Search form

Salmo 27

Maa Jitoꞌo Dios kuu ia yeꞌe niꞌnu vi skaku niꞌnu ña ya

Yaa ni tee David.

1Maa Jitoꞌo Dios kuu ia yeꞌe niꞌnu nuu ichi jika san, vi skaku niꞌnu ña ya.

¿Te na in kuu ja koyuꞌu san?

Te maa Jitoꞌo Dios ndesi niꞌnu guaꞌa nuu oo san,

te tu na in kosiuꞌu ña jin san.

2Te nuu ka kuyatni ñayiu kueꞌe vi ñayiu ka kaꞌan uꞌu ña

ja ka ndakoi siki san ja vi xnaa ñai jin san,

te ni ka skunai, te tu ni kuu nagua vi saꞌi.

3Te visi na vi kionduu ña soldado jin san,

su ma koyuꞌu san jin anu san.

Te visi na vi ndakoo ñayiu ja vi kaxin tnaꞌa jin san,

su kukanu ini san ya.

4Te invaa ni ja jikan san nuu Jitoꞌo,

te yun kuu ja nduku san ja koo san veꞌe ya

ndiꞌi ni kiuu ja teku san,

nagua ja kondiaꞌa san ja luu ndevaꞌa kaa Jitoꞌo,

nagua ja kochiñuꞌu san ya nuu veñuꞌu ya.

5Chi nuu kenta kiuu kueꞌe, te tavaꞌa ña ya nuu veꞌe ii ya,

te tayuꞌu ña ya ndee nuu kunu ka nuu oo maa ya,

te sonee ña ya ndee nuu sukun, siki in kava, te tu nagua ndoꞌo san.

6Yun te saa kuu ja ndanenuu san

ndee siki nuu ni ka jionduu ña, ñayiu ka kaꞌan uꞌu ña jin san.

Saa te saa soko san kiti nuu veꞌe ii ia Dios,

te kana jaa san ja kusii ini san,

vi kata san yaa nuu Jitoꞌo.

7Konini ni tnoꞌo kaꞌan san, vi Jitoꞌo san, nuu jikantaꞌu san nuu ni.

Kaꞌan ndaꞌu ña ni jin san, te konini ni tnoꞌo kaꞌan san.

8Chi kachi anu san nuu san:

“Ndanduku ia Dios”.

Te ndanduku ña san jin ni, vi Jitoꞌo san.

9Ma tayuꞌu nuu ni nuu oo san,

te ni ma skexiko ña ni jin san

ja jinokuechi san nuu ni jin ja kiti ini ni,

chi maa ni kuu ia chituu ña jin san.

Ma xndendoo ña ni, te ni ma kujioo ni nuu oo san,

chi maa ni kuu ia Dios ja skaku niꞌnu ña jin san.

10Chi visi na vi xndendoo ña tata san vi nana san,

su maa ni, vi Jitoꞌo, chi oo ni jin san.

11Kaxtnoꞌo ni ichi ni ja na kaka san, vi Jitoꞌo san,

te kondeka ña ni ja na kaka san ichi ndaa,

ja jaꞌa ñayiu ka kaꞌan uꞌu ña jin san.

12Te ma ndasiaꞌa ña ni nuu ndaꞌa ñayiu ka kaꞌan uꞌu ña jin san,

ja vi saꞌa ñai nagua ka kuini mai,

chi ni ka ndakoo testiu tnoꞌo siki san,

te ka kuini ja vi saꞌa ñai jakueꞌe.

13Nuu suaꞌa te tu kandija san ja kuni san

ja kaꞌan ndaꞌu kaꞌan kee ña Jitoꞌo Dios nini oo san ñuyiu yaꞌa,

vaa vi ja ni kuita saꞌun san.

14Kondetu kaꞌnu ni Jitoꞌo Dios, te saꞌa ndakui ni maa ni.

Saꞌa ndee ni ini anu ni.

Saa saꞌa ni, kondetu kaꞌnu ni ja chituu ña Jitoꞌo Dios jin ni.

Tutu ii - Kaꞌan ia Dios nuu ndiꞌi ñayiu

© Wycliffe Bible Translators, Inc. All rights reserved.

More Info | Version Index