Search form

Salmo 68

Vi katao yaa nuu ia Dios chi ni kundee ya

Yaa ni tee David

1Na ndakoo ia Dios, te na katenuu ya ñayiu ka kaꞌan uꞌu ña jin ya,

te na vi kunu yuꞌu ñayiu ka skexiko ña jin ya kiꞌinkuei.

2Te na vi nai nagua naa ñuaꞌa nuu yiꞌi tachi,

te na vi ndutei nagua ndute ñuma nuu ñuꞌu.

Saa na vi naa ñayiu kueꞌe nuu ia Dios.

3Su ñayiu ndaa, chi vi kokusii ini nuu ia Dios,

te vi kantai ja ka kusii ini ndevaꞌi.

4Vi kata ni nuu ia Dios, vi kata ni yaa ja ka ndakakuneꞌe ni sivi ya,

vi saꞌa kaꞌnu ni ia yoxnee ndee siki viko,

vi kokusii ini ni nuu ya, chi maa ya nani Yavé.

5Te Dios, ia oo veꞌe ii ya, kuu tata suchi kueli ka kuu laꞌu,

vi ia kaꞌan niꞌnu ja jaꞌa ñasiꞌi ni ka jiꞌi yii.

6Maa ia Dios jiñaꞌa in veꞌe nuu ka oo ñayiu ja vi koi jin in ñayiu oo maintnoꞌo ni,

te keneꞌe ya ñayiu ka ndesi vekaa, te chituu ña ya ja vi kee vaꞌi.

Su ñayiu ka ndakoo siki ya, chi vi koi nuu ñuꞌu yichi.

7Nuu ni kee ni, vi Dios, ja ni oyoxnoꞌo ni nuu ñayiu ñuu ni,

nuu ni ka ojika ni jin nuu ñuꞌu teꞌa,

8te ni tnaa nuu ñuꞌu, te suni ni kuun sau ndee andivi nuu ndiaꞌa maa ni, vi Dios,

te ni tnaa yuku Sinaí yun nuu ni, ja kuu maa ni ia Dios ñayiu Israel.

9Te ni saꞌa ni ja ni kuun guaꞌa sau, vi Dios,

nagua ja nukuꞌun ndee ini ñuꞌu ni ja ni kuu ava.

10Te nuu ñuꞌu yun ni ka junkoo ñayiu ñuu ni,

chi ia ndaꞌu ndevaꞌa ini kuu ni, te ni savaꞌa ni nuu vi koo ñayiu ka kundaꞌu.

11Te maa Jitoꞌo ni jiñaꞌa tnoꞌo,

te kuaꞌa ndevaꞌa ñasiꞌi ni ka xtutenuu ña tnoꞌo vaꞌa ya.

12Ni ka jino yuꞌu rey vi soldado de,

te ñasiꞌi ja ni ka kendoo veꞌe yun ni ka ndakaꞌnde ña

ja ni ka kindee nuu ñayiu ka nee uꞌu tnaꞌa jin ña.

13Te roon ja ni ka tayuꞌu nuu ron neꞌu nuu ka yiꞌi lelu,

te suni vi niꞌi ron in jaguaꞌa na kuinio ndijin sata ja ni ndukutu jin kaa kuu plata

te kuaan kuaan tnoo ti ja ni ndukutu jin oro.

14Te nuu ni jatenuu ña ia Dios ndakui ndevaꞌa jin rey,

kuu na kuinio ja kuun tiꞌiñu nuu yuku Salmón.

15Yuku maa ia Dios kuu yuku Basán,

yuku inu sukun ka kuu yuku Basán.

16Te roon yuku inu sukun yun,

¿nau ja ka kukuasun ini ron nuu yuku ni jinkuaan ini maa ia Dios ja koo ya?

Te jandaa ndija ja yun koo Jitoꞌo nikuii nikani.

17Te kuaꞌa ndevaꞌa ndetnuni carreta ja jaxin tnaꞌa nevaꞌa ia Dios,

te ni kii Jitoꞌo jin carreta yun ndee yuku Sinaí nagua ja ndiuu ya veꞌe ii ya.

18Te ni ndaa ni ndee sukun ka, vi Dios,

te kuaꞌan ni jin ja ni juꞌni ni ja xiin siki ni kundee ni,

te ni jantaꞌu ni ja ka soko ñayiu nuu ni,

te suni ndee ñayiu ka ndakoo siki ni, ni ka soko nuu ni,

nagua ja koo ni neꞌu nuu ka oi, vi Jitoꞌo san.

19Te vi saꞌa kaꞌnu ni Jitoꞌo, chi in kiuu in kiuu jiso ya tnundoꞌo ka tnaꞌo,

te maa ya kuu ia Dios ja skaku niꞌnu ña ya jion.

20Te maa ya kuu ia Dios mao, ia skaku niꞌnu ña,

te maa Jitoꞌo kuu ia ndatau ña ja ma vi kuo.

21Te jandaa ndija ja kaxin yuu maa ia Dios yiki xini ñayiu ka kaꞌan uꞌu ña jin ya,

chi xtuji ya yiki xini ñayiu ka saꞌa yika kuechi.

22Te jiñaꞌa Jitoꞌo nuu ñayiu ñuu ya: “Ndee Basán ndajioneꞌe ña rin ja noꞌokuei ron ñuu ron,

te ndee kakaꞌa ndute mar, te ndajioneꞌe ña rin ja vi ndajiokuiin ron,

23nagua ja vi ndukuaꞌa siꞌin ron ja vi kuchi niñi ñayiu ka kaꞌan uꞌu ña jin ron,

te vi yundee tiꞌina ron ja suni vi ndakuni ndee ti joo”.

24Te vi kuni ñayiu ichi jika ni kuaꞌan ni, vi Dios,

te ichi nuu ndajiokuiin ni, vi chiñuꞌu ña ñayiu jin ni, vi Dios san vi rey san,

ja ndiuu ni ini veꞌe ii ni.

25Te ichi nuu, kuaꞌankuei ñayiu ka jita, te ichi yata kuaꞌankuei ñayiu ka tee yaa,

te maꞌñu kuaꞌankuei suchi siꞌi kuechi ka skaxin pandero.

26Vi saꞌa kaꞌnu ni ia Dios nuu ka ndututu ni,

vi saꞌa kaꞌnu ni Jitoꞌo, maa ni ja ka kuu ni ndikin tata Israel.

27Te yun ka oo ñayiu ka kuu ndikin tata lule Benjamín, ja ka ndeka ña jin ñayiu kuaꞌa yun,

vi tee ka tatnuni ja ka kuu ndikin tata Judá, kuaꞌankuei de jin ñayiu ka kuu tatatnoꞌo de,

vi tee ka tatnuni ja ka kuu ndikin tata Zabulón, vi tee ka tatnuni ja ka kuu ndikin tata Neftalí,

ka ndikin ña kuaꞌankuei.

28Xneꞌe ni jakaꞌnu ni, vi Dios,

ndasaꞌa yutnu ni nagua ni saꞌa ni nuu ni chituu ña ni jin san.

29Te ja jaꞌa veñuꞌu ni ja oo Jerusalén,

te kikuei rey jin ja vi soko de nuu ni.

30Tetniuu ni tnundoꞌo siki ñayiu ka jaxin tnaꞌa ja ka kuu na kuinio kiti xeen ka oo neꞌu yuku ja ni nana yuꞌu ndute,

vi ka kuu na kuinio isndiki xeen ja ka oo neꞌu ñayiu sava ka ñuu ja ka kuu na kuinio chikeru.

Saꞌa ni ja na vi kindei vi kititi ndiꞌi ñayiu yun nuu ni, te na kikuei jin kaa kuu plata ja vi sokoi nuu ni.

Te katenuu ni ñayiu ñuu ka junkuaan ini ja vi kaxin tnaꞌa, na kiꞌinkuei.

31Te ndee Egipto kikuei tee ka jinokuechi nuu rey,

te kikuei ñayiu ñuu Etiopía jin ja vi sokoi nuu ni.

32Maa ni ja ka kuu ni ñayiu ñuu nuu ka tatnuni rey,

vi kata ni nuu ia Dios, vi kata ni yaa nuu Jitoꞌo.

33Chi maa ya kuu ia yoxnee ndee siki andivi, andivi ja oo ndee ja nanaꞌa.

Te vi konini ni, chi vi jiso kuiti kaꞌan ya na kuinio tajan, chi ndakui ndevaꞌa kaꞌan ya.

34Vi ndakuni ni jakaꞌnu ia Dios, chi yeꞌe tajan ya ninii nuu ka oo ñayiu Israel,

te jakaꞌnu ya oo ndee andivi.

35Chi kaꞌnu ndevaꞌa kuu ni, vi Dios, ndee veꞌe ii nuu oo ni,

te maa ni kuu ia Dios ñayiu Israel ja jiñaꞌa ni jakaꞌnu vi jandakui nuu ñayiu ñuu ni.

Kaꞌnu kuu ia Dios.

Tutu ii - Kaꞌan ia Dios nuu ndiꞌi ñayiu

© Wycliffe Bible Translators, Inc. All rights reserved.

More Info | Version Index