Search form

Números 8

Sc'oplal c'u x'elan la stsanic candiletic

1Li Muc'ul Diose la sc'opan yan velta li Moisese, jech laj yalbe: 2“Jech xavalbe li Aarone: C'alal chatsan li candiletique, te xavac'be batel xojobal ta stuq'uil yo' bu oy li candeleroe”, uto. 3Li Aarone la xch'un c'usi i'albat yu'un li Moisese. La smeltsan lec li candiletique. Te laj yac'be batel xojobal ta stuq'uil yo' bu oy li candeleroe. 4Li candeleroe ja' pasbil ta c'anal taq'uin. Tenbil lec ta martillo c'alal ta yoc, xchi'uc c'alal to ta yav yaceiteal ti lec volajtic ta q'uelele. Li Moisese ja' jech la spas li candelero jech chac c'u cha'al i'ac'bat yil senyail yu'un Muc'ul Diose.

Laj yich'ic aq'uel o ta stojol Dios li levietique

5Li Muc'ul Diose la sc'opan yan velta li Moisese. Jech laj yalbe:

6“Scotol li levietique voc'o loq'uel ta stojol li achi'iltac ta israelale, xchi'uc lecubtaso ta jtojol. 7Ti c'u x'elan tsc'an chalecubtase ja' jech chac li'i: Vijo ta vo', ja' li vo' sventa lecubtasele. Ts'acal ac'o xjux loq'uel scotol stsotsil sbec'talic, xchi'uc ac'o xchuc' lec sc'u'ic, jech lec xa chcomic o. 8Ts'acal ac'o smilic jcot ch'ium tot vacax sventa jmoton, xchi'uc ac'o yaq'uic arina ti bu ven leque, ti vots'bil o ta aceitee. Xchi'uc ac'o yaq'uic yan jcot ch'ium tot vacax sventa chich' milel ta sventa smulic. 9Li vo'ote, albo ti ac'o nopajicuc tal ta ch'ulna pasbil ta nucule, xchi'uc ac'o stsob sbaic tal scotol li achi'iltac ta israelale. 10Li levietique ta ora no'ox ac'o sva'an sbaic lec ta jtojol scotolic. Jech li achi'iltac ta israelale scotolic ac'o yac' sc'obic ta sjol li levietique. 11Li Aarone ac'o xbech sc'ob sventa chiyac'bun ta jtojol li levietique yu'un ja' xq'uexol israeletic chc'otic o. Jech li levietique voc'bil chcomic o ta sventa cabtel. 12Li levietique ac'o yac' sc'obic ta sjol li ch'ium tot vacaxetique. Jcot ac'o yich' milel ta sventa smulic. Jcot ac'o yich' chiq'uel sventa chich'ic lecubtasel o. 13Li levietique vo'ot xava'an ta ora no'ox ta stojol li Aarone xchi'uc ta stojol li xnich'nabtaque. Ja'o xlic apas li c'usitic tsc'an pasel sventa chavac'bun o ta jtojole. 14Jech voc'ol chc'otic o ta stojol scotol li yantic achi'iltac ta israelale, jech ja' cu'untac chc'otic o. 15Ts'acal ac'o baticuc te ta ch'ulna pasbil ta nucul yu'un te chbat tunicuc o cu'un. Ja' jech tsc'an chalecubtas, ja' jech tsc'an chavac'bun ta jtojol. Co'ol chac c'u cha'al muc'ta matanal chc'ot. 16Ta scotol li achi'iltac ta israelale ja' no'ox voc'bil cu'un li levietique. Ja' xa chquich' ta sventa xq'uexol scotol li sba xnich'nabic achi'iltac ta israelale. 17Yu'un li sba yol xnich'onic achi'iltaque, sc'oplal ja' cu'untac xchi'uc li sba yol sts'unub yovolique. C'alal la jmilbe scotol sba yol xnich'onic li egiptoetique, ja' la jnac' comel scotol li sba yol xnich'onic achi'iltaque yu'un ja' cu'untac. 18Pero ta sventa ti mu'yuc bu ta xquic'beic o li sba yol xnich'onique, ja' yu'un ja' laj quic' o ta jtojol scotol li levietique yu'un ja' xq'uexol sba yol xnich'nab achi'iltac ic'otic. 19Li levietique ja' la jt'uj loq'uel ta stojol scotol li achi'iltac ta israelale. Laj yich'ic aq'uel ta stojol li Aarón xchi'uc xnich'nabe, yu'un jech ja' xq'uexol achi'iltac ta israelal chc'otic, yu'un ja' te chtunic o ta ch'ulna pasbil ta nucul. Xchi'uc jech xu' chch'aybat smulic ta stojol Dios li achi'iltac ta israelale jech mu persauc ja' chnopajic batel ta ch'ulna stuquic, yu'un jech mu'yuc c'usi chc'ot ta pasel ta stojolic”, xi li Muc'ul Diose.

20Li Moisés, xchi'uc Aarón, xchi'uc scotol israeletique la xch'unic scotol c'usi i'albat yu'un Muc'ul Dios li Moisés ti tsc'an tspasic ta sventa li levietique. 21Li levietique laj yich'ic lecubtasel, xchi'uc la xchuc' lec sc'u'ic. Jech li Aarone laj yac' ta stojol Dios. Ja' jech ic'otic jech chac c'u cha'al lequil matanal. Xchi'uc la spas li c'usitic tsc'an pasel ta sventa chich'ic lecubtasele. 22C'alal ilaj yo'ntonic ta spasel scotole, li levietique bat spasic scotol te ta ch'ulna pasbil ta nucul li yabtelic ti sc'oplal tspasique. Ja' q'uelbilic yu'un li Aarón xchi'uc xnich'nabtaque. Ti c'u x'elan i'albat yu'un Muc'ul Dios li Moisese, ja' jech laj yich'ic pasbel li levietique.

I'albatic c'u yepal jabil tsc'an ch-abtejic li levietique

23Li Muc'ul Diose la sc'opan yan velta li Moisese. Jech laj yalbe:

24“Ti c'u yepal sjabilalic xu' tsliques spasel yabtelic te ta ch'ulna pasbil ta nucul li levietique ja' ta vo'ob xcha'vinic (25) jabil. 25Xu' ta scomtsan yabtelic ta lajuneb yoxvinic (50) sjabilalic. 26C'alal me loq'uemic xa ta abtele, ja' xa no'ox xu' tscoltaic c'u x'elan lec xu' tspas yabtelic te ta ch'ulna pasbil ta nucul li xchi'iltaquique, pero mu xa ja'uc tspas stuquic li abtele. Ja' jech tsc'an chachapanbe yabtelic li levietique”, x'utat yu'un Muc'ul Dios li Moisese.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index