Search form

Salmo 107

LIURU KUU UꞌUN

Salmos 107—150

Ni skaku niꞌnu ña ia Dios nuu tnundoꞌo

1Vi ndakuantaꞌu ni nuu ia Dios,

chi ia guaꞌa kuu ya, te nikuii nikani kundaꞌu ini ña ya.

2Te na vi kaꞌan ñayiu ni ndatau Jitoꞌo ja ia guaꞌa kuu ya,

ñayiu ni ndatau ya ja ni ka oi nuu ndaꞌa ñayiu ka kaꞌan uꞌu ña,

3vi ñayiu ni ndaxtutu ya nuu ndiꞌi ñuu,

ja mandikuei ichi nuu jinonta nikandii vi ichi nuu makee,

vi ichi norte vi ichi sur.

4Te ni ka ojika ndoñuꞌi nuu ñuꞌu teꞌa nuu tu na ñayiu ka oo,

te tu ni ka niꞌi in ichi ja vi niꞌi in ñuu nuu vi koi.

5Te ka yichi vi ka kokin,

te vi ja mavikuita kuiti ja vi sandee ni ka ja vi kui.

6Yun te nuu ka kusuchi ndevaꞌa ini, te ni ka kana ndaꞌui nuu Jitoꞌo,

te ni skaku niꞌnu ña ya nuu tnundoꞌo ka tnaꞌi.

7Yun te ni jaka ña ia Dios in ichi ndaa

guaa ndee ni kentakuei in ñuu nuu vi koi.

8Na vi ndakuantaꞌu ñayiu yun nuu Jitoꞌo, chi kundaꞌu ini ña ya jin,

vi saꞌa ya tniuu vii tniuu vaꞌa ja jaꞌa ñayiu.

9Chi jiñaꞌa ya ndute ka jiꞌi ñayiu ka yichi,

te jiñaꞌa ya ja guaꞌa ka jaa ñayiu ka kokin.

10Te sava ñayiu ka oo ñunee ja vi ja yatni ja vi kui,

te ka yiꞌi vekaa vi ka kusuchi ini vi ka nuꞌni jin cadena.

11Chi ni ka kusoꞌi nuu tnoꞌo ni tatnuni Jitoꞌo,

te ni ka skexikoi tnoꞌo ja ni xteku ña ia oo ndee sukun yun.

12Te yun kuu ja ni saꞌa ia Dios ja ni ka satniuu ndee ndevaꞌi,

te ni junkuei nuu tnundoꞌo, te tu na in ni chituu ña jin.

13Yun te nuu ka kusuchi ndevaꞌa ini, te ni ka kana ndaꞌui nuu Jitoꞌo,

te ni skaku niꞌnu ña ya nuu tnundoꞌo ka tnaꞌi.

14Te ni ndatau ña ia Dios nuu ñunee ja vi ja yatni ja vi kui

vi ni jaꞌnde ya cadena ja ka nuꞌni.

15Na vi ndakuantaꞌu ñayiu yun nuu Jitoꞌo, chi kundaꞌu ini ña ya jin,

vi saꞌa ya tniuu vii tniuu vaꞌa ja jaꞌa ñayiu.

16Chi ni skuechi ya yeꞌe kaa ja kuu bronce,

vi ni skuechi kueli ya ndakaa ja yiꞌi yeꞌe yun nuu ni skaku niꞌnu ña ya.

17Te sava ñayiu vasa, chi ni ka ndakoi siki ia Dios,

te ni ka tnaꞌi tnoꞌo suchi ini ja jaꞌa jakueꞌe ka saꞌi yun.

18Te ni ka kukini ini ndiꞌi ndei ja ka jai,

te vi ja yatni ni ka ja vi kui.

19Su nuu ni ka kusuchi ndevaꞌa ini, te ni ka kana ndaꞌui nuu Jitoꞌo,

te ni skaku niꞌnu ña ya nuu tnundoꞌo ka tnaꞌi.

20Yun te ni tetniuu ya tnoꞌo ya, te ni ndasaꞌa ña ya,

te ni skaku niꞌnu ña ya nuu yau ñaña.

21Na vi ndakuantaꞌu ñayiu yun nuu Jitoꞌo, chi kundaꞌu ini ña ya jin,

vi saꞌa ya tniuu vii tniuu vaꞌa ja jaꞌa ñayiu.

22Vi soko ni kiti ja ka ndakuantaꞌu ni nuu Jitoꞌo,

te vi ndakani sii ini ni ndiꞌi tniuu vii tniuu vaꞌa ja saꞌa ya.

23Yun te ni ka skaka tee ka xiko ndatniuu jin barco,

te ni ka jiondita de nuu ndute mar.

24Te ndee nuu kunu ka nuu ndute mar yun

ni ka jini de tniuu naꞌnu vi tniuu vii tniuu vaꞌa ja saꞌa Jitoꞌo.

25Chi ni kaꞌan ia Dios, te ni junkiꞌi in tachi niꞌi ndevaꞌa,

te ni ka ndakoo sukun ola ndute mar,

26te ni ndaa ndute yun guaa ndee andivi, vi ni nuu de ndee kaꞌa ndute mar.

Te vi tu ka na inu anu de ja ka yuꞌu ndevaꞌa de nuu jakueꞌe yun.

27Te vi suaꞌa ka niꞌi de, te ka ndondiso de na kuinio ñayiu ka jini,

te tu nagua ni jiniuꞌu saꞌun ja ka jini guaꞌa de naxa ka jika de jin barco yun.

28Su nuu ni ka kusuchi ndevaꞌa ini de, te ni ka kana ndaꞌu de nuu Jitoꞌo,

te ni skaku niꞌnu ña ya nuu tnundoꞌo ka tnaꞌa de.

29Te ni sama ya sau tachi yun jin in tachi vita ni,

vi ni ka junkuiin ola ndute mar yun.

30Te nuu ni ka jini de ja ni junkuiin ola ndute mar yun, te ni ka kusii ini de.

Te ni jaka ña ia Dios ja kuaꞌankuei de in ñuu kaa yuꞌu ndute mar,

saa te ni kentakuei de nuu ka ndioo ini de ja kiꞌinkuei de.

31Na vi ndakuantaꞌu ñayiu yun nuu Jitoꞌo, chi kundaꞌu ini ña ya jin,

vi saꞌa ya tniuu vii tniuu vaꞌa ja jaꞌa ñayiu.

32Vi saꞌa kaꞌnu ni ya nuu ka ndututu ni ja ka kuu ni ñayiu ñuu ya.

Vi saꞌa kaꞌnu ni ya nuu ka ndututu ni ja ka kuu ni ñayiu ka kuu nijaꞌnu.

33Ni saꞌa ia Dios ja ni ka yichi yute,

vi ni sichi ya nuu kee ndute ja ni nduu ñuꞌu yichi.

34Te ni saꞌa ya ja tu kuvaꞌa ka ñundeꞌi ja ni okuvaꞌa vii ndevaꞌa,

ja jaꞌa jakueꞌe ka saꞌa ñayiu ka oo nuu ñundeꞌi yun.

35Te suni ni saꞌa ya ja ñuꞌu teꞌa yun ni nduu in nuu ñuꞌu ndute,

te ñuꞌu yichi yun ni nduu in nuu kee ndute.

36Te yun ni jiñaꞌa ya in nuu vi koo ñayiu ka jiꞌi soko,

te ni ka saꞌa mai in ñuu nuu vi koi.

37Te ni ka jitui nuu ñundeꞌi vi ni ka ndaxtei tnu uva,

te ni kuvaꞌa vii ndevaꞌa ñundeꞌi yun.

38Te ni saꞌa vii ni saꞌa vaꞌa ña ia Dios, te ni ka ndakaya kuaꞌa ndevaꞌi,

vi ni ka kaya kiti ka nevaꞌi.

39Su nuu ndevaꞌa ndetnuni ni ka saꞌa ña jin,

te ni kii jakueꞌe siki vi tnundoꞌo ja ni ka tnaꞌi,

saa te ni ka jiꞌi, te ni ka nduu joo ni.

40Te ja jaꞌa yun kuu ja ni skexiko ña ia Dios jin tee ka kuu nijaꞌnu ja ni ka saꞌa jakueꞌe yun,

te ni saꞌa ya ja ni ka ndoñuꞌu de, te yaꞌa yun ni ka jika de.

41Su ndatau ya ñayiu ka kundaꞌu nuu tnoꞌo suchi ini ja ka tnaꞌi,

te saꞌa ya ja vi ndakaya kuaꞌa ñayiu veꞌi na kuinio ndikachi.

42Te nuu vi kuni ñayiu ndaa ja siun saꞌa ya, te vi kokusii ini,

su ndiꞌi ñayiu kueꞌe, chi vi kasi yuꞌi.

43Na in kuu ñayiu ndichi, te na kuꞌun ini tnoꞌo yaꞌa,

te na jinkuiꞌnu ini ja kundaꞌu ndevaꞌa ini ña Jitoꞌo.

Tutu ii - Kaꞌan ia Dios nuu ndiꞌi ñayiu

© Wycliffe Bible Translators, Inc. All rights reserved.

More Info | Version Index