Search form

Números 13

Li Moisese la stac batel boch'o chbat sq'uelic c'u x'elan li osil te ta Canaane

(Dt 1.19-25)

1Li Muc'ul Diose la sc'opan yan velta li Moisese, jech laj yalbe:

2“Taco batel jayibuc viniquetic yu'un ac'o bat sq'uelic tal c'u x'elan li osil te ta Canaán ti chcac'be yich'ic li achi'iltac ta israelale. Taco batel jujun vinic ta jujuchop achi'iltac, ja' xatac batel li boch'otic oy yabtelic ta stojol achi'iltaquique”, xi.

3Li Moisese la spas jech chac c'u cha'al i'albat yu'un li Diose. La stac batel li viniquetique, te iliquic ta xocol banamil ta Parán. Scotolic oy yabtelic ta stojol li xchi'iltaquique. 4Li boch'otic ibatique, ja' Samúa, xnich'on Zacur liquem ta jchop yu'un Rubén. 5Li yane ja' Safat, xnich'on Hori, liquem ta jchop yu'un Simeón. 6Li yane ja' Caleb, xnich'on Jefone, liquem ta jchop yu'un Judá. 7Li yane ja' Igal, xnich'on Jos, liquem ta jchop yu'un Isacar. 8Li yane ja' Oseas, xnich'on Nun, liquem ta jchop yu'un Efraín. 9Li yane ja' Palti xnich'on Rafú, liquem ta jchop yu'un Benjamín. 10Li yane ja' Gadiel, xnich'on Sodi, liquem ta jchop yu'un Zabulón. 11Li yane ja' Gadi, xnich'on Susi, liquem ta jchop yu'un Jos (ja' li jchop liquemic ta Manasese). 12Li yane ja' Amiel, xnich'on Gemali, liquem ta jchop yu'un Dan. 13Li yane ja' Setur, xnich'on Micael, liquem ta jchop yu'un Aser. 14Li yane ja' Nahbi, xnich'on Vapsi, liquem ta jchop yu'un Neftalí. 15Li yane ja' Geuel, xnich'on Maqui, liquem ta jchop yu'un Gad.

16Scotol le'e ja' itacatic batel yu'un Moisés yu'un bat sq'uelic c'u x'elan li banamile. Li Oseas, xnich'on Nune, la sjel li sbie, ja' xa Josué ic'ot sbi.

17Li Moisese, la stac batel ta sq'uelel li Canaán banamile. Jech laj yalbe batel:

—Batanic te ta Néguev, te xamuyic batel ta vitsetic. 18Q'uelic lec c'u x'elan li banamile, xchi'uc q'uelic c'u x'elan li viniquetic tee, me tsots slomoic, o me c'unic no'ox, xchi'uc me epic, o me jutuc no'ox. 19Q'uelic lec noxtoc c'u x'elan li lumetic yu'unique, me pasbilic no'ox ta carpanaetic, o me setbilic lec ta coraltonetic. Xchi'uc q'uelic lec c'u x'elan li osile, me lec, o me mu lecuc, 20me lec yox, o me taquinaltic no'ox, me oy lec ste'tical o me mu'yuc. Mu me xaxi'ic; ich'beic tal jutuc sat li c'usitic xloc' te ta banamile —x'utatic batel yu'un li Moisese.

C'alal jech ic'ot ta pasele, ja'o yorail chtuch'ic li sba tuch'elal sat ts'usub yu'unic te ta Canaane. 21Jech ibatic li viniquetique, la sq'uelic lec c'u x'elan li osile. Lic sq'uelic te ta xocol banamil ta Zin ta stuq'uil sur, c'alal to ta Rehob ta stuq'uil norte ti nopol yiloj sba xchi'uc bu x'och sbelal Hamate. 22Te i'ochic batel ta Néguev, ic'otic c'alal to ta Hebrón. Ja' te nacajtic li Ahimán, Sesai, xchi'uc Talmai smomnich'nabtac Anaque. Li Hebrone svucubal xa'ox jabil smeltsajel c'alal laj yich' pasel li Zoán te ta Egiptoe. 23Te ic'otic c'alal to ta biq'uit uc'um Escol. Te laj yich'ic tal jec sc'ob ts'usub oy jchoj sat. La xojic tal ta te'; chib yajval la xq'uechic tal. Xchi'uc la stulic tal caranatoetic xchi'uc higoetic noxtoc. 24Li biq'uit uc'ume, Escol laj yac'beic sbi, ta sventa ti ja' te laj yich'ic tal jchoj ts'usub li israeletique.

25Cha'vinic (40) c'ac'al la sq'uelic c'u x'elan li osile, jech isutic tal. 26Te ivulic yan velta ta Cades ta xocol banamil ta Parán. Te ivul staic li Moisés, li Aarón, xchi'uc scotol li israeletique. Te vul yalic scotol li c'usi laj yilic tale, xchi'uc vul yaq'uic ta ilel li sat c'usitic yich'ojic tale. 27Jech laj yalbeic li Moisese:

—Ay xa jq'uelcutic tal c'u x'elan li osil yo' bu laj atacuncutic batele. Ta melel ja' jun banamil ti ep ta xloc' ya'lel xchu' vacax xchi'uc pom jech chac c'u cha'al chloc' vo'e. Li sat c'usitic te ch'iemique, ja' jech chac c'u cha'al li'i. 28Pero li cristianoetic te nacajtique, toj tsotsic, xchi'uc toj muc'tic li lumetic yu'unique, xchi'uc bats'i lec setbilic ta coralton ta joyob. Xchi'uc te laj quilbecutic sts'unubal li muc'ta natil vinic Anaque. 29Te ta nopol Negueve ja' te nacajtic li amalequetique. Ta toyolal te'tic ta vitsetique ja' te nacajtic li hetetique, li jebusetique, xchi'uc li amorretique. Te ta ti'ti' nab xchi'uc ta ti'ti' uc'um Jordane ja' te nacajtic li canaanetique —xiic.

30Li Calebe lic spajes ta lo'il li xchi'iltac te oyic ta stojol li Moisese. Jech laj yal:

—Ja' lec bat quich'tic li banamile. Ta xvu' cu'untic ti chbat quich'tique —xi.

31Pero li boch'otic ay xchi'in tal ta sq'uelele, jech laj yalic:

—Mo'oj, mu xu' cu'untic ta jnutstic loq'uel li cristianoetic le'e. Li stuquique ja' toj ech'em xu' yu'unic; mu xu' cu'untic li vu'utique —xiic.

32Jech lic yalbeic scotol israeletic ti mu'yuc lec li osil bu ay sq'uelic tale. Jech laj yalbeic:

—Li osil bu ay jq'uelcutic tale mu'yuc lec. Ta smilan li boch'otic te nacajtique. Li cristianoetic te nacajtique, ven muc'tic ta jyalel. 33Te laj quilcutic noxtoc natil viniquetic, ja' li smomnich'nabtac Anaque. C'alal lic'otcutic li vu'uncutique, bats'i mu'yuc xa jtu laj ca'icutic. Jcot ta xc'ajben lic'otcutic, xchi'uc jech laj yiluncutic ec li stuquique —xiic.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index