Search form

Genesis 43

Pi walagen Josef nra sulod nga Egypt ni yad Benjamin

1Me gel e uyongol u Kanaan, 2ma fa’ani kay girdi’en e tabinaw rok Jakob urngin e grain nni fek u Egypt, me ga’ar Jakob ngak pifak ni pumo’on, “Mu sulod nga Egypt ngkum chuw’iyed buch’uw e ggan ngodad.” 3Me ga’ar Judah ngak, “Fare mo’on e kari tay chiylen ngomad ndab gu warod nga p’eowchen ni fa’anra dabi un walagmad ngomad. 4Fa’anra yag ni ngam pi’ walagmad nge un ngomad, ma gamad ra yan gu chuw’iyed e ggan ni fan ngom. 5Mra dabum, me ere dab gu warod, ni bochan e ke ga’ar e re mo’on nem, dab mbad nga p’eowcheg ni fa’anra de mo’ romed fa’anem ni walagmed.” 6Me ga’ar Israel, “Mang ni mogned ngak e re mo’on nem ni kabay reb i walagmed ngabang? Kar mu gel niged e gafgow ngog.” 7Me lungurad, “Re mo’on nem e i fith murung’agmad nge girdi’ nu tabinaw romad ni ga’ar, ‘Kabfos e chitamangimed? Kabay reb e pumo’on ni walagmed?’ Ere dabisiy ni nggu pi’ed e fulweg ko pi de’er rok. U rogon ma gamad nang nra yog ngomad ni nggu feked walagmad nge un ngomad?” 8Me ga’ar Judah ngak e chitamngin, “Mpag e cha’nir nge un ngog nggu warod. Ma aram e dariy bagdad nra yim’ nriyul’ ko uyongol. 9Mpag nge milfan ngog; fa’anra dab gu fulweg ngom ni ka rogon, me gag e bayi par e kireb riy u dakenag u p’eowchem ni n’umngin nap’an e yafos rog. 10Fa’an mang e dad son gad ni aray n’umngin nap’an, ma ke gaman e ruw yay ni kug warod kugbad.”

11Me ga’ar Israel ni chitamangirad ngorad, “Fa’anra er rogon, me ere nge par riy ni arrogon, ba’aray e n’en ni ngam rin’ed: Mfeked e tin th’abi fel’ ban’en ni bay ko nam rodad ngam ted nga tutuw romed nge mang tow’ath romed ngak governor, ni aram e bochu’uw e florida, nge buchu’uw e honey, nge spices, nge wom’ngin e pistachio nge keal. 12Mu kum feked e salpiy ni gonap’an e ruw yay ko fa tinem e salpiy ni mfeked ko som’on, ya thingar mfulweged fapi salpiy romed nni fulweg ni fa’an nnin’ nga daken e grain u lan e tutuw romed. Ya sana ni balyang riy. 13Mfeked walagmed, mi gimed fal’eg rogomed ngam sulod ngak fare mo’on. 14I Got ni Gubin ma Rayag Rok e nge gagiyegnag e re mo’on nem nge runguymed, nge yag ni pi’ ngomed fa binem i walagmed me pag Benjamin nge un ngomed ko sul. Me gag, e fa’anra thangri thay e bitir rog u pa’ag, me ere nge thay.”

15Miyad fek fapi tow’ath ni ngar pi’ed nge salpiy nike gaman e ruw yay nib yo’or ko fa yanem; ma kur feked Benjamin. Miyad fal’eg rogorad ngranod nga Egypt, miyad yan ra m’uggad ngak Josef. 16Fa’ani guy Josef Benjamin nike un ngorad, me ga’ar ngak e re tapigpig nib milfan e naun rok Josef ngak, “Mfek e pi pumo’on ney nga naun; ma ga li’ reb e gamanman ngam lith, ya pi pumo’on ney e ngar uned ngog ko abich ko misiw’.” 17Me rin’ fare tapigpig ni bod nike yog Josef ngak, me fek fapi pumo’on i yan ko naun rok Josef.

18Fa’an nni fekrad i yib ko naun rok Josef miyad tamdag, ya ra leam niged ni lungurad, “Ka ni fekdad i yib ngaray ni bochan fapi salpiy nni fulweg ngan tay ngalan e tutuw rodad ko som’on. Bay ra oggad ngodad ngan fekdad ngan ta’dad ni sib, mi ni fek e dongki rodad.” 19Ma aram miyad yib ngak fare tapigpig ni ir e mmilfan e naun rok Josef ngak, me lungurad ngak e re mo’on nem u langan e mab ko re naun nem, 20“Wenig ngom, ka’ gu bad ngaray bayay ni nggu chuw’iyed e ggan. 21Ma fa’an gu sulod ko gin ni gu pired riy e re nep’ nem, mra bagamad me pir’eg e salpiy rok ni bay u daken e grain u lan e birok e tutuw, ni urngin e salpiy romad nni fulweg nrogon tomalngin. Ere ba’aray romad ni kug fulweged. 22Ma ku er rogon ni kug feked e salpiy ni nggu chuw’iyed boch e ggan ngay. Da gu nanged e en ni fulweg e salpiy romad ngalan e tutuw romad.” 23Me ga’ar fare tapigpig, “Dabi magafan’med, ma dab mu tamdaggad. Ya Got, ni fare Got rok e chitamangimed, e ir e ke tay e salpiy ngalan e tutuw romed ni fan ngomed. Ya salpiy ni mpi’ed nga puluwon e ggan ko som’on e kug fek.” Me fek fare tapigpig Simeon i yib ngorad.

24Me fek fare tapigpig fa pi’inem i yib ngalan e naun rok Josef. Me pi’ e ran ngorad ngar maluk niged e rifrif u ayrad ngay, me duruw’iy fapi dongki rorad. 25Ma rabad ra ngongliyed rogon fapi tow’ath rorad ni fan ngak Josef ni bay yib ko misiw’; ya kar rung’aged ni ngar abichgad u rom. 26Fa’ani yib Josef nga tabinaw, miyad fek fapi tow’ath i yib ngak ngalan e naun, marbad ra siro’gad ngak nge yan i math owcherad nga but’. 27Me fith ngorad ko bay e liliy rorad fa dariy, me mu’ me ga’ar, “Ke uw rogon salpen e chitamangimed nike pilibthir, ni ir faram e mu weliyed murung’agen ngog? Kabay ndawori yim’ ma dariy e liliy rok?” 28Me lungurad, “Chitamangimad, ni tapigpig rom e kabfos ma dariy e liliy rok.” Miyad ragbug ngar siro’gad ngak.

29Ma fa’ani guy Josef Benjamin, ni aram e cha’ ni yow nga yal, me ga’ar, “Dabisiy ni cha’ney e ir e th’abi bitir romed, ni ir fa’anem ni mu weliyed murung’agen ngog.” Me ga’ar ngak, “Fakag, I Got e ngi i ayuwegnem.” 30Me pagrad Josef nge yan nib gur, ya ke runguy walagen. Ma ke chugur ni nge yor, ma aram me yan nga senggil rok ngi i yor u rom. 31Ma fa’ani luknag owchen nge mu’ me yib ngorad ni be athamgil ni nge dabi yor, me yog ni nga ni fek e ggan i yib. 32Mi ni pi’ gan Josef nga reb e tebel ni go ir, mi ni pi’ gan pi walagen nga reb e tebel ni go’ yad; ma girdi’ nu Egypt nra uned ngak Josef ko abich e ni pi’ garad ngabang, ya yad be finey ni ban’en nib gel e tamra’ riy ni fa’an yad ra un ngak e girdi’ ni Hebrew ko abich. 33Ma fapi walag e kur pired nga tebel u m’on rok Josef ni kur k’afgad nrogon e duw rorad, ni tabab ko en nth’abi ilal nge yan i mada’ ko en nth’abi bitir; ma fa’anra guyed rogon ni kanog ngorad ni ngar pired nga tebel, mra changargad u owcherad ni kargin gad ngay. 34Mi ni fek e ggan u tebel rok Josef i yib ngorad, mi Benjamin e lal yay urngin e ggan nni pi’ ngak ko ggan nni pi’ ngorad. Ma aram miyad abich miyad unum e wayin ngar felfelan’gad.

Bible Ni Thothup

© 2007 Bible Society of Micronesia. Released under the Creative Commons CC-BY-SA license 4.0.

More Info | Version Index