Search form

1 Kolinti 14

Omaimidana epalauti ga lo soto moloko lo bekaka nesaya yoweko adoha nesa ne.

1Sa-oneyo, edimoya wewenasida nasahili ibitiki weutipo betune liki dabuha molalo. Ito monokamidana elewoleya maloka letune liki dabuha molalo. Sakiya miniki Omaimidana epalauti ga li soto molikakakumuya elideko yowideyo. 2Wewena malokasiya alinali aitomidana dono jiki ga likaka niadanaki wewenasida li bamiki Omaimidanagoya li mikaka niae. Sa-ikaka niki Omaimidana weuna oluholimoya dilipe lolowa iyoko Omaimidana gala suna ibo maya likaka niayoko, maloka wewenasiya eli wehe lamaboya, 3Omaimidana epalauti gala maya edimonipo ganipouti likaka niadanaki muki wewenasida monokau dilipi elewole ikaka niae. 4Edimoya aito dono jiki ga likaka niabo wewenasiya edimonipo dukanipoma hi elowo ibitikaka niaboya, Omaimidana epalauti ga li soto nimolabo wewenasiya muki Jisesida wewenala yuhasidaya monokau dilipi lalo ikaka niae. 5Sa-ikaka niayoko, edimosiya alinali aitomidana dono ji suwitae loko elekaka noboya, Omaimidana epalauti ga li soto molatabomuya yoweko elekoloe. Omaimidana epalauti ga likaka niabo wewenasiya alinali aito donouti likaka niabo wewenasida maya asibitiki minae. Aito donouti likadeko Jisesida wewenala makolimo le wili jeko wewenalaya edimonipo dononipouti lo bideko elikiki yamidana ihilawa litaboya makoko aweyaha ekolaiye.

6Wewenanele yuhakuse, edimotoka wodanaki Omailimo lo soto moloko lo nimibo ga ito monoka monawa lo soto molokaka ito ohuwa hukokaka ga ito api-napi obetokaka aya lo soto moloko lo nolibodanaki aito gauti lo libitubolimoya nena nenako he elowo olibetatiye. 7Aha nesa pololopehe ito hotolohe eli wehe liki huhu lamitaboya nena-nenakoma onowa ele wehe letudawo ne. 8Ito pikuliya wehe loko huhu lametiboya lowa hitae loko noliye likiki wiki lowa nesa li lolowa amikilae. 9Yamidana oko alinaliya aitomidana donouti litaboya, maloka wewenasiya nena nena iki elitae. Ahamu likadeko gatipoya lasilimo le loko wokatiyo. 10Nemoya nata eloboya muki numuto namatoya aito aito dono jikaka niae, ito monawa nebo gago neboya, 11nemoya aha ga mako elametuboya, aya gamidana aholalimo nemodamuya aito we minane loko letibo ne, ito nemokahoya asako aito we ne loko letubo ne. 12Sa-onenako, edimotokaya asakogoya ne. Omaimidana weuna oluho elewoleyala maya edimotoka soto pitiye liki dabuha molikaka niabo nesaya wati oneboya, Jisesida wewenalale yuhasida dilipi monokau molikadeko napa itabo elewoleyamu dabuha molalo.

13-14Nemoya aito ononeloti Omailoka letuboya weuneloti lekoloe. Natalotiya saina mako wehe loko le soto molamekoloe. Sa-onenako alinali aitomidana donouti litabo wewenalitaya li wili jiki wewenasida li bitabo elewoleya letune liki maya Omailoka lilo. 15Sa-onenako, lemo sakoya sa-uniyoko wehe lekolainako, saina maya Omaimidana weuna oluholimo lepalo le lolowa oletokadeko alinali aitomidana onote jeko letune ito latadunu ele wehe lo-minoko Omailoka letune. Omaimidana weuna oluholimoya lilime lolowa okadeko aito lonoutiya nama letune ito ele wehe lo-minoko monoka namaya letune. 16Sametudawoya weutedunugoya Omaimidana epoka letudawoya, ahaya letapa emo aka elamitabo wewenasiya elamitabo nenako, emo akaloya nena nena ikima dowa lokoe liki litabo ne. 17Emoya Omaimidana epoka lalo letadawoki, wekakahoya ele opa nokoya nena nenako ukalaya le wehe loetatiye. 18Alinali aito donouti ga likaka nesaya nemokahoya aselibetoko lokaka noe. Sa-okaka nonako, yamuya Omaimidana epoka lokaka noboya, 19aya nesamuya eloyoko wehe letidanako, li esa iki minabokuya aito gauti ga hanahena letuwe loko letuboya, aha letubo neboya, aha lametubo nesa lene. Nuka natalimoya ele wehe lo-minoko wewenasida monoka gamu api-napi obetakolo monoka lasolasi lo bekaka nesamuya eloyoko yowekaiye.

Monoka likili maya oluho lasola nesa liki ono ono moliki lamilo.

20Wewenanele yuhase, oluho lasolasiya amanama nesamu yatoka data kikaka niabo nesa liki samilo. Oluho lasolasi nesa likili maya lahelamibo nesa lolo amilo. Ito alinali aito donouti monoka lokaka nesamamuya oluho lasolasi nesa lamiki olopa wewenasi nesago lilo. 21+ Monoka bukuguya ga mako sa-liki luhuwa ji-minabo ne:

We napamamo aito ebatoti wewenasida dilipe-loko nisoyoko nisiki maya wewenasida aito dono jiki nepauti ga maya li bitaboya, maya wewenasiya wehe liki elamikilae loko liye.

22Loko lonebo maya nenako, aya gamidana malokawaya letuyo, elilo. Aito gaukatiya alinali li welepa jiki likaka nesaya monoka elebo wewenamuye loko anewaya soto pamiye. Monoka elamabo wewenasiya mudaikiki ololo itae loko ne. Ito Omaimidana epalauti ga lokaka nesaya monoka elamabo wewenamuye loko soto pamiye. Monoka elebo wewenasida nesanipo ne. 23Sa-onenako, yamuya Jisesida wewenalale yuha maya li nupa iki miniki mukiya alinali aito donouti nilideko, monoka elamitabo hetoka wewenasiya nisiki maya wewenasiya nei moliki sipaki aya nilae liki likilae. 24Ito Omaimidana epalauti ga li soto moliki nilideko monoka elamitabo hetoka wewena makolimo niseko monoka elekolaiye. Sa-etiboya muki ahenatipolimo lihimala maya lo soto moloko obi oetakolaiye. 25Sa-ideko ukauka suna onetibo nesa maya soto pideko mudakoko okepa mika heko lipe mekokoya Omaiya wehe loko edimotoka ne loko lekolaiye.

Iki moliki itabo nesa mukiya woko anuwalogo lideyo.

26Wewenanele yuhase, nenaha etune. Edimoya monokalo nisiki li esa ikaka niaboya dupagoya samabo ne. Wewena makokolimo monoka namaya leko nisekaka noiye. Ito wewena makomalimoya api-napi olibetokaka nesaya leko nisekaka noiye. Ito wewena makolimoya Omaimidana epalauti ga aitomidana leko nisekaka noiye. Ito makomalimo alinali aitomidana gaukati le wili jeko lokaka aya leko nisekaka noiye. Ito wewena makolimoya alinali aitomidana donoukati lokaka noibo donoukatiya le welepa jeko lokaka noiye. Yamidana iki monokatipo maya soto peko wavu-leko netiye liki yamidana nesagoya lolo ilo. 27Ito aito donoukati ga litaboya muki wewenasiya samilo. Wewena lowehe ito loweki makoki wewenasiya makoko makoko iki nilideko wewena makolimo le welepa jeko lideyo. 28Monokalo li esa iki minadeko ga le welepa jeko letibo wewena minamidekoma, wewena makolimo alinali aito ono jeko lekolo nokoma, aya wewenalimoya aitoloka minoko eimolalokaki ito Omailokakiya lideyo. 29Ito Omaimidana epalauti aya li soto moliki minadeko maloka wewenasi mudaikikiya ona molatae. 30Wewena mako netibotoya Omaimidana weuna oluholimo ga ukau moloetokadeko ga lekolo maya omutoko letibo we maya aha mikaloka minadeko emo maya sinoko lideyo. 31Sakiya Omaimidana epalauti ga maya letune likima edimo mukisiya aha litae. Sakiya makoko makoko iki lideko malokasiya monoka eliki duka li lolowa itae. 32-33Ito Omaimidana epalauti aya le opa okaka nesamuya umu helekaka we nehekala, saina le wehe lokaka nesamuya umu helekaka noibo nenako, epalauti ga litabo wewenasiya li soto molatabo galaloya ujapa iki minatae liki liminaboma ne.

Muki numuto namato Jisesida wewenalasi monokamuya li nupa niayoko, 34menakipasiya gahena lamiki aha minikaka niae. Sa-ikaka niayo, edimokiya asaikiya sa-ilo. Menasiya monoka aya litae loko ele bamoe. Menasiya sakiya li-miniki minatae loko Mosesekaho lo hukoko libo galimoya lone. 35Menasiya monoka monawamuya loka ikili maya numudanipouka miniki waunipolesida lideko waunipolekiya edimonipo miniki ligi hagi itae. Mena makolimo sino-minoko wavu-liki wewenasida domudaloya monoka aya letiboya owana helitibo nesa ne. 36Ito aya gamuya delamideko maya Omaimidana gala mako edimotokatiya soto pekaiyoko yamidana nesa lolo ikaka niahe. Ito edimogo Omaimidana galaya elebo nehe loko letuyo. 37Ito edimotokatiya wewena makolimo Omaimidana epalauti ga lokaka we wehe loko minoe loko letiboya, ito nukauya Omaimidana weuna oluholimo monokamidana elewole mako molonebo maya lemeko ne loko elitiboya, luhuwa je nolibobo aya We napalimo loko hukaibo gama ne loko elideyo. 38Ito wewena makolimo maya aya ele hulatiboya asako emo letibo gala maya ele hulatune. 39Sa-oneyo, wewenanele yuhase, Omaimidana epalauti ga lo soto molatune likigo dabuha moliki elilo. Alinali aitomidana dono jiki ga likaka nesamuya demega lamilo. 40Monokamuya li nupa iki miniki muki nesahena iki moliki itabolimoya awa minametibo, woko anuwalogo lideko minalo.

Monoka Madona Ohatama

©Wycliffe Bible Translators, Inc.

More Info | Version Index