Search form

2 Tesolonika 3

Lemodamuya Omailoka domuda likiki lilo.

1Ga mako lo suwoko lo libituyo, elilo. Omaimidana galama hutili oko wetiye loko ito emo lamedala lalo edimotoka soto pibomidana oko numuto namato wetiye liki lemokumu Omailokaya domuda likiki lilo. 2Ito maloka wewenasiya monokaya wehe liki eli suwamabo nenako, duka lahelamiboki wewena ito lihimanipoki wewenasida dadeutiya lilime oli etiye liki Omailoka likiki lilo.

3We napaloka jego oko minokaka wemamo luhawatipo maya le etoha oko we lahelamibo welimo niseko kohaidokatiye loko dilipe wati oko ade lalaga mololibetakolaiye loko elekaka noune. 4Edimoya ga maya lo libetudawoya eli-liki wiwa wiwa iki minataboya edimokumu We napaloka lata etipa kamekolune.

5We napalimoya duka le lalo ideko Omailimo ukalaloti nasahili olibetaibokuya ito Kalaestikaho elewole oko mino-loko wibokuya aku koliki mitae loko Omailokaya noloe.

Yowanu lamoko yogo-yogo jeko monekaka gamu.

6Wewenatele yuhase, We napate Jisesi Kalaestida galaloya yowanu ga mako sa-loko lo nolibune: Jisesida wewenala malokasiya ga lo libudawotoya nisiki omiki yowanuwa lamiki opaya minikaka niae. Sa-ikaka niayo, saki weunipo molabo wewenakiya magoina ouna jiki minamilo. 7Edimotoka wudawo yupeka maya anu wilelibetoko yowanu lekaka udawoya alo mudaki eli-minae. Sa-okaka nouniyo, edimokiya asaikigo lemeke molalo. Edimotokaya woko aha minamudawoma ne. 8Edimotokatiya nodenesa meinawa minamibo namudawo maya ne. Nala jeko le-minuniyoko osele delokatiye loko lemote lupalo nesa meina hetune loko ludaka nekewa miluma yowanu lekaka udawo maya ne. 9Edimotokati nodenesa maya liki natae loko loletoneboma neboya, monawaya dilipeko lemo judawo liyakau jitae loko yowanu lekaka udawo maya ne. 10Edimoki minoko sa-loko lo libekaka udawo maya ne: Wewena makolimo yowanu lamoko yogo-yogo jeko moneko netibo maya nodenesa mositadeko namideyo. 11Edimotokatiya ga mako sa-loko nisiyoko elune: Maloka wewenasiya edimonipo yowanunipo maya hulikiki yogo-yogo jiki maloka wewenasida yowanunipouya awa-kawa iki monikaka niae. 12Yamidana wewenasida maya We napa Jisesi Kalaestida galaloya sa-loko data leko nololibune: Edimosiya moletiki yowanu lideko nodenesanipoya o moladeko natae.

13Wewenatele yuhase, saina ihilawa lolo okaka yowanumuya osele delamideyo.

14Maya pepauya ga luhuwa je nolibudawoya wewena makolimo hulokadeko maya, monawalamuya muda-elikiki hulitikadeko, eimolago minoko owana luwitiye. 15Edimosiya lowa hi mitae loko lamoe, iwete liki ata liki ilimi wewesilo.

Dupamu elaiyoko luhuwa je bibo ga.

16We napate Jisesiya hulumidana ahola maya muki yupekaya yamidana mamidana oko huluya edimotoka le soto pideko hulu iki minalo. Sakoya We napama edimotoka mino-loko woko minadeyo.

17Nemo Polo maya olotiya luhuwa jekaka oijo maya neimone nadeloti maya luhuwa nojoboya neimone ane loko nojoe. Nemoya muki yupeka luhuwa ayamidanago jekaka noe.

18We napate Jisesi Kalaestida nasahilila maya edimotoka mino moloko minadeyo.

Monoka Madona Ohatama

©Wycliffe Bible Translators, Inc.

More Info | Version Index