Search form

Números 5

I'albatic ti ac'o sloq'uesic ta spat to bu nacalic li boch'otic mu'yuc lequique

1Li Muc'ul Diose la sc'opan yan velta li Moisese. Jech laj yalbe:

2“Albo scotol achi'iltac ta israelal ti ac'o sloq'uesic te yo' bu nacalic scotol li boch'otic yich'ojic c'a'el chamele, o me chamel ta sc'unilic ti chloc' ya'lele, o me mu'yuc yac'oj sba ta lecubtasel me oy la spiquic animae. 3Boch'ouc no'ox, me vinic me ants, ac'o sloq'uesic te yo' bu nacalique. Yu'un jech mu soc yu'unic ti bu nacalique yu'un te oyun ta o'lol yu'unic”, xi li Muc'ul Diose.

4Li israeletique la xch'unic c'usi laj yal Muc'ul Dios ti i'albatic yu'un li Moisese. Jech la sloq'uesic yo' bu nacalic scotol li boch'otic mu'yuc lequique.

Sc'oplal c'usi tsc'an tspas boch'o chopol c'usi tspasbe xchi'il

5Li Muc'ul Diose la sc'opan yan velta li Moisese. Jech laj yalbe:

6“Albo scotol achi'iltac ta israelal jech chac li'i: Me oy junuc vinic, o ants ti mu tuc'uc yo'nton ta stojol Muc'ul Diose, xchi'uc me oy laj yuts'inta xchi'ile, oy xa smul o ti me jech la spase. 7Ta persa ac'o yal ta jamal li c'usi la spase. Xchi'uc li boch'o laj yuts'intae ac'o stojbe scotol li c'usitic la spasbee, xchi'uc ac'o to yac'be yan jun ta vo'vo'. 8Pero me chamen xa li boch'o laj yich' uts'intaele, me mu'yuc nopol yuts' yalal ti xu' ac'o yich'be li stojole, ac'o comuc ta sventa Muc'ul Dios. Ja' ac'o tunuc ta sventa yabtel li palee. Xchi'uc ac'o yac'be jcotuc chij li palee yu'un ac'o ch'aybatuc li smule.

9“Scotol c'usiuc no'ox chac'bicun ta sventa jmoton li achi'iltac ta israelale, ac'o yich'ic tal ta stojol li palee. Ja' yu'un chc'ot o. 10Scotol li c'usi voc'bil ti ja' xa cu'une, ja' ac'o bat yac'beic li palee. Ja' xa yu'un chc'ot o”, xi li Muc'ul Diose.

Mantal ta sventa jun vinic ti c'alal chilinta yajnil ta scoj smul, o me muc ta scojuc smul

11Li Muc'ul Diose la sc'opan yan velta li Moisese. Jech laj yalbe:

12“Jech xavalbe ya'yic scotol li achi'iltac ta israelale: Oy bu chc'ot ta pasel ti oy junuc ants mu junuc yo'nton ta stojol li smalale, 13oy bu chchi'in sba xchi'uc yan vinic ti mu sna' li smalale. Ac'o me ta melel oy li smule, pero mu'yuc boch'o yiloj yu'un ta mucul la spas, jech mu'yuc boch'o xu' chal. 14Pero oy chc'ot ta pasel ti chlic stsac ta it'ixal yajnil li vinique. Pero oy bu chc'ot ta pasel noxtoc ti jech no'ox tsvontol tsac ta it'ixal yajnil li vinique, ac'o me mu'yuc smul li antse. 15Me oy jech chc'ot ta pasel jchopucale, li vinique ac'o yic' batel ta stojol pale li yajnile. Ac'o yich' batel chibuc kilo arina pasbil ta cebada. Ja' matanal sventa ac'o vinajuc smul li yajnile, pero mu me smalta ta aceite, xchi'uc mu me xac'be pom yu'un ja' matanal ta sventa it'ixajel, o sventa chich' vinajesel mulil.

16“Li palee ac'o snopajes li antse. Ac'o sva'an ta stojol li Muc'ul Diose. 17Ts'acal ac'o yac' jutebuc ts'u'iltasbil vo' ta jayil lum. Ac'o scap ta spucucal li yut ch'ul cuartoe. 18Ac'o yalbe ti ac'o sva'an sba lec ta stojol Muc'ul Dios li antse. Ac'o stitunbe li stsotsil sjole. Ac'o yac'be stsac li matanal ta sventa it'ixale yu'un jech ac'o vinajuc li mulile. Li palee ac'o stsac ta sc'ob li ch'ail vo' sventa stojol mulile. 19Ts'acal jech ac'o yalbe ta jamal ta stojol Dios li antse: ‘Me ta melel mu'yuc bu achi'inoj yan vinique, xchi'uc me mu'yuc bu yan avo'nton ta stojol amalale, me mu'yuc c'usi apasoj achi'uc yan vinic ti sbolibtasojote, mu me c'usi chopol xaspasbot c'alal chavuch' li vo' li'i ti ja' sventa stojol mulile. 20Pero me mu junuc avo'nton ta stojol li amalale, me oy bu achi'inoj yan vinic ti sbolibtasojote, 21li Muc'ul Diose ac'o yac' ti vo'ot senyail chacom ta stojol scotol achi'iltac ti chatoj amule. Ja' ac'o yac' situbuc yav avol, ac'o yac' socan o. 22Li stojol mulil li'i ja'o chata c'alal chavuch' li vo' ti yich'oj xa stojol mulile’, ac'o xiuc li palee. ‘Jechuc, ac'o c'otuc ta pasel jech’, ac'o xiuc li antse.

23“Li palee ac'o sts'iba ta vun li stojol mulil laj yich' alele. Ts'acal ac'o stu'p o ta ch'ail vo'. 24Ts'acal to, li vo' ti yich'oj stojol mulile ac'o yac'be yuch' li antse yu'un jech ac'o ch'aubuc ta yut xch'ut. 25Ac'o yich'be li matanal te yich'oje, ja' li matanal sventa it'ixale. Ac'o yac' ta stojol Muc'ul Dios. Ts'acal ac'o bat yac' ta scajleb smoton Dios. 26Ta ora no'ox ac'o sjop jopuc li matanal te oye, ja' li trigoe. Ac'o bat xchic' ta scajleb smoton Dios. Ja' sna'ubil chcom c'usi chc'ot ta stojol li antse.

“Li palee c'alal me laj xa yac'be yuch' ch'ail vo' li antse, te chvinaj c'u x'elan yo'nton ta stojol li smalale. 27Me ta melel mu junuc yo'nton ta stojol smalal li antse, chlic ch'aubuc ta yut xch'ut li vo' ti yich'oj xa stojol mulile, xchi'uc chlic situbuc li yav yole, jech chlic socuc o. Jech li antse ja' svinajeb chc'ot ta stojol scotol xchi'iltac ti laj yich'be stojol li smule. 28Pero me jun yo'nton ta stojol smalal li antse, mu'yuc c'usi tspasbat yu'un li vo'e, jech xu' to chil ep olol.

29“Ja' jech mantal ta sventa jun ants ti me mu junuc yo'nton ta stojol smalale, xchi'uc ti c'alal chlic it'ixajuc li vinique, 30xchi'uc ti me jech no'ox ta x'it'ixaj ta stojol yajnil li vinique. Li vinique ac'o yic' batel ta stojol Muc'ul Dios li yajnile. Li palee ac'o spasbe jech chac c'u cha'al chal li mantal li'i. 31Li vinique mu'yuc smul chc'ot. Me ja' oy smul iloc' li antse, ta me stoj smul”, x'utat yu'un Muc'ul Dios li Moisese.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index