Search form

Levítico 7

Chanubtasel ta sventa c'u x'elan chchic'beic smoton Dios ta sventa bu chjelovic ta stojol Muc'ul Dios

1“Li milbil matanal sventa bu chajelovic ta jtojole ja' bats'i lequil ch'ul matanal. Ja' yu'un li' oy li chanubtasel ta sventa c'usi tsc'an chapasique: 2Li matanal ta sventa bu chajelovic ta jtojole te ac'o yich' milel yo' bu chich' milel li yantic matanaletic chich' chiq'uele. Li xch'ich'ale ac'o yich' vijel ta sba scajleb jmoton xchi'uc ta spat xocon. 3Ac'o yich' aq'uel ta jmoton scotol li xepuale: ja' li xepual sne xchi'uc sbiquile, 4xchi'uc li chib srinyon xchi'uc xepuale, xchi'uc li xepual yolon xch'ilte'e, xchi'uc li xepual secub ti co'ol tsc'an loq'uesel xchi'uc srinyone. 5Li palee ac'o xchic' te ta scajleb jmoton; ja' chic'bil matanal ta jventa, vu'un li Muc'ul Diosune. Ja' xch'ayubil ti bu chajelovic ta jtojole. 6Scotol li paleetique xu' tsti'ic. Te ac'o sti'ic yo' bu ts'u'iltasbil cu'un li banamile yu'un ja' bats'i lequil ch'ul matanal.

7“Li matanal sventa bu chajelovic ta jtojole ja' co'ol xchi'uc li matanal ta sventa mulile. Ja' yu'un jun no'ox mantal ta sventa xchibal: li matanale ja' yu'un chc'ot o li pale ti laj yac' ta ch'ayel mulile. 8Jech noxtoc li pale ti chchic' li jmoton me oy boch'o laj yaq'ue, ja' yu'un chcom o li snuculile. 9Jech noxtoc li c'usi co'oltic sba jech chac c'u cha'al trigo chavac'bicun jmotonin ti ta'ajesbil ta hornoe, xchi'uc scotol li c'usi panbil ta cacerola bin xchi'uc ch'ilbil ta xalteme ja' yu'un chcom o li pale ti chac' ta jtojole. 10Jech noxtoc scotol li jmoton ti vots'bil ta aceite, o me taqui-arina no'oxe, ja' yu'unic chcom li xnich'nab Aarone. Co'ol ac'o yich'ic scotolic.

Matanal sventa xu' chnopajic ta stojol Dios

11“Li'i ja' chanubtasel sventa c'u x'elan chavac'bicun jmoton sventa xu' chanopajic ta jtojol, vu'un li Muc'ul Diosune: 12Me ja' chamilbicun sventa oy c'usi chatojbicun ta vocole, aq'uic noxtoc muc'tic vaj mu'yuc yich'oj svolesubil xch'ut vots'bil ta aceite, xchi'uc bic'tal vaj mu'yuc yich'oj svolesubil xch'ut jaxbil ta aceite xchi'uc yan muc'tic vaj pasbil ta lequil arina vots'bil ta aceite. 13Co'ol xavaq'uic xchi'uc li jmoton sventa oy c'usi chatojbicun ta vocole. Aq'uic noxtoc muc'tic vaj yich'oj svolesubil xch'ut sventa co'ol co'ntontic. 14Ta scotol ti c'u yepal jmotone ac'o yich' aq'uel c'uuc yepal ta jtojol. Li pale ti tsvij li ch'ich' sventa xu' chanopajic ta jtojole ja' yu'un chcom li scomelale.

15“Li sbec'tal jmoton sventa oy c'usi chatojbicun ta vocol xchi'uc sventa xu' chanopajic ta jtojole ac'o yich' ti'el te no'ox ta sc'ac'alil. Mu xu' chanaq'uic sventa yoc'omal. 16Yan me ja' matanal sventa chapasic c'usi avalojic ta jtojole, o me yutsil no'ox avo'nton laj avaq'uique, xu' chati'ic te no'ox ta sc'ac'alil noxtoc, xchi'uc xu' to chaq'uejic sventa yoc'omal ti c'u yepal chcom avu'unique. 17Pero me oy to chcom avu'unic sventa xcha'ejale, chiq'uic xa ta c'oc' scotol. 18Me oy to boch'o tsti' ta xcha'ejal li matanal sventa chanopajic ta jtojole, mu'yuc ta jtsacbe o li boch'o laj yaq'ue, jech mu'yuc tsacbil ta venta chcom o. Mu'yuc stu chquil o li c'usi laj yich' aq'uele. Li boch'o la sti'e, oy smul chcom o.

19“Me oy c'usi chopol cht'ab te ta ti'bole, mu xa xu' chich' ti'el. Ac'o yich' chiq'uel ta c'oc'.

“Scotol li boch'o lecubtasbile xu' tsti'ic li ti'bole.

20“Li boch'o mu'yuc lecubtasbil ti tsti' li jmoton sventa co'ol co'ntontique, ac'o yich' loq'uesel ta atojolic.

21“Jech noxtoc li boch'o ta spic c'usiuc no'ox chopole, me ja' c'usi chopol yu'un xchi'ile, o me ja' c'usi chopol yu'un chonbolom, o me oy c'usi yan toj chopol, me la sti' li milbil matanal sventa co'ol co'ntontique, ac'o yich' loq'uesel ta atojolic”, xi li Muc'ul Diose.

Chanubtasel ta sventa xepual xchi'uc xch'ich'al matanaletic

22Li Muc'ul Diose la sc'opan li Moisese, jech laj yalbe:

23“Albo ya'yic li achi'iltac ta israelal jech chac li'i: Me jutuc mu xu' chati'beic xepual li vacaxe, li chije, xchi'uc li tentsune. 24Li xepual ats'unub avovolic ti jech no'ox chcham stuque, o me scomelal ta ti'el yu'un jti'vanej bolome, nopic xa no'ox c'u x'elan xu' chatunesic. Mu me xati'ic.

25“Li boch'o ta sti'be xepual li ats'unub avovolic ti chich' aq'uel ta jtojol sventa chic'bil matanale, ac'o yich' loq'uesel ta atojolic.

26“Ta buyuc no'ox nacaloxuc, me jutuc mu xu' chati'beic xch'ich'al li ats'unub avovolique xchi'uc li mutetique. 27Li boch'o ta sti' c'usiuc no'ox xch'ich'ale, ac'o yich' loq'uesel ta atojolic”, xi li Muc'ul Diose.

Sc'oplal c'usitic xu' chich'ic li paleetique

28Li Muc'ul Diose la sc'opan li Moisese, jech laj yalbe:

29“Albo ya'yic achi'iltac ta israelal jech chac li'i: ‘Li boch'o chiyac'bicun jmoton ta sventa lec chquilique te ac'o tal yaq'uic ta jtojol, vu'un li Muc'ul Diosune. 30Ac'o yich' tal stuquic li matanaletic ti tsc'an chiq'uel ta jtojole, ja' li xepual sna yo'ntone xchi'uc li mero sna yo'ntone yu'un ja' chich' ye'el ta jtojol, vu'un li Muc'ul Diosune. 31Li palee ac'o xchic' te ta scajleb jmoton li xepuale; yan li sna yo'ntone ja' yu'unic chcom li Aarón xchi'uc xnich'nabe. 32Li sbats'i-o' li matanal ac'bil ta sventa lec chaquiloxuque ac'o yich' li palee. Ja' sventa apatanic. 33Li sbec'tal sbats'i-o'e ja' yu'un chcom li pale boch'o chac' ta jtojol li xepual xchi'uc xch'ich'ale. Ja' jmoton sventa lec chaquiloxuque. 34Li matanal chaq'uic ta jtojol achi'iltac sventa lec chaquiloxuque ja' xa quich'ojbeic o ta sventa lequil matanal li sna yo'ntone. Yan li yo'e ja' quich'oj sventa apatanic. Li c'usitic quich'oje ja' cac'ojbeic ec li pale Aarón xchi'uc xnich'nabe. Yu'un jech sc'oplal o ti ja' yu'unic li c'usi chaq'uic achi'iltac ta israelale. Ja' jun mantal comen o c'alal ta yalab xnich'nabic’, uto li achi'iltaque”, x'utat yu'un Muc'ul Dios li Moisese.

35Ja' jech spuculal laj yich'ic li Aarón xchi'uc xnich'nab c'alal chchic'beic li smoton Diose. Ja' te ora lic yu'uninic o li Aarón xchi'uc smomnich'nabtac ti c'usi ora voc'bil icomic o ta sventa paleale. 36Ja' Muc'ul Dios laj yal mantal ti jech ac'o yaq'uic li israeletic c'alal laj yich'ic t'ujel li paleetique. Ja' jun mantal icom o c'alal ta yalab xnich'nabic ti jech ac'o spasique.

37Scotol le'e ja' chanubtasel ta sventa c'alal chich' chiq'uel li matanaletic ti co'oltic sba jech chac c'u cha'al trigoe, li matanaletic ta sventa mulil xchi'uc ta sventa c'unil muliletique, xchi'uc li matanaletic sventa lecubtasele, xchi'uc matanaletic sventa lec ch-ilatic yu'un Diose. 38Ja'o te i'albat yu'un Muc'ul Dios ta vits Sinaí li Moisese. Ja'o yorail te lic yalbe scotol israeletic ta xocol banamil Sinaí ti ac'o yac'beic smotone.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index