Search form

Números 16

La stoj smul c'alal la stoy sba li Coree

1Oy jun leví vinic, ja' smomnich'on li Coate, Coré sbi. Ja' xnich'on li Izhare. Xchi'uc oy yan oxib viniquetic liquemic ta jchop yu'un Rubén. Ja' Datán xchi'uc Abiram sbiic, ja' xnich'nab Eliab, xchi'uc On, xnich'on Pelet. 2Li viniquetic le'e ja' lic scontrainic li Moisese. La stsob yan o'lol yoxibal ciento (250) xchi'ilic; ja' puru israeletic, xchi'uc puru oy yabtelic ta stojol xchi'iltaquic. Ja' lec otquinbilic, xchi'uc oy ta sventaic tstojobtasic li xchi'iltaquique. 3Scotolic la stsob sbaic batel ta stojol li Moisés xchi'uc Aarone. Jech c'ot yalbeic:

—Li' no'ox c'alal avabtelic li vo'oxuque. Scotol jchi'iltactic t'ujbilic yu'un Dios xu' chtunic yu'un, xchi'uc jcotoltic li' oy ta jtojoltic li Muc'ul Diose. ¿C'u yu'un ti toj muc' chavac' abaic xchi'uc avabtelic ta stojol li steclumal Diose? —xutic.

4C'alal laj ya'ay jech li Moisese, la spatan sba ta banamil. 5Jech laj yalbe li Coré xchi'uc xchi'iltaque:

—Li Muc'ul Diose sob oc'om chac' ta ilel li boch'o ja' yu'une xchi'uc li boch'o t'ujbil yu'un sventa chchic'be smotone. Ja' no'ox xu' chchic'be smoton Dios li boch'o t'ujbil yu'un stuque. 6Pasic jech chac li'i: Vo'ot Coré, xavich' tal li xchic'ubil pom avu'une. Ac'o yich'ic tal ec li achi'iltaque. 7Ac'beic yac'alil xchi'uc pom. Oc'om xtal achiq'uic ta stojol li Muc'ul Diose. Li vinic ti tst'uj stuc Diose, ja' voc'bil chcom o ta sventa yabtel li Diose. Te no'ox c'alal avabtelic vo'oxuc li levioxuque —xi li Moisese.

8Li Moisese jech laj yalbe noxtoc li Coree:

—A'yo ava'yic levietic: 9¿Me yu'un mu xu' no'ox chava'yic ti t'ujbiloxuc loq'uel yu'un Dios ta stojol scotol jchi'iltactic ta israelal sventa chatunic yu'un te ta ch'ulna pasbil ta nucule? Xchi'uc ¿me mu xu' no'ox chava'yic ti chatunic ta stojol li jchi'iltactique yu'un chanopajic ono'ox batel ta stojol li Muc'ul Diose? 10Li Muc'ul Diose jech la sc'an ti la st'ujoxuc vo'oxuc li levioxuque yu'un ac'o nopoluc oyoxuc ta stojol li Muc'ul Diose. Pero li' ta orae, chac'an chatic' abaic ta paleal noxtoc. 11Ta melel ma'uc ta sventa Aarón ti chachopolc'opojic ta stojole. Ja' xa chacontrainic stuc li Muc'ul Diose. Chatoy abaic ta stojol achi'uc li achi'iltaque —xut.

12Li Moisese la stac ta iq'uel li Datán xchi'uc Abirame, ja' li xnich'nab Eliabe. Pero li stuquique jech laj yalic:

—Mu jc'an xibatcutic. 13¿Me yu'un mu'yuc tsots sc'oplal ta avo'nton ti laj aloq'uesuncutic tal ta jun banamil ti bu ta xloc' ep ya'lel xchu' vacax xchi'uc pom jech chac c'u cha'al chloc' vo'e? ¿Me yu'un chac'an li' chavac' chamcuncutic ta xocol banamil? Xchi'uc ¿me yu'un chac'an ti vo'ot no'ox banquilal jpasmantalot cu'uncutique? 14Li vo'ote, mu'yuc chavic'uncutic ochel ta junuc banamil ti bu ta xloc' ep ya'lel xchu' vacax xchi'uc pom jech chac c'u cha'al ta xloc' vo'e. Xchi'uc mu'yuc bu avac'ojbun cosilcutic sventa jts'usubcutic. Ja' chac'an ti solel ta jch'uncutic xa no'ox iq'uel batel avu'un jech chac c'u cha'al ma'satetique. Mo'oj to ca'tic, mu jc'an xajq'uelotcutic o —xiic.

15Li Moisese tsots lic ilinuc. Jech laj yalbe li Muc'ul Diose:

—Mu me xatsacbe li amoton chayac'boxuque. Li vu'une mu'yuc c'usi la jpojbeic, me jcotuc sburoic mu'yuc jpojojbeic. Xchi'uc me jutuc mu'yuc c'usi chopol jpasojbeic —xut.

16Ts'acal jech laj yalbe noxtoc li Coree:

—Oc'om xatalic li' ta stojol Muc'ul Dios xchi'uc li achi'iltaque. Jech ec li Aarone ta xtal sva'an sba li' ta stojol Muc'ul Dios ec. 17Li achi'iltaque ac'o yich' tal li xchic'ubil pom yu'unic jujunique, xchi'uc te ac'o yaq'uic tal li pome. Jech ec li vo'ot xchi'uc Aarone xavich'ic batel ec li xchic'ubil pom avu'unique. Te jmoj xavaq'uic ta stojol Muc'ul Dios xchi'uc li xchic'ubil pom yu'un o'lol yoxibal ciento (250) achi'iltaque —xut.

18Jech ta jujuntal laj yich'ic batel li xchic'ubil pom yu'unique. Laj yac'beic yac'alil xchi'uc pom. Te jmoj c'ot yaq'uic xchi'uc Moisés xchi'uc Aarón ta sti' li ch'ulna pasbil ta nucule. 19Li Coree stsoboj xa tal scotol te ta stuq'uil ti'ch'ulna li xchi'iltaquic ta israelale yu'un tscontrainic li Moisés xchi'uc Aarone. Te ivinaj xojobal Muc'ul Dios ta stojol scotol li israeletique. 20Li Muc'ul Diose jech laj yalbe li Moisés xchi'uc Aarone:

21—Voc'o abaic loq'uel ta stojol li achi'iltaquique yu'un ta xculesic scotolic ta ora no'ox —x'utatic.

6 22Pero li stuquique la squejan spatan sbaic ta banamil. Jech laj yalic:

—Dios, vo'ot ti avac'ojbe yorailic li cristianoetique, ¿me cha'ilin ta stojol scotol jchi'iltac ta scoj smul li jun vinique? —xutic li Muc'ul Diose.

23Li Muc'ul Diose jech la stac'be li Moisese:

24—Albo scotol achi'iltac ta israelal ti ac'o svoc' sbaic loq'uel te yo' bu scarpanaic li Coré, Datán, xchi'uc Abirame —xi.

25Li Moisese itotsic xchi'uc li banquilaletic yu'un israeletique. Te ibatic ta anil yo' bu oyic li Datán xchi'uc Abirame. 26Jech c'ot yalbeic li xchi'iltaquique:

—Voc'o abaic loq'uel li' ta scarpanaic li chopol viniquetic le'e. Me jutuc mu me xapicbeic li c'usi ja' yu'unique; ma'uc me co'ol xacham achi'uquic ta scoj smulique —xutic.

27Li israeletique la svoc' sbaic loq'uel yo' bu oyic li Coré, Datán, xchi'uc Abirame. Li Datán xchi'uc Abirame te va'ajtic ta sti' scarpanaic xchi'uc yajnil xnich'nabic. 28Li Moisese jech laj yal noxtoc:

—Li c'usi chc'ot ta pasel li'i, ja' sventa chana'ic o ti ta melel ja' Muc'ul Dios la stacun tal sventa ta jpas scotol li c'usi ta jpase, ti muc ta co'ntonuc jtuc ta jpase. 29Me ja' jech ta xcham li viniquetic li'i jech chac c'u cha'al chcham ono'ox li cristianoetique, ja' svinajeb ti muc ja'uc Muc'ul Dios la stacun tale. 30Pero me yan o c'usi tspas li Diose, me ta xjav li banamile, me cuxajtic ta x'ochic yalel ta yut banamil xchi'uc c'usitic oy yu'unic li viniquetic li'i, jech chana'ic o ti yu'un la stoy sbaic ta stojol li Muc'ul Diose —xi li Moisese.

31C'alal ilaj yo'nton ta lo'il li Moisese, ijav li banamil te yo' bu va'ajtique. 32Te i'ochic yalel li viniquetic ti co'ol yo'ntonic xchi'uc li Coree. Te i'ochic xchi'uc yajnil xnich'nabic, xchi'uc scotol c'usitic oy yu'unic. 33Cuxajtic i'ochic yalel ta yut banamil xchi'uc scotol li c'usitic oy yu'unique, jech ta ora la snu'p sba yan velta li banamile. Jech te ich'ay o sts'unubalic ta stojol li xchi'iltaquique. 34Li boch'otic ibic'atic ochel yu'un banamile, tsots i'avanic. Scotol li israeletic te setelique, ijatovic loq'uel ta anil. Jech laj yalic: “Mu me xisbic'uncutic ochel ec li banamile”, xiic. 35Jech noxtoc la stac tal c'oc' li Muc'ul Diose, jech la smil ta c'oc' scotol li o'lol yoxibal ciento (250) viniquetic ti la xchiq'uic pom ta stojol Diose.

36Li Muc'ul Diose la sc'opan li Moisese jech laj yalbe:

37“Albo li Eleazar xnich'on Aarone, ac'o bat sloq'ues tal li xchic'ubil pom te ta o'lol yo' bu ilajic ta c'oc' li viniquetique. Nom to ac'o bat sjipic comel li ac'aletic te oy ta yute. 38Li xchic'ubil pom yu'unic li viniquetic ti ichamic ta scoj smulique, lecubtasbil xa cu'un yu'un laj yich' tunesel sventa laj yich' chiq'uel pom ta jtojol. Tuq'uibtasic lec, ac'o comuc avu'unic jech chac c'u cha'al lámina. Ac'o tunuc sventa chamaquic o li scajleb jmotone, xchi'uc sventa svulesubil ta yo'nton achi'iltaquic li c'usi ic'ot ta pasele”, xi.

39Li pale Eleazare bat stsob li xchic'ubil pom ti pasbilic ta bronce taq'uin te yo' bu ichamic ta c'oc' li viniquetique. Laj yal mantal ti ac'o stuq'uibtasic lec jech chac c'u cha'al laminae yu'un chtun sventa tsmaquic o li scajleb smoton Diose. 40Xchi'uc ja' sventa cht'ab o ta yo'nton israeletic ti mu xu' boch'ouc no'ox chnopaj batel ta scajleb smoton Dios sventa chbat xchic' pom ti me muc ja'uc smomnich'nab Aarone. Me oy boch'o jech tspase, xu' chc'ot ta pasel ta stojol ec jech chac c'u cha'al ic'ot ta stojol li Coré xchi'uc xchi'iltaque. Jech laj yich' pasel jech chac c'u cha'al laj yich' albel yu'un Muc'ul Dios li Eleazar ta sventa Moisese.

41Ta yoc'omal lic chopolc'opojicuc ta stojol Moisés xchi'uc Aarón scotol li israeletique. Jech laj yalbeic:

—Vo'oxuc laj amilic li xnich'nabtac Muc'ul Diose —xiic.

42C'alal te tsobol scotol israeletic ta scontrainel li Moisés xchi'uc Aarone, la sq'uelic batel li ch'ulna pasbil ta nucule. Laj yilic imac ta toc, xchi'uc te ivinaj xojobal li Muc'ul Diose. 43Li Moisés xchi'uc Aarone ibatic te ta ch'ulna pasbil ta nucul. 44Li Moisese jech i'albat yu'un li Muc'ul Diose:

45—Voc'o abaic loq'uel ta stojol li achi'iltaquique yu'un ta xcules scotolic ta ora no'ox —xi.

Li Moisés xchi'uc Aarone la spatan sbaic ta banamil. 46Li Moisese jech laj yalbe li Aarone:

—Bat ich'o tal li xchic'ubil pom avu'une. Ac'bo yac'alil, ja' xavac' li ac'al te ta scajleb smoton Diose, xchi'uc pom. Batan ta ora yo' bu oyic li jchi'iltactique; bat c'anbo Muc'ul Dios ti ac'o xch'aybe ta yo'nton li smulique. Yu'un li Muc'ul Diose bats'i tsots ilinem ta stojolic, xchi'uc liquem xa ta stojolic li tsatsal chamel ti chmilvane —xi.

47Li Aarone la spas jech chac c'u cha'al i'albat yu'un li Moisese. Ibat ta anil yo' bu oyic li xchi'iltaquique. Li xchi'iltaquique yochelic xa ta lajel ta tsatsal chamel ti stacoj tal Muc'ul Diose. Ja' yu'un li Aarone lic yac' pom ta stojol li Diose. Laj yac' ta ch'aybel smul scotol li xchi'iltaque. 48Bat yac' sba ta o'lol yu'un li boch'otic chamenic xa xchi'uc li boch'otic cuxajtic toe, jech ipaj li chamele. 49Pero ichamic xa'ox chanlajunmil xchi'uc vucub ciento (14,700) ta scotol. Ja' slecoj o ti ichamic ono'ox c'alal la stoy sba li Coree. 50C'alal i'ech' li chamele, li Aarone ibat yan velta te ta ti'ch'ulna pasbil ta nucul yo' bu oy li Moisese.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index