Search form

Salmo 98

Ndiꞌo na vi kata in yaa nuu ia Dios

1Vi kata ni in yaa jaa nuu ia Dios,

chi ni saꞌa ya tniuu vii tniuu vaꞌa,

te jin ndaꞌa kuaꞌa ya vi jin jakaꞌnu ya ni kundee ya.

2Chi ni xneꞌe ya nuu ñayiu ja maa ya ni skaku niꞌnu ña,

te vi jin nuu ñayiu sava ka ñuu, ni xneꞌe ya tniuu ndaa saꞌa ya.

3Chi ni ndakaꞌan ya ja kundaꞌu ini ña ya,

vi ja saꞌa ndaa ya jin ñayiu ñuu Israel.

Te ndiꞌi ñayiu ka oo ndee jaꞌa ñuyiu ni ka jini ja ni skaku niꞌnu ña ia Dios mao.

4Ndiꞌi ni ja ka oo ni ninii ñuyiu, vi kata ni ja ka kusii ini ni nuu Jitoꞌo,

vi kana jaa ni, te vi katu ndaꞌa ni, vi kata ni yaa nuu ya.

5Vi kata ni yaa nuu Jitoꞌo, nagua kuaꞌan yaa ja ka tee jin arpa.

Vi kata ni nagua kuaꞌan yaa ja ka tee jin xtnuu kaxin.

6Vi kata ni yaa ja ka kusii ini ni nuu Jitoꞌo, ia kuu rey,

nagua kuaꞌan yaa ja ka tiuu jin ndiki vi jin strumentu.

7Na kañu ndute mar jin ndiꞌi kiti ka ñuꞌu nuu,

vi na kana ñuyiu vi ndiꞌi ja ka oo nuu.

8Te na vi katu ndaꞌa yute,

vi na vi kata ndiꞌi yuku ja ka kusii ini,

9te na vi kata nuu Jitoꞌo, chi vaji ya ja kotatnuni ya nuu ñayiu ñuyiu.

Te saꞌa ndaa ya, te inuu inuu kaꞌnde ndaa ya kuechi ñayiu ñuyiu.

Tutu ii - Kaꞌan ia Dios nuu ndiꞌi ñayiu

© Wycliffe Bible Translators, Inc. All rights reserved.

More Info | Version Index