Search form

मत्ती 10

येशूकी लोमा च्‍यिङ्‍ङीतिवा

(मर्कूस ३:१३-१९; ६:७-१३; लूका ६:१२-१६; ९:२-६)

1येशूकी खोरो लोमा च्‍यिङ्‍ङीतिवाला कताङ्‍नी डेतिवा थेन्‍दुप ओङ ताङ नेजु नम्‍बा बङी ताङ अमोछ्‍योवु तेरीला टेक ज्‍यितुप ओङ नाङ्‍सुङ। 2ती लोमा च्‍यिङ्‍ङीतिवी मिङ ति दिवा राङ यिन। गोमाला पत्रुस सिरुप सिमोन ताङ तीकी नुप अन्‍द्रियास, जब्‍दियाकी पुज्‍युङ याकूब ताङ तीकी नुप यूहन्‍ना, 3फिलिप ताङ बारथोलोमाइ, थोमा ताङ से दुतुप मत्ती, तमा अल्‍फयसकी पुज्‍युङ याकूब ताङ थेदियस, 4लुङ्‍बाकी थोक्‍ला टेमु कितुप छ्‍योक्‍पाकी मी सिमोन+ ताङ यहूदा इस्‍करियोत यिन। ती यहूदा इस्‍करियोत ति ज्‍युक्‍ला येशूला जिम्‍नी तेरुप मी यिन।

5येशूकी लोमा च्‍यिङ्‍ङीतिवाला दुक सिनी क नङ्‍नी ताङ्‍सुङ, “ख्‍यिराङ यहूदी मिन्‍दुप मिरिक यम्‍बाकी मीतिवी पर्ला माडो, तमा सामरीतिवी ग्‍येसाला साङ माडो। 6बोरु तोरुप लुकतिवा दोके गलुप इस्राएलकी मीतिवी पर्ला गल्‍नी 7‘कोन्‍छ्‍योककी ग्‍येल्‍खाप चिप्‍ला राङ वा वे।’ सिनी ख्‍याप्‍टाक की। 8नेर्पुतिवाला टेक च्‍यी, शेपतिवाला सेन्‍बु लोङ, जे ग्‍यपुप नेजु वोतुपतिवाला टेक च्‍यी, तमा डेतिवाला थेन। दी लाका कितुप ओङ ख्‍यिराङला तुक राङ ङ्‍येतुप यिन, तुक क्‍यानी ख्‍यिराङ साङ तिवाला तुक राङ किसा। 9ख्‍यिराङ छयी नाङ्‍ला सेरकी डेवा, ङुलकी डेवा ताङ सा डेवा काङ साङ माखुर। 10ख्‍यिराङ डोप पेला झोला साङ पोयप कितुप मज्‍या साङ काचा साङ पेर्का साङ माखुर। च्‍यिलासिसिन लाका कितुपतिवाला गोवु च्‍यालकतिवा ङ्‍येकितो।

11ख्‍यिराङ चुका ग्‍येसा याङ्‍ना युलला डिवे, ते ख्‍यिराङला ल्‍यामु क्‍यानी गासो शोप मी छोल। तमा तेसुर मागल्‍वा सेक ती मी तीकी खाङ्‍बाला दे। 12ख्‍यिराङ ती खाङ्‍बी नाङ्‍ला शुकुप पेला ती खाङ्‍बी मीतिवाला ‘ख्‍यिराङला कोन्‍छ्‍योककी लोदिमु नङ्‍शी।’ सिनी सी। 13दोजो ती खाङ्‍बी मीतिवी ती लोदिमु ङ्‍ये छ्‍योवु वोसिन ती लोदिमु ति ती खाङ्‍बाला लु च्‍यी, यिने तिवी ती लोदिमु ङे छ्‍योवु मेसिन ती लोदिमु ति ख्‍यिराङला राङ लोक्‍नी वुङ च्‍यी। 14सी ख्‍यिराङला गासो मुशुवे याङ्‍ना ख्‍यिरा ख्‍याप्‍टाक क्‍यावु सुङ मेङ्‍येन्‍वे, ख्‍यिराङ ती खाङ्‍बा नेवा थेन डोप पेला ख्‍यिरा काङ्‍बाला कोवु थल्‍दुक ति र्‍हुनी ज्‍योक। 15ङ ख्‍यिराङला टेङ्‍बो सिरिन, कोन्‍छ्‍योककी ठिम तोङ्‍गुप तिङ्‍मी तुजेला ती ग्‍येसाला सदोम ताङ गमोरा ग्‍येसाला ख्‍येलुप सिनाङ मङ कोन्‍छ्‍योक नेमा पर्च्या ख्‍येल्‍गितो।”

वुङ्‍गुप छेटाङकी कोर्ला

(मर्कूस १३:९-१३; लूका २१:१२-१७)

16“ल्‍होसा, खटमुतिवी पर्ला लुकतिवा तङ्‍गुप दोके ङ ख्‍यिराङला तोङ्‍यिनो। तुक क्‍यानी ख्‍यिराङ रुल दोके च्‍यङ्‍बु ताङ गम्‍देर दोके क्‍येन मेतुप वुङ गोकितो। 17ख्‍यिराङ मीतिवा नेसुर च्‍याङ्‍से देता। च्‍यिलासिसिन तिवी ख्‍यिराङला ठिम्‍खाङला क्‍योल्‍गितो, तमा यहूदी छ्‍योखाङला टिनी पाङ्‍शर तोङ्‍गितो। 18तमा ङला तेपा क्‍यावु तप्‍की तिवी ख्‍यिराङला मी छ्‍येतिवा ताङ ग्‍येल्‍वुतिवी चिप्‍ला लङ ज्‍यिकितो, तमा तिवा ताङ यहूदी मिन्‍दुप मिरिक यम्‍बाकी मीतिवी दोङ्‍ला ख्‍यिरा ङे थोक्‍ला पङ्‍बु तेर्कितो। 19मीतिवी ख्‍यिराङला जिम्‍नी ठिम्‍खाङला क्‍योलुप पेला ख्‍यिराङ चुक सि गोकिवी याङ्‍ना काङ सि गोकिवी सिनी पप माकी, च्‍यिलासिसिन ख्‍यिरा काङ सि गोवु ति ती पेला राङ ख्‍यिराङला लप्‍कितो। 20ती पेला लपुप ति ख्‍यिराङ मिन, यिने ख्‍यिराङ नेसुर सुङ्‍गुप ख्‍यिरा पपा कोन्‍छ्‍योककी थु चाङ्‍मा यिन।

21मीतिवी खोरो अच्‍युनुपला सेतुपला चेक तेकितो, तमा पपी खोरो पेजातिवाला ताङ पेजातिवी खोरो पपाआमी तेन्‍दोकला लानी तिवाला से ज्‍यिकितो। 22ख्‍यिरा ङला तेपा क्‍यावु तप्‍की मी तेरीकी ख्‍यिराङला ङ्‍यिङ्‍मर कितो। यिने सु ज्‍युक्‍ला सेक तेपा क्‍यानी हम क्‍यान देकिवे, तीला र्‍होकितो। 23तिवी ख्‍यिराङला ग्‍येसा च्‍यिकला छेटाङ बिन्‍सिन ग्‍येसा यम्‍बाला टोनी ग्‍युक। वुतुङ के ङ ख्‍यिराङला सिरिन, ख्‍यिराङ इस्राएलकी ग्‍येसा तेरीला लेपुप सिनाङ गोमाला ङ मी पुज्‍युङ वुङ्‍गितो।

24लोमा खोरो गेकेन सिनाङ छ्‍ये मेवी, तमा लावा खोरो ज्‍यिन्‍दाक सिनाङ छ्‍ये मेवी। 25लोमा खोरो गेकेन दोके ताङ लावा खोरो ज्‍यिन्‍दाक दोके च्‍युङ्‍सिन टेके गिवी। तिवी खाङ्‍बी ज्‍यिन्‍दाकला बालजिबुल सिनी सिसिन ती खाङ्‍बी मीतिवाला याङ मङ चुका मेलोक्‍पा मिसिर्वी रो?”

सुला ज्‍यिवा कि गोकिवी

(लूका १२:२-७)

26“तुक क्‍यानी तिवाला ज्‍यिवा माकी, च्‍यिलासिसिन उप ज्‍याक्‍नी ज्‍युक्‍ला मोथोङ्‍गुप ताङ बान ज्‍याक्‍नी ज्‍युक्‍ला हाक्‍मोकोवु ति काङ साङ मे। 27ङे ख्‍यिराङला नक्‍तोमीला काङ सिक्‍यावे, ती ति ख्‍यिरा ठछ्‍येलीला सी। तमा ङे ख्‍यिराङला सताम नाङ्‍ला क्‍यावु ताम्‍ङे ति खाङ्‍बी ख नेमा ख्‍याप्‍टाक की। 28ख्‍यिरा जु सेसिनाङ नम्‍शिङ ति से मुथुपुप तीला ज्‍यिवा माकी। यिने जु ताङ नम्‍शिङ ङ्‍यिकरला ङ्‍येलाला क्‍युरुप कोन्‍छ्‍योकला ति ज्‍यिवा की। 29डेवा च्‍यिकला बन्‍गिरी ङ्‍यी मिटिन्‍वी रो? यिने पपा कोन्‍छ्‍योककी नोवा मेसिन बन्‍गिरी च्‍यिक साङ सला मुलुम्‍वी। 30ख्‍यिरा ति याङ गोकी र्‍हे ङ्‍येङ्‍मातिवा साङ कोन्‍छ्‍योककी तेरी ङोनी ज्‍याङ वे। 31तुक क्‍यानी ख्‍यिराङ ज्‍यिवा माकी, च्‍यिलासिसिन ख्‍यिराङ याङ बङी वोतुप बन्‍गिरीतिवा सिनाङ मङ खक्‍छ्‍येवु वे।”

मीतिवी मिङ्‍गाला ख्रीष्‍टकी कोर्ला सिरुप

32“सी मीतिवी मिङ्‍गाला ङला तेपा किवी सिनी सिवे, ङ साङ देवाच्‍येनला ज्‍यु वोतुप ङे पपी मिङ्‍गाला तीला ङे मी यिन सिनी सिरिन। 33यिने सी मीतिवी मिङ्‍गाला ङला ङो मेशेवी सिनी सिवे, ङ साङ देवाच्‍येनला ज्‍यु वोतुप ङे पपी मिङ्‍गाला तीला ङो मेशेवी सिनी सिरिन।”

लोदिमु मिन, ख्‍ये बेतुपला वावु यिन

(लूका १२:५१-५३; १४:२६-२७)

34“ङ जम्‍बुलिङकी मीतिवाला डिक च्‍यिनी लोदिमु तेरुपला वावु यिन सिनी ख्‍यिराङ नासाम मातोङ। ङ याङ लोदिमु तेरुपला मिन, यिने तिवाला ख्‍ये बेतुपला वावु यिन। 35ङ याङ ङला तेपा कितुपतिवा खोरो पपी मुला, पुम खोरो आमी मुला, तमा नमा खोरो यिवी मुला उटक लोङ्‍गुपला वावु यिन। 36तुक क्‍यानी ख्‍यिरा डतिवा ति रङगी मीतिवा राङ गिवी। 37सी ङला सिनाङ खोरो पपाआमाला मङ ङ्‍यिङ्‍ज्‍ये किवे, ती ति ङे तिङ्‍ला तिङ्‍योक मोछ्‍योवी। सी ङला सिनाङ खोरो पुज्‍युङपुमला मङ ङ्‍यिङ्‍ज्‍ये किवे, ती साङ ङे तिङ्‍ला तिङ्‍योक मोछ्‍योवी। 38तमा सु खोरो ग्‍यङ्‍शिङ खुर्नी ङे तिङ्‍ला तिङ मोङ्‍योक वे, ती साङ ङे लोमा वुङ मोछ्‍योवी। 39सी खोरो मिजी र्‍होकुप छोल्‍गिवे, तीकी मिजी ति तोर्नी डिवितो। यिने सी ङे थोक्‍ला खोरो मिजी तोर ज्‍यिकिवे, तीला नाम्‍साङ मिशिवु मिजी थोप्‍कितो।”

छ्‍यक्‍तक

(मर्कूस ९:४१; लूका १०:१६)

40“सी ख्‍यिराङला सेमला लिङ्‍गिवे, तीकी ङला खोरो सेमला लावु यिन। सी ङला सेमला लिङ्‍गिवे, तीकी ङला तोङ्‍गुप तीला खोरो सेमला लावु यिन। 41कोन्‍छ्‍योककी लुङ्‍तेम्‍बाला कोन्‍छ्‍योककी लुङ्‍तेम्‍बा सिनी सेमला लिङ्‍गुप तीला कोन्‍छ्‍योककी लुङ्‍तेम्‍बाला थोपुप छ्‍यक्‍तक थोप्‍किवी। टेङ्‍बु वोतुप मीला टेङ्‍बु वोतुप मी सिनी सेमला लिङ्‍गुप तीला टेङ्‍बु वोतुप मीला थोपुप छ्‍यक्‍तक थोप्‍किवी। 42सी दी छ्‍युङातिवी पर्ला मिरा च्‍यिकला ङे लोमा यिन सिनी छ्‍यु टङ्‍गा फर्वा काङ यिन्‍सिनाङ तेर्किवे, तीला थोपुप छ्‍यक्‍तक ति वुतुङ के तोर्नी मोडोवी।”