch'o la spique, oy smul chc'ot o.

4“Me oy boch'o ta anil no'ox chal ta jtojol ti oy c'usi tsc'an tspase, me muc sna' me lec, me mu lecuc c'usi chal ta scoj ti toj anil tsnope, me ts'acal to it'ab ta yo'nton ti chopole, oy smul chc'ot ta sventa li c'usi laj yale.

5“Li boch'o la sta smul ta sventa jchopuc li mulil le'e, ac'o yal ta jamal li smule, 6xchi'uc ac'o yic' tal jcotuc sme' xchij, o me sme' stentsun ta sventa li smule. Ac'o tal yac' ta jtojol, vu'un li Muc'ul Diosune. Li palee ac'o yac' ta ch'aybel smul, jech ch'aybil smul chcom li boch'o staoj smule.

7“Ti me mu'yuc yu'un jcot chije, ac'o yac' cha'cotuc puruvoc stsu, o me cha'cot stsumut ta sventa li smul staoje. Li jcote ja' sventa xch'ayubil smul; li yan jcote ja' sventa chic'bil matanal chc'ot. 8Ac'o yic' batel ta stojol li palee. Li palee ja' ba'yuc ac'o yac' li jcot sventa mulile. Ac'o xmich'be no'ox ta snuc'; mu me sc'ocbe o li sjole. 9Li xch'ich'ale ac'o yich' vijbel jutuc ta jot xocon li scajleb jmotone. Li c'u yepal chcome, ac'o yich' pits'el yalel ta yoc scajleb jmoton, yu'un ja' matanal sventa mulil. 10Li xcha'cotale ac'o yich' xchiq'uel jech chac c'u cha'al chich' pasel ono'oxe. Ja' jech ac'o spas li pale sventa chch'aybe smul li boch'o staoj smule, jech ch'aybil smul chc'ot o.

11“Pero me mu xtoj yu'un noxtoc li cha'cot puruvoc stsu, o li cha'cot stsumute, xu' ja' no'ox ac'o yich' tal chibuc kilo arina ti bu ven leque. Ja' matanal sventa smul chc'ot. Mu me xac'be aceite xchi'uc pom, yu'un ja' matanal ta sventa mulil. 12Ac'o yich' batel ta stojol li palee. Li palee ac'o sjop batel jopuc li arinae; ja' sventa sna'ubil yu'un ti ich'aybat smule. Jmoj te ac'o xchic' ta scajleb jmoton xchi'uc li yantic matanaletic chc'ac' te ta jtojol, vu'un li Muc'ul Diosune. Ja' matanal sventa mulil chc'ot o. 13Li palee ac'o xch'aybe smul li boch'o c'usiuc smul staoje, jech ch'aybil smul chc'ot o. Li scomelale ja' xa yu'unic chcom li paleetique. Ja' co'ol chac c'u cha'al chich' aq'uel li c'usitic yan jech chac c'u cha'al trigoe”, xi li Diose.

Laj yaq'uic matanaletic ta sventa bu chjelovic ta stojol Muc'ul Diose.

14Li Muc'ul Diose la sc'opan yan velta li Moisese, jech laj yalbe:

15“Me oy boch'o tsta smul ta sventa ti muc ta yutsiluc yo'nton muc ts'acaluc xac' li c'usitic voc'bil xa ta jtojole, ac'o yic' tal jcotuc chij ti bu ven leque. Ac'o tal yac' ta jtojol, vu'un li Muc'ul Diosune. Li chije ac'o yich' q'uelel jaysep saquil taq'uin stojol jech chac c'u cha'al chapanbil te ta ch'ulna ta sventa li muliletique. 16Li boch'o jech la spas ti muc ts'acaluc xac' li c'usi voc'bil ta jtojole, ac'o sts'acubtas, xchi'uc ac'o yac'be sjol jun ta vo'vo'. Ja' ac'o yac'be li palee. Li palee ja' ac'o yac' ta ch'aybel o smul ta sventa li chij laj yaq'ue, jech ch'aybil smul chc'ot o.

17“Me oy boch'o la spas c'usi chopol ti mu jechuc chal li mantaletic cu'une, ac'o me muc sna' ti la sta smule, pero oy ono'ox smul o ta jtojol. 18Ac'o yic' tal jcotuc xchij ti leque, ti mu'yuc xchamele, xchi'uc vo'ot chaq'uel c'u yepal stojol. Ac'o yic' batel ta stojol li palee. Ja' milbil matanal chc'ot ta sventa smul ti muc ta yutsiluc yo'nton la spase, jech ch'aybil smul chc'ot o. 19Ja' jech jmoton ac'o yac' ta sventa ti muc xch'unbun jmantal, vu'un li Muc'ul Diosune, yu'un oy smul ta jtojol”, xi li Muc'ul Diose.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index