Search form

Joni 15

Jisesiya waini nala monawa laloya ne.

1Jisesimamo kolo meko nemoya waini nala monawa laloya minoe loko liye. Ito ahoneya waini yowanu ahola maya ne. 2Ito nemotokatiya akawa makolimoya ihilawa jametiboya ihilawa wavu-leko jitiye loko hukoko le hulatiye. Ito ihilawa jekaiyoko mudaikoko akawa lahelamibolawa maya hukoko le hulokaka noiye. 3Sa-onenako, edimoya monoka lo libobolimoya dukauya le uliwitokaka noiye. 4Edimosiya nemotoka nisiki omiki minataboya nemokahoya asako edimotoka woko omeko minakoloe. Akawane makolimo monawaneloya omeko minametiboya eimola ihilawa mako jametibo ne. Sa-onenako, edimosiya nisiki nemotoka omamitaboya, asaoko edimotokaya ma ihilawa jametibo ne. 5Nemoya waini nala monawa minonako, edimoya akawaneya minae. Wewena mako nisiki nemotoka omitaboya edimotoka asako woko omekoyoko ihilawa lalo jideko minakilae. Edimoya ma nemoki nisiki omiki minamitaboya ma ihilawa lalo jamekolaiye. 6Wewena mako nisiki nemotoka omamitaboya, alala miyoko hukiki li hulikaka niabo nesa leko alala mekolainako, hukoko le hulakoloe. Akawahenaya alala mekaiyoko hukiki joku jikaka niae. Nemotoka nisiki omamabo wewenasidaya aya nesaya dupalo soto pekolaiye. 7Edimoya nemoki omiki minataboya ito nemo ganeya dukau netiboya sainahenamuya wako litabo nesaya aha soto pekolaiye. 8Edimotokaya ihilawa muki jideko wehe liki nemo wewenane yuha lolo iki minadekoma, ahoneda onowelaki luhuwala maya soto pekolaiye. 9Ahonekahoya ukala nemekaka noiyoko, nemokiya asaoko nukane mekaka nonako, edimokiya asaoko nukane libekaka nobomidana apilaloka maya nisiki minalo. 10Nemoya ahoneda epalauti ga maya emesalo moloko ukala nemekaka noibomidana apilaloka minobo ne. Sa-okaka nobo nenako, edimokiya asaiki nepauti ga maya eli likiki nisiki nukane libekaka nobomidana apineloka maya minatayo. 11Nemoya muluneuya aila uluma silekaka noibo nesaya edimotoka minadeko, mulutipou aila uluma silitibolimoya hutili oko lomala jeko minadeyo loko ga maya lo libeko suwoe.

12+ Sa-loko lo nolibetoe. Nukane libekaka nobo nesa liki emo uka mideko emo uka mideko iki mini-liki wiki minalo. 13Wewena mako iwelamuye loko minoko leko noibo nesala hulatiboya, ukala bekaka noibo nesamidana monawa maya soto pekolaiye. Aitomidana uka mekakalimoya sako uka mekakamidana asetamekolaiye. 14Ga maya lolibetobomidana lolo ikadeko mudakoko yowo mololibetakoloe. 15Elekele oluho makolimo oluho aholakaho oko moloko ibo nesahenaya mudaminako, oloti maya onawaloya edimokumuya elekele oluhonele loko lametuwe. Nemo ahonetokati elobo ga maya lo libeko suwokobo maya nenako, edimokumuya yowonele minae loko letuwe.

16Edimoya nemoda maya nilimi eto amae. Neimonekaho dilipe eto okoyoko wiki saina ihilawa maya li soto molikadeko, woko elewole oko minowa minowa oko netiye loko lo noliboe. Sa-okadeko, nemo nuline maya li-miniki yamidana mamidana nesamu wako litaboya ahonekaho aha libekolaiye. 17Sa-onenako, olotiya emo uka mideko emo uka mideko iki minatae loko nololibetoe.

Monoka eli lamabo wewenasiya Jisesida ulanipolo we lolo itikaka niae.

18Monoka eli lamabo wewenasiya ulanipolo we lolo nilibitadeko maya, we napate maya ma mikau neboto asaiki ulana molitikaka abo maya ne liki elilo. 19Edimoya monoka elamabo wewenasikuti minatidanako, sa-iki nesa lolo ilibitamiki duka moli libetine. Nemoya luwawanipoutiya dilipe lena okoyoko, iki moliki abo nesa maya alo hulikabo maya ne. Sa-ikabo maya nenako, yamuya ulanipolo we lolo nilibitikaka niae. 20+ Elekele oluholimoya ujapa wela oko moloko okaka noibo nesamidana asetokaka minamiye loko lo libobo ga maya elitayo. Monoka elamabo wewenasiya nemoda lahelamibo nesa lolo initikaka nianako, edimokiya asaiki lahelamibo nesa lolo ilibitakilae. Nemo ganeya eliki li owo jamabo nenako, edimo atipokiya asaiki eliki li owo jamikilae. 21Noli hibo wemidana muda-eli wehe lamabo nenako, yamuya nemo nuline edimotoka nebokumuye liki sa-ilibitakilae. 22Nemoya edimoki lemeko soto peko gaya lo libamobo minatidanako, lihimanipoya minametine. Sa-iboya lihimanipo maya nena nena iki hulatae. 23Nemoda ulanelo we lolo initikaka niabo wewenasiya ahonedakiya ulalalo we lolo itikaka niae. 24Nemoya luwawanipou elewole oliwaki ganeya muki wewenasi li soto pamabomidana le soto pamobo minatidanako, aya wewenasitokaya lihimanipo minametine. Aya nesa lolo okoyoko mudaikabo maya neboya, mudai hulikiki nemoda ulanipolo we lolo initikaka niae. Sa-inadanaki, ahonedakiya asaiki ulanipolo we lolo itikaka niae. 25+ Sa-ikaka niayoko, monoka bukuguya ga mako sa-liki luhuwa ji-minabo ga maya niseko ulolotonebo ne:

Edimoya nemoda ahamu ulanipolo we lolo initae.

26He elowo olibetoko ihilamidana ahola maya Omai weuna oluho maya ahonetoka ne. Edimotokaya ahonetokati oli hekoyoko lemeko nemo monawane lo soto molakolaiye. 27Ito edimoya nemo yowanu api obokuti maya nemoki magoina mini-liki wiki minabo maya nenako, edimokiya asaiki nemo monawane maya li soto molakilae.

Monoka Madona Ohatama

©Wycliffe Bible Translators, Inc.

More Info | Version Index