Search form

1 Kolinti 1

Dupamu elokaka ga.

1Omaimidana galaloya Jisesi Kalaestikaho aposolo we lolo etane loko nilime eto ibo we nemo Polokaho, iwene Sitiwenite magoina minoidanaki 2+ Kolinti numutoka Omaimidana wewenalalesitoka luhuwa nesa maya je noliboe. Jisesi Kalaestikahoya maku libekoko eto iki minatae loko lesa mololibetaiye. Sa-okaiyoko, muki numuto namato wewena maloka minabo ito ho yowiboku ho limiboku minabo wewenaya We napate Jisesi Kalaestida uliwa wetome iki li soto soto iki minabo wewenakiya makoko aweyaha iki minae.

3Ahote Omailokati ito We napate Jisesi Kalaestitokatikiya nasahili ito hulu maya edimotoka mino moloko minadeyo.

Edimotoka monoka elewoleya soto pibokumu Omaimidana epoka libo.

4Omailimoya Jisesi Kalaestikumuye loko edimotoka nasahili olibetaibomuya elekoko nemokahoya muki yupeka Omaimidana epoka lokaka noe. 5Edimotipo Omailimo wavu-leko dilipe monoka apilaloka molone. Sakoko Omaimidana weuna oluholimo laloko elekaka le soto moloko bibomidana abuha-wowo, ito aito-aitomidana ga li soto pitabomidana abuha-wowo ohelibetaiboma ne. 6-7Sa-onenako, edimoya We napa Jisesi Kalaestima nisitibokumuya ewa iki miniki monokauya Omaimidana weuna oluholimo monoka monawa dilimekaka nesa makomuya ohu jamae. 8Emoya We napate Jisesi Kalaestima aku le lika oko nisitibo onawalo maya lihimatipo minametibo minatae loko ujapa olibetoko minadeko onawatipo suwetiye. 9Omaimidana ipala Jisesi Kalaestitoka omitae loko lesa molo libibo weya emesalo moloko olo-loko yowanu lekaka noibo weya ne.

Kolinti wewena maya monokamuye liki luwaku limikiki mini maloka maloka abo ga.

10Iwetelita, We napate Jisesi Kalaestida elewoleyalalo data lituyo: Wewenanelita elilo. Edimoya aito aito ga liki luwaku pou liki mini maloka maloka amilo. Monokamu nieliki data moli makokoto iki minalo. 11Wewenanele yuhase, nemoya dukauya lowa nesa soto pibolawaya Koloweda wewenasiya likayoko eloe. 12+ Sa-liki layoko elekonako, yamuya sa-loko noloe: Edimokutiya maloka wewenasiya lemo Poloda wewenala minune liki likaka niae. Liki nilayoko malokasiya lemoya Apolosida wewenala minune liki likaka niae. Ito malokasiya lemoya Pitada wewenala minune liki likaka niae. Ito malokasiya Kalaestida wewenala minune liki likaka niae. 13Sa-liki likaka niaboya, Kalaestikahoya asako ona mololetonehe. Ito Polo nemokahoya edimokumuye loko yoho yaha yalo helohe. Ito nemo Polo nukanemo dilipe wati okaiyoko nokuya udahe. Sakoya minamiye. 14+ Nemokahoya wehe loko noku udolibetamobo maya nenako, yamuya muluneuya lalo noeloe. We lowe Kilisiposiko Gayusikosidamakigoya noku udolibetobo maya ne. 15Yaya edimosiya emola uliwalimoya lilime wati iyoko noku ududawo ne liki likatae. 16+ Ito makoya sa-loko noeloe: Stepanasima wewenalalekiya noku udobetobo maya ne. Maloka wewena noku udobetobomu elamoe. 17Yamidana monawaya sakoya ne: Kalaestikaho wewenasida noku udobetatane loko noli hamiye. Emo gala lalo maya wetome oko lo bebe etane loko noli henebo maya ne. Ito Kalaesti maya yoho yaha yalo helibomidana galamidana abuha-wowola maya lemekatiye loko dukau aso jeleko ele wehe lokaka gaya loeboe.

Jisesi maya Omaimidana abuhalaki ito elekakawakiya ne.

18Yoho yaha yalo helibo gamuya lahelamibo anugu wikaka niabo wewenasiya eli aha nesa lolo ikaka niaboya, aya anu lalou nowudawo wewenalikaya eludawoya Omailokati abuha-wowo ga ne loko ele-minune. 19+ Sa-onebo nenako, ya nesamuya monoka bukuguya Omailimo libo ga mako sa-liki luhuwa ji-minabo ne:

Lemoya ele wehe loko madoteu golotone liki likaka niabo wewenasida ganipo maya kohakoyoko sukulu napau woko sawe napa lekune liki likaka niabo wewenasida ganipo maya ele hulatuwe.

20+ Sa-onenako, ele wehe lo-minudawo ne liki likaka niabo wewenasida ganipo maya Omaimidana omudaloya aha nesa lolo onenako, nakahaloka ne. Ito monoka monawa api-napi ibikaka niabo wewenasida ganipo maya nakahaloka ne. Ito oloti onawamidana monawamu litabo wewenasida ganipo maya nakahaloka ne. Omailimoya wewenasi data kikaka niabo nesa maya aha nesae loko muda hulokaiye. 21Ito Omaimidana elekaka noibo nesamidana abuhalama soto nopiyoko wewenasi edimonipo mudaiki elikaka niabo nesalotiya Omaimidana monawala mudaiki mudai wehe lamae. Sa-inabo nesamuya Omailimo wehe loko ata kekoko monoka gala maya woko lo bekuniyoko, maloka wewenasiya eli aha nesa lolo ikaka abo wewenasidaya lo bekuniyoko, elewole iki eliki emesalo molabo wewenamagoya Omailimo dilipekaka noiye. 22Sa-ibo neboya, Juda wewenasiya oliwaki nesa mako le soto moladeko mudatune liki odalau hikaka abo ne. Ito Guliki wewenasiya saina monawamuya ohu jiki ewa iki minikaka abo ne. 23Sa-oneboya, lemoya Kalaestida yoho yaha yalo kohabo gamamu ludawo maya Juda wewenaya eda delokaka noiye, ito Guliki wewenasiya eleyoko aha nesa lolo okaka noiboya, 24Omailimo dilipe molaibo wewena maya Juda wewenaki ito Guliki wewenakiya minaboya, Kalaestikumuya Omaimidana abuhala ito ele wehe lokaka nesa maya ne liki likaka niae. 25Maloka wewenasiya Omaimidana yowanulamuya nei nesa noliye likaka niabo nesalimoya monoka elamabo wewenasida elekaka nesanipomidana maya asetoko minokaka noiye. Ito Omaimidana yowanulamuya elewoleya abuha-wowola minamiye liki likaka niayoko, aya elewoleyala minamibo nesa ne liki likaka niabo nesalimoya muki wewenasida abuhanipo maya asetokaka noiye.

26Iwene, Omailimoya nenamidana wewena minayoko lesa molo libenebo ne. Yamuya mudaki elilowo. Hetoka wewenasiya edimokumuya sa-liki likaka niae: Wehe liki data kebo wewenaya muki minamae. Ito elewoleyanipoki wewenaya muki minamae. Ito dotipolesi etabokuti yowiki minabolawa muki minamae. 27Sa-ikaka aboya, Omailimo muki wewenasida domudaloya nei minabo wewenasida lesa molo bibo maya ele wehe lokaka noune liki likaka niabo wewenasida dilipe owanipo helitae loko sa-ibo ne. Ito wewenasida domudalo elewole amabo wewenasida Omailimo lesa molo bekaiyoko, dabuha molikaka niabo wewena maya owanipo luwekaka noiye. 28Ito wewenasida domudalo limiki minabo wewenasida maya Omailimo dilipe yowaloka molokaka noiye. Ito wewenasida domudalo liwi milikiwi iki minikaka niabo wewenasidamaki dilipe yowaloka molokaka noiye. Sakoya aya wewenasida lesa molo bekadanaki dulinipoki minabo wewenasida luhawanipo leko asutokaka noiye. 29Mikauka wewena makolimo Omaimidana omudalaloya elowa jeko upa leko yowekatiye loko sa-iye. 30Jisesi Kalaestikaho monoka maya lo soto mololibetokadeko monokauya miniki liki itae loko lemotoka Jisesida maya leko oli hiye. Jisesidaya Omailimo lemo ga monawa ele wehe letudawomidana monawaya netiye loko, ito Omaimidana owisalo wehe loko minatudawomidana monawa maya soto pitiye loko, ito lihimatema le huloletadeko luka le uluwitoletokadeko elowa jeko minokaka nesamidana monawa maya emoya netiye loko, ito lemo lihimateuti lilimitiye loko oli hiye. 31+ Yamuya monoka bukuguya ga mako sa-liki luhuwa ji molabo ga maya niseko ulolotonebo ne: Wewena malokasiya eke liki epoka likili maya We napamidana makokomu lilo.

Monoka Madona Ohatama

©Wycliffe Bible Translators, Inc.

More Info | Version Index