Search form

Levitikus 25

Bin medlip e duw

(Deuteronomy 15:1–11)

1I yog SOMOL ngak Moses u daken e Burey nu Sinai,- 2ni nge yog ko girdi’ nu Israel e pi gam’ing ni ba’aray. Nap’an ni gimed ra thap ko fare binaw ni nge pi’ SOMOL ngomed, ma thingar mu liyorgad ngak SOMOL ni dab mu gi’ed e but’ riy ni ngam milay’ niged ko gubin e medlip e duw. 3Gimed ra yung e yungi milay’ romed, mi gimed tamilangnag owchen e pi woldug romed ni grape, mi gimed kunuy wom’ngin e woldug romed u lan nel’ e duw. 4Machane duw ni medlip e aram yaran e toffan ko but’, ba duw ni kan pi’ ngak SOMOL. Dab mu yunged e yungi milay’ romed ara mu tamilang niged owchen e yungi woldug romed ni grape. 5Mus ko pi grain ni i tugul rok nda un yung ma ku dab mu t’ared wom’ngin, ma ku dab mu kunuyed wom’ngin e woldug romed ni grape nda um tamilang niged owchen; ya re duw nem e nge toffan e but’ riy. 6Yug aram rogon ni da ni wolduguy e but’ ko re duw nem, ma ra pi’ e ggan ni fan ngomed, nge pi sib romed, nge pi’in yad be maruwel romed, nge pi girdi’ nu boch e nam ni yad be par romed, 7nge pi gamanman ni gimed ma chugliy, nge pi gamanman ni malboch u daken e yungi flang. Gubin ban’en nra pi’ e but’ ko ngiyal’nem ma yira kay.

Duwan e Felfelan’

8Mu the’eged medlip yay e medlip e duw, ma urngin u gubin e aningeg i ragag nge mereb e duw. 9Ma bin ragag e rran ko bin medlip e pul e Yaran e Bayul, ma ga l’oeg be’ nge thoy e rappa u lan e binaw ni ga’ngin. 10Ma ku aray rogon ni gimed ra tay e re duw nra gaman e wugem ngay, ni aram e ngam weliyed murung’agen mat’wun urngin e pi’in yad ma par u lan fare binaw. Re duw ney e aram e gubin yang e pi binaw ni kan pi’ nchuway’ e yira fulweg ngak e en tafen are pi’in ni owchen, ma en ni kan pi’ nchuway’ ni nge mang sib e yira fulweg nga tabnaw rok. 11Dab mu yunged e yungi milay’ romed, fa mu t’ared wom’ngin e woldug romed ni i tugul rok, ara mu kunuyed wom’ngin e woldug ni grape u daken e yungi milay’ romed ni grape nda um tamilang niged owchen. 12Re duw ney ni ga’ngin e ngam ted fan; kemus ni wom’ngin e galwog u lan e flang nda mu yunged e gimed ra kay.

13Gubin e pin’en ni kan pi’ nchuway’ e go’ yira sulweg ngak e en nri fen u lan e re duw ney. 14Ere nap’an ni gimed ra pi’ e binaw nchuway’ ngak reb e girdi’ nu Israel, ara muchuw’iyed e binaw rok, ma dab mu sasalpiyyed rogon. 15Pulwon ni ngam duwgiliyed e nge pluw nga urngin e duw nrayag ni nge pi’ fare gi but’ wom’ngin e woldug u m’on ni nge taw ko fare Duwan e Felfelan’. 16Fa’anra kab yo’or e duw, ma aram e ba tolang puluwon fare gi but’, machane fa’anra da ki yo’or e duw, ma nge sobut’ puluwon, ni bochan e n’en ni yibe pi’ nchuway e urngin wom’ngin e woldug ni be pi’ fare gi but’. 17Dab mu sasalap ngak be’ nu Israel, machane ngam fol rok SOMOL ni Got rom.

Pi oloboch ko fare medlip i duw

18Mu folgad u gubin e pi motochiyel rok SOMOL nge pin’en nike yog ni ngan rin’, ya nge yag ni mu pired ndariy ban’en nra buch romed u lan fare binaw. 19Re gi but’ nem e bayib wom’ngin, ma bayi yag gubin e tin gimed ba’adag ni ngam koyed mi gimed par ndariy ban’en nra buch romed.

20Dabi magafan’med ko mang e ngam ked u nap’an e duw ni medlip ni dab mu yunged e woldug fa mu kuniyed wom’ngin e woldug. 21I SOMOL e bayi tow’athnag e but’ ko duw nnel’ ni bochan e nge pi’ wom’ngin e woldug ni yira gaman riy u lan l’agruw e duw. 22Nap’an ni gimed ra yung e yungi milay’ romed ko duw ni meruk, miki gimed be kay e tin mu tired wom’ngin ngam ted nga naun u lan e duw nnel’, ma tin kabay e kigimed ra gaman riy nge mada’ ko ngiyal’ ni kam t’ared wom’ngin e tin kam yunged ko duw ni meruk.

Rogon i fulweg e binaw

23Binaw romed e ri dab ni pi’ nchuway’ ni dab kisul bi’id ko en tafen, ni bochan e de milfan ngomed; ya ba milfan ngak Got, ma gimed bod e milekag nike pagmed kam pired riy.

24Yira pi’ e binaw nchuway’, ma en nri tafen e bay mat’wun nra chuw’iy ni nge sul ngak. 25Fa’anra gafgow be’ nu Israel nike math e liyeb ngak me pi’ e binaw rok nchuway’, ma en nth’abi chugur ngak u pi girdi’en e ra chuw’iy fare gi binaw nge sulweg. 26Ma fa’anra dakuriy girdi’en fare mo’on ni nge chuw’iy fare gi binaw nge sulweg, mra chey ni fel’ rogon bingyal’ nge gaman salpiyen me ir rok e nge chuw’iy. 27Fa’anra aram rogon ma thangri pi’ puluwon ngak e en ni chuw’iy rok, ni be yan u oren e duw ni kabay me taw ko Duwan e Felfelan’, ni aram e ngiyal’ ni demturug rogon ma ke sul e binaw rom ngom. 28Machane fa’anra de gaman salpiyen fa’anem ni nge chuw’iy fagi binaw rok nge fulweg, ma ra par fare gi binaw u tan pa’ fa en nike chuw’iy nge taw ko Duwan e felfelan’. Ma aram e re duw nra sul fagi binaw ngak e en ir e tafen.

29Fa’anra pi’ be’ nib mo’on ba naun nchuway’ ni bay u lan bbinaw ni kan yororiy, ma bay mat’wun ni nge chuw’iy nge sul ngak u m’on ndawori polo’ reb e duw nike pi’ nchuway’. 30Machane fa’anra de chuw’iy u langgin e re duw nem, ma aram e ke mul u pa’ fare naun, ma fare naun e ke par nike tafnay facha’ ni chuw’iy nge pi’in owchen, ra taw ko fare Duwan e Felfelan’ ma dabki sul fare naun ngak. 31Ma pi naun ni bay u lan e binaw ndan yororiy e ta’reb rogon ko milay’; en nri tafen e bay mat’wun ni nge chuw’iy nge sul ngak bayay, ma ra taw ko Duwan e Felfelan’ ma yira sulweg fapi naun rok ngak. 32Ma girdi’en e ganong rok Levi e demturug e ngiyal’ ma bay mat’awrad ni ngar chuw’iyed e naun rorad nge sul ngorad u lan e pi binaw rorad. 33Fa’anra reb e girdi’ ko Levi e ke pi’ ba naun u lan reb e pi binaw ney nchuway’ ma da kun chuw’iy nge sul, ma thingar ni sulweg u lan fare Duwan e Felfelan’, ni bochan e naun rok e girdi’ ni Levi ni bay u lan e pi binaw nem ni aram taferad u fithik’ e girdi’ nu Israel. 34Ma fare gi binaw ni yima chugliy e saf riy nib liyeg e pi binaw ko pi Levite e dariy e n’en nra rin’ mi ni pi’ nchuway’; ya taferad ni dariy n’umngin nap’an.

Salpiy ni yima pi’ ngak e gafgow

35Fa’anra be par be’ ni ku reb e girdi’ nu Israel ni ba chugur ngom nike gafgow ndabki yag ni nge ayuweg ir, ma thingar mu pi’ e tin bt’uf rok ni bod ni ga be rin’ ngak be’ ni be maruwel rom, ya nge yag ngki i par ni ba chugur ngom.- 36Dab mun’ e win rom ko salpiy nra fek facha’ rom ya ngam fol rok Got ngam pag facha’ ni ku reb e girdi’ nu Israel ngi i par ni ba chugur ngom. 37Dab mu pag nge pi’ e win ngom ko salpiy ni mu pi’ ngak, ma dab mu guy rogon nge yo’or ban’en ni yag ngom ko ggan ni ga be pi’ ngak nchuway’. 38Irera’ e n’en nike yog SOMOL ni Got romed, ni ir e fekmed nga wuru’ yu Egypt ni fan e nge pi’ fare nam nu Kanaan ngomed me mang Got romed.

Pi sib ni yira pagrad

39Fa’anra be par be’ ni ku reb e girdi’ nu Israel ni ba chugur ngom nike gafgow me pi’ ir ngom ni ngam chuw’iy nge mang sib rom, ma dab mu pag nge rin’ e maruwel ko sib.- 40Ra par rom ni bod be’ ni ga be pi’ puluwon ngi i maruwel rom nge taw ko fare Duwan e Felfelan’. 41Ma aram e ngiyal’ i n’en nra pagem facha’ nge pifak ngar sulod nga taferad ko binaw rok e pi ga’ rorad kakrom. 42Ya girdi’ nu Israel e tapigpig rok SOMOL ma ir e fekrad nga wuru’ yu Egypt; ere thingar dabkun pi’rad nchuway’ ngar manged sib. 43Dab mu gafgow niged yad, mu folgad rok e Got romed. 44Fa’anra btuf ni nge yag e sib ngomed, ma ngam chuw’iyed e sib ko pi nam u to’obmed i yan. 45Ma ku rayag ni ngam chuw’iyed pifak e girdi’ u reb e nam ni yad ma par u fithik’med. Pi bitir nem nni gargelegrad u daken e nam romed e rayag ni nge milfarad ngomed, 46ma gimed ra tayrad ngki milfarad ngak e pi pumo’on ni pifakmed, ni yad ra pigpig ngorad nnap’an e yafos rorad. Machane dab mu kireb niged pa’med ngak reb e girdi’ nu Israel fa um m’angachgad ngak.

47Ra chey ni bay be’ nu reb e nam nma par u fithik’med nike fel’ rogon ke yo’or bogi ban’en rok, ma bay be’ nu Israel nike gafgow me pi’ ir nchuway’ ngak facha’ ni nge mang sib rok, ara pi’ ir ngak reb i chon e tabinaw rok facha’ ni be’ nu reb e nam. 48Ma nga tomuren nni chuw’iyrad, ma kabay mat’awunrad niki yira chuw’iyrad bayay. Reb e pumo’on ni walagen 49fa reb e pumo’on ni walagen e chitamngin are chitiningin, fa reb e bitir rok be’ ni walagen e chitamngin ara chitiningin, ara yug reb i girdi’en nib chugur ngak e rayag ni chuw’iy facha’ bayay nge sul’. Fa’anra ir rok e ke gaman e salpiy nike maruwliy, ma rayag ni nge chuw’iy’ mat’wun bayay. 50Fa en ni nge pi’ ir nchuway’ nge en ni nge chuw’iy e thingar ra weliyew, ma thingar ra the’egew urngin e duw ni nge tabab ko ngiyal’ nike pi’ ir nchuway’ nge mada’ ko fare Duwan e Felfelan’ nra be’ ma nge sul e tirok ngak ma thangri ta’areban’ row nga puluwon fa’anem ko ngiyal’ ni ngan pag nge yan ni bod rogon puluwon reb e girdi’en e maruwel. 51-52Thingari sulweg puluwon e gin kabay riy nib m’ag nga urngin e duw ni kabay, 53ni bod puluwon be’ ko maruwel rok u reb e duw nni pi’ ngak ndawori langob fare duw. En ni masta rok e thingari dab i gafgownag. 54Fa’anra dab ni pag nge yan nib puf rogon u reb e pi kanawo’ ney, ma ir nge pifak e thingar ni pagrad ngranod nib puf rogorad ko fare Duwan e Felfelan’. 55Be’ nu Israel e dabiyag ni nge mang reb e sib nn’umngin nap’an e yafos rok, ni bochan e girdi’ nu Israel e tapigpig rok SOMOL. Ke fekrad nga wuru’ yu Egypt; me ir SOMOL ni Got rorad.

Bible Ni Thothup

© 2007 Bible Society of Micronesia. Released under the Creative Commons CC-BY-SA license 4.0.

More Info | Version Index