Search form

Salmo 94

Maa Jitoꞌo kuu ia sandaa kuechi ñayiu ñuyiu

1Maa ni, vi Jitoꞌo san, kuu ia Dios ja ndaxtenaa ni ñayiu,

xneꞌe ni maa ni ja ndaxtenaa ni ñayiu ka saꞌa jakueꞌe, vi Dios.

2Maa ni kuu ia sandaa kuechi ñayiu ñuyiu,

ndakoo ni te tetniuu ni tnundoꞌo, na vi tnaꞌa ñayiu ka saꞌa teyii mai.

3¿Nasaa ka kiuu guaa vi kokusii ini ñayiu ka saꞌa jakueꞌe, vi Jitoꞌo san?

4Te ndiꞌi ñayiu ka saꞌa jakueꞌe yun, ka kaneꞌe

vi ka kuvixin vi ka kuteyii ndevaꞌa jin jakueꞌe ka saꞌa.

5Te ka saꞌa jakueꞌe jin ñayiu ñuu ni,

vi ndevaꞌa ndetnuni ka saꞌa ña jin ñayiu ni saꞌa jajin ni.

6Ka jaꞌni ña jin ñasiꞌi ni ka ndondaꞌu vi ñayiu ka jika nuu ndaꞌu nuu ñuu san,

vi ka kindee ja ka jichi ka kanda suchi ka kuu laꞌu.

7Te ka kachi: “Tu ndiaꞌa Jitoꞌo,

te ni ma kuni ia Dios ndi Jacob nagua ka saꞌo”, ka kachi.

8Te maa ni, ñayiu vasa, vi ñayiu tu ka jini saꞌun nagua kuu,

¿na kiuu te saa vi jinkuiꞌnu ini ni?

9Chi ¿a ma kuu konini ia ni saꞌa soꞌo ni, tnoꞌo ka kaꞌan ni?

Te ¿a ma kuu kondiaꞌa ia ni saꞌa nduchi nuu ni, nagua ka saꞌa ni?

10Te ia ndakanu ichi ndaa ña jin ñayiu sava ka ñuu,

chi tetniuu ya tnundoꞌo siki ñayiu ka saꞌa jakueꞌe,

te kuni ia kaxtnoꞌo tnoꞌo ndichi nagua ka saꞌa ñayiu yun.

11Chi jini Jitoꞌo nagua ka ndakani ini ñayiu,

ja ninoꞌo ni masu ja jiniuꞌu kuu ja ka ndakani ini.

12Na taꞌu na ndetu ñayiu ndakanu ichi ndaa ni, vi Jitoꞌo,

vi kaxtnoꞌo ni ley ni nui,

13nagua ja vi kosii ini nuu na kenta kiuu tnundoꞌo,

nini savaꞌa ni in yau nuu vi kanakau ñayiu ka saꞌa jakueꞌe.

14Chi ma xndendoo ndaꞌu Jitoꞌo ñayiu ñuu ya,

ni ma xndendoo maintnoꞌo ya ja ni saꞌa jajin ya.

15Te tnundoꞌo ja tetniuu ia Dios nduu ja kaꞌnde ndaa ya kuechi,

te ndiꞌi ñayiu ndaa vi kondikin tniuu ndaa ja saꞌa ya.

16¿Na in ndakoo ja jaꞌa san ja kaxin tnaꞌa jin ñayiu kueꞌe?

¿Na in chituu ña jin san ja kaxin tnaꞌa jin ñayiu ka saꞌa jakueꞌe?

17Nuu suaꞌa te tu ni chituu ña Jitoꞌo jin san,

vaa vi ñama kuiti ja katuu san ndee chii ñuꞌu nuu tu na in kaꞌan na in kuu.

18Te nuu ni kachi san nuu ni: “Ni kekaa siꞌin san”,

te ni kundaꞌu ini ña ni jin san, vi Jitoꞌo san, te ni chituu ña ni.

19Te nuu ndakani ndevaꞌa ini san vi kusuchi ini san,

te ni ndataa ni tnoꞌo sii ini ja ni ndusii ini anu san.

20Maa ni, chi ma kuu vi kondeka tnaꞌa guaꞌa ni jin tee kueꞌe ja ka jaꞌnde kuechi,

ja ka jantniuu de Ley ja vi saꞌa de jakueꞌe jin sava ka ñayiu.

21Te ka kututu de ja ka ndakoo de siki ñayiu ndaa,

te ka kaꞌan de ja na kuu ñayiu tu na kuechi.

22Su maa Jitoꞌo kuu ia tavaꞌa ña jin san,

vi ia Dios san, chi kuu ya na kuinio kava ja jito jini ña ya.

23Te saꞌa ya ja nanakau jakueꞌe ka saꞌa maa de siki de,

te nuu maa jakueꞌe ka saꞌa de yun, xnaa ña ya jin de.

Chi xnaa ña maa Jitoꞌo, ia kuu Dios mao.

Tutu ii - Kaꞌan ia Dios nuu ndiꞌi ñayiu

© Wycliffe Bible Translators, Inc. All rights reserved.

More Info | Version Index