Search form

Números 35

I'ac'bat slumalic xchi'uc jutuc yosilic li levietique

1Li Muc'ul Diose la sc'opan yan velta li Moisés ti c'alal ja'o te oyic ta stenlejaltic yu'un Moab ta nopol uc'um Jordán ta stuq'uil Jericoe. Jech laj yalbe:

2“Albo mantal li achi'iltac ta israelale ac'o yac'beic lumetic yu'unic ec li levietique yu'un te ac'o naquiicuc. Xchi'uc ac'o yac'beic yosilal ta joyob li lumetique sventa te chve' li sts'unub yovolique. 3Li levietique ja' te ac'o naquiicuc ta lumetic ti bu chavac'beique, xchi'uc ja' te ac'o yaq'uic ve'uc xchijic xchi'uc ts'unub yovolic ta yosilal li lumetic chich'ique. 4Li osil chavac'beic sventa chve' sts'unub yovolique ja' o'lol yo'bal ciento (450) metro xlic ta spat li coralton yu'un lumetique. 5Ta scotol ti c'u smuc'ul yosilic chc'ote, ja' baluneb ciento (900) metro ta set. Ja' jech co'ol chbat ta sloq'ueb c'ac'al, ta smaleb c'ac'al, ta norte xchi'uc ta sur. Ja' cacal ta o'lol chcom li lume. Le'e ja' me yosilal chc'ot li slumalique.

6“Ta lumetic yo' bu chavac'beic levietique, tsc'an te chacomtsanic noxtoc vaquib lum sventa xu' te chbat snac' sba ta anil me oy boch'o la smil xchi'ile. Slecoj tsc'an chavac'beic yan chib yoxvinic (42) lumetic noxtoc. 7Ta scotole ja' vaxquib yoxvinic (48) lumetic chich'ic xchi'uc li yosilal jujun lume. 8C'alal chaq'uic lumetic yu'unic li jujuchop achi'iltac ta israelale, ja' me ep lumetic ac'o yaq'uic li boch'otic muc'tic staoj yosilique. Yan li boch'otic biq'uitic no'ox staojique, ja' mu'yuc ep ac'o yaq'uic”, x'utat li Moisese.

Lumetic sventa snac'ubbailic

(Dt 19.1-13; Jos 20.1-9)

9Li Muc'ul Diose la sc'opan yan velta li Moisese. Jech laj yalbe:

10“Albo ya'yic achi'iltac ta israelal jech chac li'i: C'alal me latuch'ic xa'ox jelovel li uc'um Jordán yu'un cha'ochic xa batel ta Canaán banamile, 11tsc'an chat'ujic comel jayibuc lumetic sventa anac'ubbailic, yu'un ja' te ac'o bat snac' sba ta anil li boch'o chmilvan ti muc ta yutsiluc yo'nton chaq'ue. 12Jech mu xtaat ta milel ti me tsc'an chpacbat sutel yu'un yuts' yalal li boch'o chchame. Mu xu' chmilat, ja' to me laj yich' va'anel ta stojol scotol li achi'iltaquique; te chchapaj c'u x'elan chcom. 13Li lumetic chich'ic achi'iltaque ac'o scomtsanic vaquib sventa snac'ubbailic: 14oxib ta jot uc'um Jordán ta sloq'ueb c'ac'al, oxib te ta Canaán banamil. 15Li vaquib lumetic le'e ja' chtun sventa anac'ubbailic, vo'oxuc li israeloxuque, xchi'uc li yanlum te nacajtic ta atojolique, o me j'ech'elbeetic no'oxe. Ja' te ac'o bat snac' sbaic ta ora me oy boch'o la smilic ti muc ta yutsiluc yo'ntonic laj yaq'uique.

16“Me oy boch'o tsmaj ta c'usiuc taq'uinal jun xchi'ile, me icham o yu'une, ja' xa jmilvanej chc'ot o. Li jmilvaneje ac'o milatuc.

17“Me oy boch'o chac'be ton xchi'ile, me icham o yu'une, ja' xa jmilvanej chc'ot o. Li jmilvaneje ac'o milatuc.

18“Me oy boch'o tsmaj ta te' xchi'ile, me icham o yu'une, ja' xa jmilvanej chc'ot o. Li jmilvaneje ac'o milatuc. 19Li yuts' yalal boch'o chchame ja' oy ta sventa ac'o smil ec li jmilvanej ti bu tstae.

20-21“Me oy boch'o tspuj ta net'el xchi'il yu'un stsoq'uet yo'nton yu'une, o me oy c'usi tspajbe batel ta scoj ti yu'un chopol c'usi snopoje, me icham ono'ox yu'une, ja' xa jmilvanej chc'ot o. Xchi'uc me oy boch'o tsmaj ta sc'ob xchi'il yu'un scontra ono'oxe, me te icham o yu'une, ja' xa jmilvanej chc'ot noxtoc. Li jmilvaneje, ac'o yich' milel ec. Me oy jech chc'ot ta pasele, li yuts' yalal boch'o chchame ja' me oy ta sventa ac'o spacbe sutel li boch'o imilvan me oy bu la stae.

22“Pero me oy boch'o tspuj ta net'el xchi'il ta anil no'oxe, me mu yu'unuc scontrainoj sbaique, o me oy c'usi ta spajbe batel ti muc ta scojuc yu'un oy c'usi chopol snopoje, me te icham o yu'une, tsc'an chich' chapanel lec ba'yuc c'u yu'un ti la smile. 23Jech noxtoc me muc xil la xbalch'un yalel ton, me te icham o yu'une, pero me mu yu'unuc scontra ono'oxe, xchi'uc me muc ta scojuc yu'un chopol yo'nton yu'une, 24ac'o yich' chapanel yu'un achi'iltaquic c'u yu'un ti la smile, xchi'uc ac'o xchapanic noxtoc c'usi tspas li yuts' yalal ti tsc'an tspac sutele. Jech ac'o spasic jech chac c'u cha'al chal li mantaletic li'i: 25Li achi'iltaquique ac'o spojic li boch'o imilvan ti me tsc'an chpacbat sutel yu'un yuts' yalal li boch'o ichame. Ac'o staquic sutel yo' bu sa'oj xa snac'ubbaile. Te ac'o comuc o, ja' to me icham li banquilal pale ti tiq'uil ta abtele. 26Pero me chloc' batel ta spat li lumetic sventa anac'ubbailique, 27me oy bu itaat yu'un yuts' yalal li boch'o ichame, muc ja'uc smul chcom me imilate yu'un loq'uem itaat. 28Li boch'o imilvane tsc'an te ac'o snac' sba ta lum sventa anac'ubbailic. Ja' to xu' tsut tal ta yosil me icham li banquilal palee.

29“Li mantaletic li'i te chcom o ta atojolic, vo'oxuc li totiloxuque, xchi'uc c'alal ta avalab anich'nabic ti buyuc no'ox chanaquiic batele.

Mantaletic sventa testigoetic xchi'uc sventa coltael ta milel

30“Ja' to xu' chich' milel jun jmilvanej me oy ep testigoetic chalic ti ta melel imilvane. Me jun no'ox testigoe, mu xu' chich' aq'uel ta milel jun cristiano.

31“Mu xu' chatsaquic taq'uin sventa tspoj sba o jun jmilvanej, yu'un chapal sc'oplal chich' milel. Li boch'o chmilvane persa ac'o yich' milel ec.

32“Me oy jun jmilvanej ti snac'oj sba ta lumetic sventa anac'ubbailique, mu xu' chatsacbeic taq'uin ta sventa yu'un ac'o avaq'uic sutuc batel ta slumal c'alal me muc to chcham li banquilal palee.

33“Mu me xavaq'uic socuc sc'oplal ta scoj jmilvanejetic li avosilalic bu chc'ot naclanique. Yu'un li jmilvanejetique ta me soques ac'oplalic te ta avosilalic. Mu'yuc c'usi xu' chac' sventa tspoj sba o jun jmilvanej. Persa ac'o yich' milel o.

34“Jech tsc'an mu me xasoquesbeic sc'oplal li banamil bu chbat naclanique xchi'uc ti bu chinaqui eq'ue. Yu'un vu'un li Muc'ul Diosun avu'unique; te chajchi'inoxuc ta naclej vo'oxuc li israeloxuque”, xi li Muc'ul Diose.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index