Search form

Números 26

Li israeletique la spasic yan ach' tsactsacvun te ta Moab

1C'alal ech'em xa'ox li tsatsal chamel yu'unique, li Muc'ul Diose la sc'opan li Moisés xchi'uc Eleazare, ja' li xnich'on pale Aarone. Jech laj yalbe:

2“Liquesic tsactsacvun, ta jujuchop sbiic xatsaquic ta vun scotol li israeletic ti yich'ojic xa jtob (20) jabil c'alal ta moletic ti xu' xa yu'unic pleitoe”, xut.

3Jech li Moisés xchi'uc Eleazare lic yalbeic mantal scotol israeletic ti c'alal ja'o te oyic ta stenlejaltic ta yosilal Moab te ta nopol ti' uc'um Jordán ta stuq'uil lum Jericoe. 4Yu'un ac'o yac' ta tsaquel sbiic scotol li boch'otic yich'ojic xa jtob (20) jabil xchi'uc c'alal ta moletic, jech chac c'u cha'al i'albat yu'un Muc'ul Dios li Moisese.

Ja' jech yepal ta scotol li israeletic ti iloq'uic tal ta Egiptoe:

5-6Li xnich'nab Rubén, ja' li banquilal xnich'on Israele, ja' Enoc, Falú, Hezrón, xchi'uc Carmi. Le'e ja' te ilic li smomnich'nab Rubén ta jujuchop sbiique. 7Ti c'u yepal iloc' ta scotol li smomnich'nab Rubene, ja' oxib yoxvinic ta mil xchi'uc vucub ciento xchi'uc lajuneb xcha'vinic (43,730) ta scotol li viniquetique. 8Li Falue inich'naj, ja' xnich'on li Eliabe. 9Li Eliabe inich'naj, ja' Nemuel, Datán, xchi'uc Abiram. Li Datán xchi'uc Abirame ja' li boch'otic co'ol la xchi'inic Coré c'alal la stoy sbaic ta stojol Muc'ul Diose, xchi'uc ti la scontrainic li Moisés xchi'uc Aarone. 10Pero ijav li banamile; te ibic'atic ochel li chibique xchi'uc li Coree. Ti c'u yepal jmoj la stsob sbaique, ichamic scotolic. Ja' o'lol yoxibal ciento (250) ti ichamic ta c'oq'ue. Le'e ja' itun ta sventa c'u cha'al mu xch'ay ta yo'ntonic o li yantique. 11Yan li xnich'nab Coree muc xchamic.

12Li xnich'nab Simeón ti bu ilic sts'unubal ta jujuchop sbiic smomnich'nabe ja' Nemuel, Jamín, Jaquín, 13Sera, xchi'uc Saúl. 14Ti c'u yepal iloc' ta scotol li smomnich'nab Simeone ja' chib xcha'vinic (22,200) ta mil xchi'uc chib ciento li viniquetique.

15Li xnich'nab Gad ti bu ilic sts'unubal ta jujuchop sbiic smomnich'nabtaque ja' Zefón, Hagui, Suni, 16Ozni, Eri, 17Arod, xchi'uc Areli. 18Ti c'u yepal iloc' ta scotol li smomnich'nab Gade ja' cha'vinic ta mil xchi'uc vo'ob ciento (40,500) ta scotol li viniquetique.

19Li xnich'nab Judae ja' Er xchi'uc Onán, te ichamic comel ta Canaán banamil. 20Ja' yu'un li xnich'on Judá bu ilic ta jujuchop sbiic li smomnich'nabtaque ja' Sela, Fares, xchi'uc Zara. 21Ti bu ilic smomnich'nab Fares ta jujuchop sbiique ja' ta Hezrón xchi'uc Hamul. 22Ti c'u yepal iloc' ta scotol li smomnich'nab Judae ja' vaclajuneb xchanvinic ta mil xchi'uc vo'ob ciento (76,500) ta scotol li viniquetique.

23Li xnich'nab Isacar bu ilic ta jujuchop sbiic smomnich'nabe ja' Tola, Fúa, 24Jasub, xchi'uc Simrón. 25Ti c'u yepal iloc' ta scotol li smomnich'nab Isacare ja' chanib xchanvinic ta mil xchi'uc oxib ciento (64,300) ta scotol li viniquetique.

26Li xnich'nab Zabulón ti bu ilic ta jujuchop sbiic li smomnich'nabe ja' ta Sered, Elón, xchi'uc Jahleel. 27Ti c'u yepal iloc' ta scotol li smomnich'nab Zabulone ja' oxvinic ta mil xchi'uc vo'ob ciento (60,500) ta scotol li viniquetique.

28Li xnich'nab José ti bu ilic ta jujuchop sbiic smomnich'nabe ja' ta Manasés xchi'uc ta Efraín. 29Li xnich'on Manasese, ja' li Maquire; ja' te ilic li maquiretique. Li Maquire inich'naj, ja' li Galaade; ja' te ilic li galaadetique. 30-32Li xnich'nabtac Galaade ja' Jezer, Helec, Asriel, Siquem, Semida, xchi'uc Hefer sbiic. Ti jayibic le'e ta jujuchop sbiic ibatic; ja' xnich'nab li Galaade. 33Li xnich'on Hefere ja' Zelofehad. Li Zelofehade mu'yuc squeremetic, ja' no'ox puru stsebetic. Ja' Maala, Noa, Hogla, Milca, xchi'uc Tirsa sbiic. 34Ti c'u yepal iloc' ta scotol c'alal laj yich' tsacbel sbi li smomnich'nabtac Manasese ja' lajchab yoxvinic ta mil xchi'uc vucub ciento (52,700) ta scotol li viniquetique. 35Li xnich'nab Efraín ti bu ilic ta jujuchop sbiic smomnich'nabtaque ja' Sutela, Bequer, xchi'uc Tahán. 36Li smomnich'nabtac Sutelae ja'ic li jchop eranetique. 37Ti c'u yepal iloc' ta scotol smomnich'nabtac Efraine, ja' lajchab xcha'vinic ta mil xchi'uc vo'ob ciento (32,500) ta scotol. Le'e ja' scotol sts'unubal José ta jujuchop sbiic ibatic.

38Li xnich'nab Benjamín ti bu ilic ta jujuchop sbiic smomnich'nabe ja' Bela, Asbel, Ahiram 39Sefufam, xchi'uc Hufam. 40Li xnich'nab Bela ti bu ilic ta jujuchop sbiic smomnich'nabe ja' Ard xchi'uc Naamán. 41Ti c'u yepal iloc' ta scotol smomnich'nab li Benjamine ja' vo'ob yoxvinic ta mil xchi'uc vaquib ciento (45,600) ta scotol li viniquetique.

42Li smomnich'nabtac Dane ja' li jchop ilic ta Suhame. 43Ti c'u yepal iloc' ta scotol li smomnich'nabtac Suhame ja' chanib xchanvinic ta mil xchi'uc chanib ciento (64,400) ta scotol li viniquetique.

44Li xnich'nab Aser ti bu ilic ta jujuchop sbi smomnich'nabtaque ja' Imna, Isúi, xchi'uc Bería. 45Li xnich'nab Bería ti bu ilic ta jujuchop sbiic smomnich'nabe ja' Heber xchi'uc Malquiel. 46Li Asere oy jun stseb noxtoc; ja' Sera sbi. 47Ti c'u yepal iloc' ta scotol smomnich'nab li Asere ja' oxlajuneb yoxvinic ta mil xchi'uc chanib ciento (53,400) ta scotol li viniquetique.

48Li xnich'nab Neftalí ti bu ilic ta jujuchop sbiic smomnich'nabe ja' Jahzeel, Guni, 49Jezer, xchi'uc Silem. 50Ti c'u yepal iloc' ta scotol li smomnich'nabtac Neftalie ja' vo'ob yoxvinic ta mil xchi'uc chanib ciento (45,400) ta scotol li viniquetique.

51Ti c'u yepal iloc' ta scotol li israeletique ja' vaquib ciento ta mil xchi'uc jmil, xchi'uc vucub ciento xchi'uc lajuneb xcha'vinic (601,730) ta scotol li viniquetique.

I'albatic mantal c'u x'elan tsvoc' yosilic

52Li Muc'ul Diose la sc'opan li Moisese. Jech laj yalbe:

53“Ti c'u yepal i'och ta vun sbiic li viniquetique, ja' me jech chich' voc'bel li yosilique. 54Ti bu ep iloc' ta atele, ja' ep chich' li yosilique. Ti bu mu'yuc ep iloc' ta atele, ja' mu'yuc ep chich' li yosilique. Ti c'u yepal iloc' ta atel ta jujuchope, ja' jech yepal chich' li yosilique. 55C'alal chavoq'uic li osile, tsc'an chapasic canal tajimol, ja' ti bu xc'ot ta stojol jujunique. Ta jujuchop ac'o yich' yosilic ti bu liquem tal sts'unubal li stotique. 56C'alal chich' puquel li osile, ja' tsc'an chich' pasel canal tajimol. Tsc'an jech chich' pasel ta sventa ti bu epique, xchi'uc ti bu mu'yuc epique”, xut.

Laj yich' tsacbel sbiic scotol li levietique

57Li xnich'nabtac Leví ti bu ilic li jujuchop sbiic smomnich'nabtaque ja' Gersón, Coat, xchi'uc Merari. Ja' laj yich'ic atel. 58Li libnaetic, hebronetic, mahletic, musetic, xchi'uc li coreetique, le'e ja' smomnich'nabtac Leví ta jujuchop sbiic.

Li Coate inich'naj, Amram sbi. 59Li Amrame laj yic' yajnil. Ja' laj yic'be stseb Leví, Jocabed sbi. Li Jocabede ja'o ivoc' ti c'alal te to'ox oy ta Egipto li Levie. Li Amram xchi'uc Jocabede ja' stot sme'ic li Aarón, Moisés, xchi'uc Mariae. 60Li xnich'nab Aarone ja' Nadab, Abiú, Eleazar, xchi'uc Itamar. 61Li Nadab xchi'uc Abiue ja' ti ichamic c'alal la xchiq'uic pom ta stojol Muc'ul Dios ta smantal stuquique.

62Ti c'u yepal ta scotol smomnich'nab Leví ti xlic ta jun u svoq'uel c'alal ta moletique ja' oxib xcha'vinic (23,000) ta mil ta scotol li viniquetique. Le'e mu'yuc te capal i'ochic ta vun xchi'uc scotol li yantic israeletique, yu'un mu'yuc xich'ic yosilic li stuquique.

63Ja' jech yepal iloc' ta scotol li israeletic ti c'alal la spas tsactsacvun li Moisés xchi'uc pale Eleazar te ta stenlejaltic yu'un Moab ta ti' uc'um Jordán ta stuq'uil lum Jericoe. 64Scotol li boch'otic te to'ox oyic c'alal la spasic tsactsacvun li Moisés xchi'uc Aarón ta xocol banamil Sinaie, me junuc mu'yuc xa te oyic li stuquique. 65Yu'un laj ono'ox yal Muc'ul Dios ti te chchamic scotolic ta xocol banamile. Ja' xa no'ox muc xcham li Caleb, xnich'on Jefone, xchi'uc li Josué, xnich'on Nune. Jech ja' xa no'ox te xchi'uquic li yantique.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index