Search form

Números 23

1Li Balaame jech lic yal:

—Pasbicun vucub scajleb smoton Dios li'i. Meltsanic vuccot ch'ium vacax xchi'uc vuccot ch'ium chij —xi.

2Li Balaque la xch'un c'usi laj yal li Balaame, jech xchibalic la smilic jcot vacax xchi'uc jcot ch'ium chij ta jujun li scajleb smoton Diose.

3Li Balaame jech laj yalbe li Balaque:

—Coman li' yo' bu la jmilbetic smoton Diose. Li vu'une, chbat jq'uel me chtal sc'opanun li Muc'ul Diose. Me oy c'usi chiyalbune, te chacalbot ava'ay —xut.

Li Balaame la sc'anbe bendición li israeletique

Li Balaame ibat ta jun vits ti lec ta jamalaltic oye. 4Te ital c'opanatuc yu'un li Diose. Li Balaame jech laj yalbe li Diose:

—Laj xa jmeltsan vucub scajleb amoton. Laj xa jmil jujucot vacax xchi'uc jujucot ch'ium chij ta jujun li scajleb amotone —xut.

5Li Muc'ul Diose laj yac' ti ja' ac'o loc'uc ta ye Balaam li c'usi oy ta yo'nton Muc'ul Diose. Jech laj yalbe:

—Sutan batel yo' bu oy li Balaque. Ja' no'ox xc'ot avalbe li c'usi laj calbote —xut.

6Jech isut batel yo' bu oy li Balaque xchi'uc li banquilaletic yu'un moabetic yo' bu la smilbeic smoton Diose. 7Jech li Balaame lic c'opojuc jech chac c'u cha'al jun j'alc'op:

“Le' to ta vitsetic ta sloq'ueb c'ac'al ta Aram,

ay yic'un tal li Balac, ja' li ajvalil yu'un moabetique:

‘La' me, lajesbo stsatsal li Israele;

c'anbo ti ac'o oyuc svocol li yalab xnich'nab Jacobe’, xiyutun.

8Pero ¿c'uxi chcut ta xcuts'intaic ti me mu jechuc tsc'an li Diose?

¿C'uxi chcut ta jc'an ac'o oyuc svocolic me mu sc'an stuc li Muc'ul Diose?

9Li' ta toyol ch'entic lec xquil batel;

li' ta toyol vitsetic ta jq'uel batel.

Ja' jun lum ti voc'bilique;

mu xco'laj xchi'uc yantic lumetic.

10Co'olic jech chac c'u cha'al pucuc.

Mu'yuc boch'o xu' yu'un chata c'u yepal;

mu'yuc boch'o sna' jayibic.

Oyuc c'uxi jech xicham ec jech chac c'u cha'al li boch'otic tuc' yo'ntonic le'e.

Ja' ta jta ec li c'usi tstaic ti jechuque”, xi li Balaame.

11Li Balaque jech lic yalbe li Balaame:

—¿C'usi chapas le'e? Laj quic'ot tal sventa tal alajesbun stsatsal li cajcontrae. Pero li vo'ote avochel sc'anbel bendición ta stojolic —xut.

12Itac'ov li Balaame:

—Laj caltic ti ja' no'ox xu' chcal c'usi chiyalbun li Muc'ul Diose —xut.

13Pero li Balaque mu xlaj yo'nton, jech laj yalbe:

—Batic le' ta jot yo' bu ja' no'ox xvinaj sti'ti' bu spasoj scarpanaique. Te xbat ac'anbun c'usi chopol ta stojolic —xut.

14Li Balaque laj yic' batel ta stenlejal Zofin li Balaame; te imuyic ta jolvits Pisga. Te la spasic vucub scajleb smoton Dios; te la smilic jujucot ch'ium vacax xchi'uc jujucot ch'ium chij. 15Li Balaame jech laj yalbe li Balaque:

—Coman li' yo' bu la jmilbetic smoton Diose. Li vu'une chbat jta ta c'opanel li Diose —xi.

16Li Muc'ul Diose ital sc'opan li Balaame. Ja' laj yac' loc'uc ta ye c'usi tsc'an stuc li Muc'ul Diose. Jech laj yalbe:

—Sutan batel yo' bu oy li Balaque; ja' xc'ot avalbe li c'usi chacalbote —xut.

17Li Balaame isut batel yo' bu oy li Balaque xchi'uc li banquilaletic yu'un moabetic yo' bu smilojbeic smoton Diose. Li Balaque jech la sjac':

—¿C'usi laj yalbot tal li Muc'ul Diose? —xi.

18Li Balaame lic c'opojuc jech chac c'u cha'al jun j'alc'op:

“Balac, xnich'on Zipor,

a'ibun li c'usi chacalbote.

19Li Diose mu jechuc jech chac c'u cha'al cristianoetic ti sna' xchamique.

Mu sna' x'epalc'opoj;

mu sna' sjel li c'usi tsnope.

Me oy c'usi chloc' ta yee, persa tspas.

Me oy c'usi chal ta jamale, persa chac' c'otuc ta pasel.

20Li vu'une quich'oj cabtel sventa ta jc'anbe bendición ta stojolic.

Me jech yo'nton stuc Dios chac'be bendicione, li vu'une mu xu' ta jmac ta be.

21Mu'yuc boch'o yilojbe yepalc'opic xchi'uc xchopolilic

li Israel xnich'nabtac Jacobe.

Li Muc'ul Dios yu'unique, te oy ta stojolic.

Li stuquique chich'ic ta muc' jech c'u cha'al jun ajvalil.

22Li Dios ti la sloq'ues tal ta Egiptoe,

ja' jech c'otem yu'unic jech chac c'u cha'al yip xulub tot vacax.

23Li Jacobe mu stac' uts'intael.

Li j'ac'chameletique mu'yuc c'usi xu' yu'un tspasbeic li Israele.

Li' ta orae ja' tsc'an jech chich' albel li Israele:

‘Toj ep spasoj sq'uelubil stsatsal ta atojolic li Diose’, sc'an xi sc'oplal.

24Li lum le'e ta xlic totsicuc.

Ta stsacvanic jech chac c'u cha'al león,

ja' to chpati, ja' to chcux yo'nton me ilaj yu'un li c'usi stsacoje,

xchi'uc me laj yuch'be xch'ich'al li c'usi chamen yu'une”, xi li Balaame.

25Li Balaque jech laj yalbe li Balaame:

—Me mu xu' avu'un chalajesbe stsatsalic li lum le'e, mu me xac'anbe bendición ta stojolic noxtoc —xut.

26Itac'ov li Balaame:

—¿Me mu laj ono'ox calbot ti ja' no'ox xu' ta jpas c'usi chiyalbun li Muc'ul Diose? —xut.

27Ja' yu'un li Balaque jech laj yal:

—La' me, batic le' ta jote. Oy yic'al mu lecuc chil Dios ti li' chac'an ac'o lajuc stsatsalic li israeletique —xi.

28Jech li Balaque laj yic' batel ta jolvits Peor li Balaame, ja' te yo' bu lec xvinaj li xocol banamile. 29Li Balaame jech laj yalbe li Balaque:

—Meltsanbun vucubuc scajleb smoton Dios li'i. Chapanic vuccot ch'ium vacax xchi'uc vuccot ch'ium chij —xut.

30Li Balaque la spas jech chac c'u cha'al i'albat yu'un li Balaame. La smil jujucot vacax xchi'uc jujucot chij ta jujun li scajleb smoton Diose.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index