Search form

Números 6

Sc'oplal c'usi tsc'an tspas li boch'o chal ta jamal ti j'ech'el chac' sba o ta spasbel yabtel Diose

1Li Muc'ul Diose la sc'opan yan velta li Moisese. Jech laj yalbe:

2“Jech xavalbe ya'yic scotol li achi'iltac ta israelale: Me oy junuc vinic, o ants ti chal ta jamal ti j'ech'el chac' sba o ta jtojol sventa cabtele, 3mu xu' chuch' pox, xchi'uc mu xu' chuch' li c'usi chac' yacubele, xchi'uc vinagre ti loq'uem ta ya'lel ts'usube, xchi'uc li c'usiuc no'ox chac' yacubele. Xchi'uc mu xu' chuch' c'usiuc no'ox stac' uch'el ti pasbilic ta ya'lel ts'usube, o me sat ts'usub ti taquijesbil xae. 4Ti jayib c'ac'al yaloj tspase, me jchopuc mu xu' tslajes li c'usitic pasbil ta ts'usubetique. 5Jech noxtoc mu me xac' ta loq'uel stsotsil sjol. Te ac'o natubuc o, ja' to me its'aqui ti c'u yepal c'ac'al yaloj ta jamal tspas c'usi yaloje. Yu'un tsc'an chvinaj ti voc'bil o yu'un Muc'ul Diose. 6Ti jayib c'ac'al yaloj oy c'usi tspase, mu xu' chnopaj batel ta sts'el ti bu oy animae. 7Ac'o me stot sme', o me xchi'iltac ta voq'uel, mu xu' chnopaj batel yu'un jech mu chopoluc chquil. Yu'un tsots sc'oplal ti ac'o xchabi lec sba ti c'alal yac'oj sba o chtun cu'une. 8Ti jayib c'ac'al yaloj chtun cu'une, voc'bil o sventa cabtel.

9“Me oy boch'o te chcham ta ora no'ox ta sts'el li boch'o yac'oj sba o ta jtojole, li stsotsil sjol ti lec to'ox chquile, mu xa lecuc chquil. Ja' tsc'an ac'o yac' sba ta lecubtasel vucubuc c'ac'al jech chac c'u cha'al sc'oplale. Ta svucubal c'ac'al ac'o yac' ta juxel scotol li stsotsil sjole, yu'un ja' sc'ac'alil ti chich' lecubtasele. 10Ta xvaxquibal c'ac'al ac'o yic' batel cha'cotuc puruvoc stsu, o me cha'cot stsumut, ac'o c'ot yac'be li pale te ta ti'ch'ulna pasbil ta nucule. 11Li palee jcot ac'o smilbe ta smoton Dios sventa li smule. Li yane ac'o xchic' ta sventa smoton Dios, xchi'uc ac'o spas li c'usitic tsc'an pasel sventa xu' chch'aybat o smul ta scoj ti la spic animae. Ja' jech c'ac'al chlic lecubuc batel yan velta ta jtojol li stsotsil sjole. 12Jech chlic stsac yan velta ta ach' ti c'u yepal c'ac'al yaloj tsvoc' sba o ta sventa cabtele. Ti c'u xa'ox yepal c'ac'al lic stsac tale, mu'yuc xa tsacbil ta venta chcom. Yu'un li stsotsil sjol ti lecubtasbil xa'oxe, isoc xa. Jech noxtoc tsc'an ac'o yic' batel ta jtojol jcotuc chij jun jabil svoq'uel sventa jmoton ta scoj ti bu ijelov ta jtojole.

13“C'alal me its'aqui xa ti jayib c'ac'al yaloj ti svoc'oj sba o ta jtojole, ac'o batuc te ta ti'ch'ulna pasbil ta nucul. 14Ac'o yac' jcotuc ch'ium tot chij ti jun to jabil svoq'uele, ti bu ven leque. Ac'o yich' chiq'uel ta sventa jmoton. Xchi'uc ac'o yac' yan jcotuc ch'ium me' chij noxtoc ti bu leque, ti jun to jabil svoq'uele. Ac'o yich' milel ta sventa smul. Xchi'uc ac'o yac' jmotonin yan jcotuc chij ti bu ven leque. Ja' sventa co'ol co'nton jchi'uc. 15Jech noxtoc ac'o yac' junuc unin moch pan ti pasbil o ta lequil arinae, xchi'uc ti vots'bil o ta aceite ti mu'yuc yich'oj svolesubil xch'ute. Xchi'uc ac'o yac' jayibuc unin bic'tal jayal vajetic ti mu'yuc yich'oj svolesubil xch'ute, ti vijbil ta aceitee. Ac'o yich' batel xchi'uc yantic matanaletic, ja' li trigo, xchi'uc c'usitic yan co'oltic jech chac c'u cha'al trigoe xchi'uc li ya'lel ts'usube. 16Li palee ac'o yac' ta jtojol li matanal sventa mulil ti milbil tsc'ane, xchi'uc li matanal ti ja' no'ox chiq'uel tsc'ane. 17Xchi'uc ac'o yac' noxtoc li chij sventa co'ol co'nton jchi'uque. Te capal ac'o yac' xchi'uc li jun unin moch pan ti mu'yuc yich'oj svolesubil xch'ute, xchi'uc trigo xchi'uc c'usitic yan chac c'u cha'al trigo, xchi'uc li ya'lel ts'usube. 18Li boch'o j'ech'el yac'oj sba o ta sventa cabtele, te ac'o xjux loq'uel scotol li stsotsil sjol ta ti'ch'ulna pasbil ta nucule. Ac'o stsob scotol li stsotsil sjol ti lecubtasbil to'ox ta jtojole. Ac'o bat xchic' ta c'oc' ti tsanem te ta yolon bu cajal chc'ac' li matanal sventa co'ol co'nton jchi'uque. 19Li palee ac'o stsacbe snecub li chij ti toc'on xae, xchi'uc junuc pan te ta unin moch ti mu'yuc yich'oj svolesubil xch'ute, xchi'uc junuc li unin jayal vaj ti mu'yuc yich'oj svolesubil xch'ute. Ac'o yac'be ta sc'ob li boch'o j'ech'el yac'oj sba o ta jtojol c'alal me juxbil xa scotol li stsotsil sjole. 20Jech li palee ac'o spas li c'usi tsc'an pasel sventa chisye'bun ta jtojole. Li xpecho matanal sventa chisye'bun ta jtojole xchi'uc li scub matanal sventa chistojbicun o spatanique, voc'bil xa chcom o cu'un, xchi'uc ja' xa yu'un chcom o li palee. C'alal me ijelov xa scotol le'e, li boch'o j'ech'el yac'oj sba o ta jtojole xu' xa chlic yuch' ya'lel ts'usub.

21“Ja' jech mantal ta sventa li boch'o chal ta jamal ti j'ech'el chac' sba o ta spasel cabtele, xchi'uc ja' jech matanal tsc'an chiyac'bun ta jtojol. C'usiuc no'ox yan ti oy ta yo'nton chiyac'bune, mu'yuc atbil xu' chiyac'bun. Ja' no'ox tsc'an chc'ot ta pasel yu'un li c'usi yaloj ta jamal jech chac c'u cha'al chal ta svunal li mantaletique”, xi li Muc'ul Diose.

Sc'oplal c'alal chaq'uic bendición li paleetique

22Li Muc'ul Diose la sc'opan yan velta li Moisese. Jech laj yalbe:

23“Albo ya'yic li Aarón xchi'uc xnich'nabe, c'alal chac'beic bendición li achi'iltaquic ta israelale, jech ac'o yalic chac li'i:

24‘Ac'o yac'boxuc ep bendición li Muc'ul Diose, ac'o xchabioxuc.

25Ac'o lecuc yiloxuc li Muc'ul Diose, xchi'uc ac'o yac'boxuc avilic slequil yo'nton.

26Ac'o sc'anoxuc o li Muc'ul Diose; ac'o yac'boxuc jun avo'ntonic’, ac'o xiicuc ta stojol li achi'iltaquique.

27“Jech chiyalbicun o jbi ta stojol li achi'iltaquic ta israelale. Jech ta xcac'beic o bendición”, xi li Muc'ul Diose.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index