Search form

Números 15

Mantaletic sventa c'u x'elan tsmilbeic smoton Dios

1Li Muc'ul Diose la sc'opan li Moisese. Jech laj yalbe:

2“Bat albo ya'yic li achi'iltac jech chac li'i: Chacalboxuc ava'yic c'usi tsc'an chapasic c'alal me la'ochic xa'ox batel ta banamil ti bu sc'oplal chacac'boxuc sventa te chanaquiique. 3-4C'alal chavac'bicun jmotonin jcot tot vacax, o me jcot chij sventa chachiq'uic yu'un chavich'icun ta muq'ue, ac'beic xchi'ilin batel chibuc kilo lequil arina vots'bil o ta jun litro aceite. Ja' jech tsc'an chapasic jech chac c'u cha'al c'alal chavac'bicun milbil matanal, o me ja' ti chich' chiq'uel scotlijil ti lec mu yiq'ue. C'usiuc no'ox matanalil, me ja' sventa ti its'aqui xa avu'unic li c'usi avalojic ta jtojol chapasique, o me ja' sventa li matanal ti ta yutsil no'ox avo'nton chavaq'uique, persa chavac'beic batel xchi'il. 5Jech noxtoc li milbil matanal jech chac c'u cha'al laj xa yich' alel tale, ac'beic xchi'ilin batel junuc litro ya'lel ts'usub li jujucot chije. 6Yan me ja' sventa chich' milel jcot tot chije, ac'beic xchi'ilin chanibuc kilo arina. Ac'o svots'ic o ech'em jutuc ta jun litro aceite, 7xchi'uc ech'em jutuc ta jun litro ya'lel ts'usub, yu'un ja' matanal chich' chiq'uel ta jventa ti lec mu yiq'ue. 8Yan me ja' sventa jcot vacax chich' milele, me chic'bil scotlijil tsc'an, o me ja' milbil matanal sventa lec chaquiloxuque, o me ja' sventa ti its'aqui xa li c'usi avalojic ta jtojol chapasique, 9ac'beic xchi'ilin vaquib kilo arina vots'bil o ta chib litro aceite, 10xchi'uc yan chib litro ya'lel ts'usub yu'un ja' matanal chich' chiq'uel ta jventa ti lec mu yiq'ue. 11Ja' jech tsc'an chapasic ta jujucot vacax, ta jujucot chij, o ta jujucot ch'ium chij, o ta jujucot ch'ium tentsun ti chavac'bicun jmotonine. 12Li jujucot ta jujuchop ats'unub avovolic chavac'bicun jmotonine, ja' jech tsc'an chapasic o. 13Scotol israeletic tsc'an jech tspasic c'alal chiyac'bicun chic'bil matanal ti lec mu yiq'ue.

14“Me oy jun yanlum cristiano te nacal ta atojolique, o me jelovel no'ox chjelov ti tsc'an chiyac'bicun chic'bil matanal ti lec mu yiq'ue, ac'o spasic jech chac c'u cha'al chapasic acotolic li vo'oxuque. 15Li mantaletic laj calboxuque, ja' ta xtun ta sventa vo'oxuc, xchi'uc ta sventa yanlum cristianoetic. Ja' jun mantal ta xcom o avu'unic. Jech ta xcom o ta totil me'il c'alal ta alab nich'nab. 16Jun no'ox mantal ta xcom avu'un acotolic achi'uquic li yanlum cristianoetique”, xi li Muc'ul Diose.

17Li Muc'ul Diose la sc'opan yan velta li Moisese. Jech laj yalbe:

18“Jech xavalbe ya'yic scotol li achi'iltac ta israelale: C'alal me te xa nacaloxuc ta banamil yo' bu chaquic'oxuc batele, 19me lic xa atunesic li trigo ti chloc' te ta banamile, tsc'an me chavoq'uic ti c'u yepal chavac'bicune. 20Jech chac c'u cha'al chavac'bicun jmotonin li bec' trigo ti sba to chloc' avu'unique, ja' jech tsc'an chapasic noxtoc ta sventa li arina ti sba to chavots'ique, pasic ta pan. Ja' xavac'bicun jmotonin. 21Li matanaletic laj calboxuc sc'oplale, tsc'an me chavaq'uilanic o.

22-23“Li mantaletic laj calbe Moisés ti icom o c'alal ta amomnich'nabique, tsc'an chlic apasilanic o batel scotol ora. Pero me oy chc'ot ta pasel ti muc ta yutsiluc avo'ntonic mu xapasique, tsc'an jech chapasic chac li'i:

24“Me acotolic ta sjunul lum jech chc'ot ta pasel yu'unic ti muc ta yutsiluc yo'ntonic muc spasique, scotolic ac'o yac'bicun jcot vacax sventa chich' chiq'uel ti lec mu yiq'ue. Ac'o yaq'uic noxtoc trigo xchi'uc ya'lel ts'usub ti yaloj ono'ox Muc'ul Dios tsc'an te capal chich' aq'uele. Jech noxtoc ac'o yac'bicun jcot tentsun. Ja' milbil matanal sventa amulic. 25Li palee ac'o yac'bun li jmoton sventa xch'ayubil amulic acotolique. Jech li vu'une ta jch'aybe ta co'nton smulic, yu'un muc ta yutsiluc yo'ntonic muc spasic li c'usi caloje, xchi'uc laj yac'bicun li jmoton sventa smulique. 26Ti me muc ta yutsiluc yo'ntonic la sta smulique, vu'un ta jpasboxuc perdón amulic acotolic vo'oxuc li israeloxuque xchi'uc li yanlum cristianoetic te nacalic yo' bu oyoxuque.

27“Me jun no'ox muc xch'un jmantale, pero me muc ta yutsiluc yo'nton la spase, ac'o yac'bun jmotonin jcotuc ch'ium me' tentsun ti jun to jabil svoq'uele. Ja' matanal ta sventa li smule. 28Jech li palee ac'o stoy sc'ob ta jtojol sventa ac'o ch'aybatuc smul li boch'o oy smul ti muc ta yutsiluc yo'nton la spase, jech ta jpasbe perdón yu'un li smule. 29Li c'usi laj calboxuc li'i, ja' ta xtun ta aventaic vo'oxuc xchi'uc ta xtun ta sventa li yanlum cristianoetic te nacalic ta atojolique. Pero ja' no'ox ta sventa li smulic ti muc ta yutsiluc yo'nton tspasique.

30“Pero me oy junuc boch'o yutsil yo'nton la sa' smule, oy xa smul o ta jtojol, boch'ouc no'ox, me israel, o me yanlum cristiano. Li boch'o jech la spase, ac'o yich' loq'uesel ta atojolic. 31Yu'un muc xich' ta muc' li jc'ope; la sbajbun li jmantale. Jech j'ech'el ac'o loc'uc o ta atojolic. Te xcuchojuc o batel li smule”, xi li Muc'ul Diose.

Ta stoj smul li boch'o mu xchabi sc'ac'alil cuxub o'ntonale

32C'alal te oyic ta xocol banamil li israeletique, oy la staic jun vinic ta sa' si' ta sc'ac'alil ta xcux yo'ntonic. 33C'alal laj yilique, laj yiq'uic batel ta stojol li Moisés xchi'uc Aarone, xchi'uc ta stojol scotol li xchi'iltaquique. 34C'alal i'och ta sc'obique, te to no'ox la xchabiic yu'un mu'yuc to xchapanojic c'usi xu' ta spasbeic. 35Ja' yu'un li Moisese te lic c'opanatuc yu'un li Muc'ul Diose, jech i'albat: “Li vinic le'e ac'o yich' milel ta ton. Scotol li achi'iltac ta israelale ac'o bat smilic ta ton ta spat to ti bu oy acarpanaique”, x'utat.

36Jech scotol li israeletique laj yiq'uic batel ta spat to ti bu oy scarpanaique. Laj yac'beic ton, ja' to ilaj yo'ntonic ti c'alal icham yu'unique. Ja' jech la spasic jech chac c'u cha'al i'albat yu'un Muc'ul Dios li Moisese.

I'albatic yu'un Dios ti ac'o yac'beic stsitsumal yoc sc'u'ic li israeletique

37Li Muc'ul Diose la sc'opan li Moisese. Jech laj yalbe:

38“Jech xavalbe ya'yic li achi'iltac ta israelale: Li vo'oxuque xchi'uc li amomnich'nabtaquique tsc'an chavac'beic xnich ta yoc ac'u'ique, lec volajtic xavac'beic. Li xnich ti tsc'an chavaq'uique yax'elantic sba. 39Jech c'alal cht'ab ta asatic li xnich ac'u'ique, te cht'ab o ta avo'ntonic scotol li jmantaltac ti calojboxuc tsc'an chach'unique. Jech mu ja'uc chbat ta avo'ntonic o snopel li c'usi chac'an atuquique. Jech mu xyanij avo'ntonic ta jtojol. 40Jech te chana'ilanic o scotol li jmantaltaque, xchi'uc jech chach'unic. Jech voc'biloxuc o ta jtojol, vu'un li Muc'ul Diosun avu'unique. 41Vu'un Muc'ul Diosun, vu'un Diosun avu'unic ti la jloq'uesoxuc ta Egipto banamile, yu'un jech vu'un Diosun chic'ot avu'unic. Vu'un Muc'ul Diosun”, xi li Muc'ul Diose.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index