Search form

Números 14

Li israeletique la stoy sbaic ta stojol Muc'ul Dios

(Dt 1.26-23)

1Jech scotol li israeletique lic avanicuc. Sbejel ac'ubal puru oq'uel la spasic. 2Scotolic lic chopol c'opojicuc ta stojol li Moisés xchi'uc Aarone. Jech laj yalic: “Ja' lec ti teuc ono'ox chamcutic ta Egiptoe, xchi'uc ti li'uc chamcutic ta xocol banamile. 3¿C'usi stu cu'untic ti laj yic'utic tal li' ta banamil li Diose? Yu'un ja' no'ox tal cac' jbatic ta milel ta pleito. Li cajnil jnich'nabtique ch-ochic ta sc'ob li cajcontratique. Ja' lec sutcutic batel ta Egipto”, xiic. 4Jech lic yalbe sbaic: “Jsa'tic junuc banquilal cu'untic yu'un ja' ac'o yic'utic sutel ta Egipto”, xiic.

5Li Moisés xchi'uc Aarone la spatan sbaic ta banamil ta stojol scotol li xchi'iltaquique. 6Li Josué xchi'uc Caleb ti ja' ay sq'uelic tal c'u x'elan li osile, la sli' sc'u'ic, ja' senyail ti mu xa xnel li at-o'nton laj ya'yique. 7Jech lic yalbeic scotol li xchi'iltaquique:

—¡Li osil ay jq'uelcutic tale, bats'i lec ta jyalel! 8Me ta melel lec chijyilutic li Diose, ja' chijyic'utic ochel yo' bu li banamile, xchi'uc chijyac'butic quich'tic o. Yu'un ja' jun banamil ti bu ta xloc' ep ya'lel xchu' vacax xchi'uc pom jech chac c'u cha'al ta xloc' vo'e. 9Pero ja' tsc'an ti mu xatoy abaic ta stojol li Muc'ul Diose, xchi'uc tsc'an ti mu xaxi'ic yu'un li cristianoetic te nacajtique. Ja' no'ox jech xu' ta jlajestic jech chac c'u cha'al ta jlajestic pane. Li stuquique mu'yuc boch'o xu' chcoltaatic. Yan li vu'utique li' oy ta jtojoltic li Muc'ul Diose. Ja' lec mu xaxi'ic —xiic.

10C'alal ja'o jech chalique, scotol li israeletique tsc'an chac'beic ox ton. Jech te lic vinajuc xojobal Muc'ul Dios ta ch'ulna pasbil ta nucul ta stojol scotol li israeletique. 11Li Muc'ul Diose jech laj yalbe li Moisese:

—¿Baq'uin to chlic lecubuc yo'ntonic ta jtojol li cristianoetic li'i? ¿Baq'uin to chlic xch'unic lec?, yu'un ep xa sq'uelubil jtsatsal la jpas ta stojolic. 12Ta jtac tal jun tsatsal chamel ta stojolic yu'un ac'o chamicuc o, yu'un jech mu me xich'ic o li osile. Pero li vo'ote ta xcac' licuc jun muc'ta lum ta aventa, lec tsots ta xbatic. Li achi'iltaque mu'yuc c'usi xu' yu'unic o —xi li Muc'ul Diose.

13Pero li Moisese jech la stac'be li Muc'ul Diose:

—Li vo'ote ta atsatsal ta avu'el laj aloq'ues tal ta Egipto li jchi'iltaque. C'alal me cha'yic egiptoetic li c'usi chlic apase, 14xu' chlic yalbe ya'yic li jnaclumetic te ta Canaán banamile. Yu'un li stuquique ya'yojic ti li' oyot ta o'lol yu'unic li jchi'iltac, vo'ot li Muc'ul Diosote. Xchi'uc ya'yojic ti chavac' aba lec ta ilel ta stojolique, xchi'uc ti li' oy ta stojolic li toc avu'une. Xchi'uc ya'yojic ti ba'yucbe chabat ta toc yu'unic ta c'ac'altique xchi'uc ti chc'ataj ta c'oc' ta ac'ubaltic sventa tsna' bu chbatique. 15Pero me chlic amil ta ora no'ox li jchi'iltaque, li yantic cristianoetic ti ya'yojic lec ac'oplale, jech chlic yalic: 16‘Li Muc'ul Diose muc xu' yu'un stiq'uel ochel ta Canaán banamil li israeletic ti bu yalojbe ono'ox chac'bee, ja' yu'un te no'ox la smil ta xocol banamil’, xi ac'oplal yu'unic. 17Ja' yu'un, Cajval cu'un, li' ta orae ac'o ta ilel li avu'el jech chac c'u cha'al avaloj ono'oxe. Yu'un avaloj 18ti muc ta aniluc cha'iline, ti toj ep slequil avo'ntone, ti chach'aybe ta avo'nton smulic li jpasmuliletique xchi'uc li boch'otic tstoy sbaic ta atojole. Ta jna' noxtoc ti ma'uc yu'un mu'yuc chavac'be o stoj smulic li boch'otic tsa' smulique. Ta ono'ox xavac'be stoj smulic, xchi'uc chavac'be xcuch c'alal to ta yoxc'olal xchanc'olal yalab xnich'nabic. 19Pero ta sventa ti toj ep slequil avo'ntone, pasbo perdón yu'un smulic li jchi'iltac li'i, yu'un lic ono'ox ats'icbe tal c'u x'elan stalelic te ta Egipto xchi'uc c'alal to li' yo' bu oyuncutique —xi li Moisese.

Li Muc'ul Diose laj yac'be stoj smulic li israeletique

(Dt 1.34-40)

20Li Muc'ul Diose jech la stac':

—Lec oy, ta jch'aybe ta co'nton smulic jech chac c'u cha'al chac'ane. 21Pero oy ono'ox c'usi ta jpasbeic ta sventa ti vu'un cuxulun ta melele, xchi'uc ta sventa ti ech'em jxojobale. 22Scotol li boch'otic laj xa yilic jtsatsale, xchi'uc ti laj yilic li senyail la jpas te ta Egipto xchi'uc ta xocol banamile, xchi'uc ti ep xa ta velta ja' no'ox la sq'uelbicun c'u x'elan co'ntone, ti mu xch'unic li jmantale, 23le'e me junuc mu'yuc chbat sq'uelic c'u x'elan li osil yo' bu caloj ono'ox chcac'beic li smoltotaquic ta vo'onee. Li boch'o chopol laj yilicune, me junuc mu'yuc ta xilic. 24Ja' no'ox li cajtunel Caleb ti mu ja'uc jech yo'nton eq'ue, ja' ta xcac' ochuc batel te ta banamil ti bu ay sq'uel tal c'u x'elane yu'un tuc' yo'nton ta jtojol. Te ta xlic naquiicuc o xchi'uc smomnich'nabtac. 25(Li amalequetic xchi'uc canaanetique te nacajtic ta stenlejaltic). Li vo'oxuque chasutic batel oc'om. Tamic batel li be xbat ta xocol banamil xc'ot ta Tsajal Nabe —xi li Muc'ul Diose.

26Li Muc'ul Diose la sc'opan yan velta li Moisés xchi'uc Aarone, jech laj yalbe:

27—¿Baq'uin to xu' chlaj ts'icumal cu'un ta stojol li achi'iltac ta israelal ti ep ta xchopolc'opojic ta jtojole? Yu'un ca'yoj ti ep c'usi chopol chalic ta jtojole. 28Ja' lec bat albo ya'yic achi'iltac li c'usi chcal li'i: ‘Vu'un li cuxul Muc'ul Diosune, jech jamal chcal. Ti c'u x'elan ca'yoj chavalique, ja' jech ta xcac' c'otuc o ta pasel. 29Scotol li boch'otic oy xa jtob (20) sjabilalic ti ochem xa ta vun sbiique, ti chopol c'opojemic ta jtojole, ta xchamic scotolic. Li sbec'talique te no'ox telajtic chcomic ta xocol banamil. 30Ja' no'ox chcomic li Caleb xchi'uc Josuee. Li vo'oxuque me junuc mu'yuc cha'ochic batel ta banamil ti bu laj calboxuc chbat cac' naclanique. 31Li anich'nabic vo'oxuc ti laj avalic chastsaloxuc avajcontraique, ja' ta xquiq'uic batel te ta banamil yo' bu laj abajic li vo'oxuque, ja' chbat sc'upinic ya'yic c'u slequil. 32Li vo'oxuque, li' telajtic chcomic ta xocol banamil li abec'talique. 33Li anich'nabique cha'vinic (40) jabil chcomic li' ta xocol banamil jech chac c'u cha'al jchabichijetic no'ox. Yu'un ja' ta stojboxuc ti mu junuc avo'ntonic ta jtojole, ja' to me lacham acotolic li' ta xocol banamil li vo'oxuque. 34Li vo'oxuque cha'vinic (40) c'ac'al ay aq'uelic tal c'u x'elan li osile. Ja' chc'ataj ta avocolic, jech cha'vinic (40) jabil puru xanubal chapasic li' ta xocol banamil. Li jun c'ac'ale ja' jun jabil stojol amulic chc'ot. Jech chana'ic o ti mu lecuc ti chacontrainicune’, uto li achi'iltaque. 35Vu'un li Muc'ul Diosune, jbel jech chcal o: Ja' jech ta jpasbe li jbajmantal cristianoetic li'i, ti jmoj la scontrainicune. Li' ta xchamic ta xocol banamil, jech ta xlaj sc'oplalic o, uto li achi'iltaque —xi li Muc'ul Diose.

Lajuneb ichamic li boch'otic ay sq'uelic tal c'u x'elan li osile

36-37Li viniquetic ti itacatic batel yu'un Moisés ta sq'uelel c'u x'elan li banamile, ti mu'yuc lec c'usi vul yalbeic li xchi'iltaquique, xchi'uc ti ja' ta scojic lic sjapuic bic'talvulajetel ta stojol Muc'ul Dios li yantique, le'e te no'ox imilatic yu'un li Muc'ul Diose. 38Ja' xa no'ox cuxul icom li Josué xchi'uc Calebe.

Itsalatic te ta Horma li israeletique

(Dt 1.41-46)

39C'alal laj yalbe xchi'iltac Moisés scotol li c'usitic i'albat yu'un Muc'ul Diose, tsots lic yat yo'nton scotolic. 40Ta yoc'omal sob iliquic, imuyic batel ta vitstic ta toyolaltic. Jech laj yalic:

—Li' xa oyutique. Batic te ta banamil ti bu yaloj ono'ox Muc'ul Dios chijyac'butique. Ta melel jtaoj xa jmultic ta stojol —xiic.

41Pero li Moisese jech lic yalbe:

—¿C'u yu'un ti chabajbeic smantal li Muc'ul Diose? Li c'usi chac'an chapasique ja' no'ox chata avocolic o. 42Mu me xabatic ta yipal avo'ntonic yu'un li Muc'ul Diose mu'yuc xa xchi'inojoxuc. Ta me xastsaloxuc tal li avajcontraique. 43Te me smalaojoxuc li amalequetique xchi'uc li canaanetique yu'un tsc'an ac'o apasic pleito achi'uquic, jech te chasmiloxuc acotolic. Li vo'oxuque laj xa acomtsanic li Muc'ul Diose, jech mu'yuc xa li' xchi'inojoxuc ec —x'utatic yu'un li Moisese.

44Pero li stuquique ijelovic ono'ox batel ta yipal yo'ntonic; imuyic batel te ta vitstic ta toyolaltic. Pero li xcaxail smantal Muc'ul Diose xchi'uc li Moisese me jutuc muc stotsic batel. 45Li amalequetic xchi'uc canaanetic te nacajtique iloq'uic tal scotolic. La snutsic tal scotol c'alal to ta Horma li israeletique. Jech tsalbil icomic o li israeletique.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index