Search form

1 Timoti 6

1Meusa oluho lolo iki aha yowanu liki minikaka niabo wewenasiya we napanipomuya sa-liki elitae: Wewenasiya Omaimidana uliwaya liki limiki monoka liki li opa ikatanako, yamuya lemo we napatelesida dulinipoya le sawa jeko dowa loko awoya-pawoya obetatune. 2Ito we napanipoya monoka elebo we lolo nidekoma we napanipomuya edimoki lemoki makoko monoka ele elewole okudanaki makoko aweyaha oko minokune likiki edimokumuya elideko lemamideyo. Elekele oluhonipolesida yowanuloti meinawa likaka niabo wesiya Omaimu eli elewole i-minabo we ito elekele oluhonipolesiya obohanipo libikaka i-minabo minanako, yamuya dowa liki elekele ibitatabolimoya wati ekolaiye.

Moni uvaminamu lumu helekaka ga.

3Emoya ula moloko ga maya monoka elebo wewenasidaya lo beko mino. Ga watiya maya eli hulikiki aito monoka litabo wewenamuya, ito We napate Jisesi Kalaestida gala eli hulikiki monoka anuwamidana galaki demesa mitabo wewenamuya sa-loko letune: 4Edimonipo data eliki dupa liki yowiki gawaya ma eli wehe lamae. Ga koli mimi iki liwa liwa iki minikaka abolimo dumu helekaiyoko, sabo nesa leko ma sa-etudawolae liki lowa-lawa nesa adanaki liwi letiwi ikaka niae. Ito aha opaya demega liki ga likaka niae. 5Sa-ikadanaki, sa-iki liwi huliwi iki minikaka niabo wewena maya obohanipo madonipoya opa okaiyoko, ga wati ga maya hulikadanaki monokalimo moni uvamina le soto mololetatihe liki elikaka niae. 6Moni uvaminamu lupaloka le kolatudawo nesamu labuha molamoko lupaloka alo leminudawo nesaya ayahasi ne loko moletoko minatudawo nesalimoya monokaya lemotoka wati oko ihilawa jeko minakolaiye. 7Lemoya sa-loko ele-minune: Mikauka soto pudawo onawaloya saina-maina uvaminakiya ma ladeu moloko leko nisamune. Ito minoko alikaya heletudawo onawaloya aha lupa sapagoya wekoloune. 8Sa-onenako, nodenesa ito lupalo nesaya lemotoka ma nedekoma ayahasiya ne loko moletoko minatune. 9Moni uvamina napamuya dumu helekaka wewenasidaya olohalimo mulunipou hekadeko elehulau maya kohaikili ae. Sa-nikiya aha nei nesa dilipe opa etibo nesa aito aitomu dumu helekadeko, yauya limiki latila iki sima nakilae. 10Moni uvaminamu labuha molokaka nesalimoya aito aito lahelamibo nesa lolo okakamidana monawa maya ne. Sa-onenako, maloka wewenasiya aya anuloya wikadanaki, monoka anumidana maya hulikiki demesa mikaka niae. Sa-ikayoko, edimotoka miluma nesa mukiya soto pekaiye.

Ele elewole okaka nesamu labuha molokaka yowanuwa letune.

11Omaimidana yowanulalo welikaya, yamidana nesaya emesa mo. Sa-okoko wehe loko wati oko monokalaki minokaka, elewole oko elekaka, ulana molitikaka, ukadunu nasahili obetokakaya soto nopideko, amanapa oko sinoko minokaka oko leso oko minatuwe loko abuha molo. 12Sa-nokoya ele elewole okakakumuya abuha moloko yowanuwa lo. Sakoya le-loko woko elewole epa mutiwamakiya le ikitoko litane. Ito emokaya sa-etuwe loko muki wewenasida domudalo monoka le sa-onoe loko lo hukadeko, Omaimo aya elewole epa mutiwa maya le kolatane loko lesa molo imibo maya ne. 13+ Saina-maina le soto molaibo we Omaimidana omudalo, ito kiyape Potiyo Paelatida amaitokaya eimola monawalamu lo soto molaibo we Jisesi Kalaestida omudaloya sa-loko lo hukoko noloe: 14Emoda ilime eto ibo yupeka li hukigitabo gamu emo ukau lameda lonedeko lihimaka minametibo mino-loko nowideko, We napate Jisesi Kalaestida onawala maya nisitiye. 15Emo onawala maya alili etiboya, Omailimo lokadeko soto pe lalo ekolaiye. Omaiya mino luwato moloko minokakamidana ujapa wela makoko ne. Emo duliki wesida uliki wenipo ito ujapa wesida ujapa wenipo makoko ne. 16Emoya helekakawaki minamiye. Emola lamedalalo minoko leko noibotoya lemo aha woko hetokaka nesaya minamiye. Wewena makolimo emo upalo mudaikaka amabo ne, ito wewena makolimo upalo mudamekolaiye. Epoka lomikaka abuha-wowo ito elewole oko minokakamidana abuha-wowo aitoka minadeyo. Watiyae.

17Emoya ma mikauka moni uvamina muki li-minikaka niabo wewenasida sa-loko lo hukoko lo bo: Dupa liki yowamilo. Tolowa okaka nesamuya elideko elewole amideyo. Sa-ikiki ayaloka wiki li uka jamilo. Omailimoya mida numuda noko moloko lalowa elitae loko wavu-leko lemekaka noinako, emotokaya wiki jigi iki minatae loko lo bo. 18Emokahoya sa-loko lo hukoko lo bo: Saina lalowamugoya eliki minalo. Saina wehe loko wati nesamugo iki moliki itabolimoya edimo uvaminatipo lolo etiye. Nasahili iki miniki sainatipohenaya ona moliki bitaboto olo liki minalo loko lo bo. 19Sa-likiya monoka watiya li soto molatabolimoya elewoleyanipo lolo okadeko, alikawalokaya mino-loko woko minatibo neyo. Sa-noideko, elewole depa mutiwa lalo maya wehe liki litae.

20Kee, Timotiyo, abuhalaki nesa Omailimo imiboya elewole oko ujapa oko le-mino. Ito ga ulawa minamiboya maloka wewenasi li-minadanaki, monoka maya pelesa jikadanaki, muki nesasida monawanipo ele suwo-minune liki suwa likaka niae. Sa-likaka niayo, emoya aya gaya huliko. 21Sa-likaka niayoko, maloka wewenasiya aya galo maya wiki elewole ikadanaki, lemo monokate maya mudai hulikae.

Omaimidana nasahilila maya edimotoka mino moloko minadeyo.

Monoka Madona Ohatama

©Wycliffe Bible Translators, Inc.

More Info | Version Index